ព័ត៌មានជាតិ

សំណង់ថ្មីថែមទៀត បន្តសាងសង់តាមដងស្ទឹងសង្កែ បំពានការណែនាំរបស់អភិបាលខេត្ត

បានផុស

១ year មុន

នៅ

ថ្ងៃសៅរ៍ ២ កញ្ញា ២០២៣

ដោយ

សំណង់រឹងរំលោភបំពានដីមាត់ស្ទឹងសង្កែ ចាប់ផ្តើមកើតឡើងមួយករណីទៀតហើយ ក្រោយពីមានការផ្ទុះឡើងលើបណ្តាញសង្គមព្រោងព្រាត បានរិះគន់អ្នកមានលុយមានអំណាចបានសាងសង់ “រីសត” រំលោភបំពានដីចំណីស្ទឹងសង្កែកាលពីពេលកន្លងទៅនេះ។

ការរីករាលដាលសំណង់រឹងបំពានដីមាត់ស្ទឹងសង្កែជាបន្តបន្ទាប់នេះ ធ្វើឡើងក្រោយពីមានសំណង់រឹងមាំបំពានច្បាប់មួយបានកើតឡើង (រីសត) ដំបូងគេនៅប៉ែកខាងលើដែលជាគំរូទើបមានការសាងសង់បន្តគ្នាយ៉ាងរលូនបែបនេះ ជាហេតុធ្វើឲ្យប៉ះពាល់ដល់សោភ័ណភាព និងប៉ះពាល់ក្នុងការស្តារជួសជុលច្រាំងស្ទឹង ក្នុងរយះពេលណាមួយដែលត្រូវធ្វើការអភិវឌ្ឍន៍។

បើតាមប្រភពពីប្រជាពលរដ្ឋដែលរស់នៅតាមមាត់ស្ទឹងយូរឆ្នាំជាច្រើនគ្រួសារ បានលើកឡើងដោយពួកគាត់សុំមិនបញ្ចេញឈ្មោះថា “ពួកខ្ញុំបានរស់នៅយូរឆ្នាំហើយ តែពួកខ្ញុំមិនហានធ្វើបែបនេះទេបើទោះបីមានលុយសាងសង់ក៏ដោយ បើទោះបីមិនខ្លាចច្បាប់ ក៏ពួកខ្ញុំរអៀសខ្លួនខ្លាចខ្មាស់គេដែរ ព្រោះដីបែបនេះជាដីចំណីស្ទឹងដែលជាសម្បត្តិរដ្ឋគួរតែចូលរួមជួយថែរក្សាទាំងអស់គ្នា”។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពួកគាត់បង្ហើបឲ្យដឹងទៀតថា ការសាងសង់ចុងក្រោយនេះគឺជាសំណង់រឹងជាលើកទី ៣ ហើយ ដែលបានបំពានលើដីចំណីស្ទឹងសង្កែ ស្ថិតក្នុងភូមិខ្វិត ឃុំព្រែកខ្ពប ស្រុកឯកភ្នំ។ សំណង់នេះបានសាងសង់ឡើងអស់រយះពេលជិត ២ ខែហើយ ដោយគ្មានការហាមឃាត់ណាមួយពីមន្ត្រីជំនាញឡើយ បើទោះបីបានសាងសង់រំលោភយកដីណីដងស្ទឹងទាំងស្រុងក៏ដោយ ក៏នៅតែមានការបុកគ្រឹះចាក់បេតុងខាងក្រោមហើយផ្នែកលើគឺគ្រោងដែកបានយ៉ាងរលូន។

លោក ម៉ិល សុផល អភិបាលស្រុកឯកភ្នំបានបញ្ជាក់ប្រាប់អ្នកសារព័ត៌មានថា បានដឹងអំពីសំណង់ដែលបានសាងសង់រំលោភដីចំណីស្ទឹង គ្មានច្បាប់អនុញ្ញាត។ លោកបានស៊ីញ៉េលើលិខិតមួយច្បាប់កាលពីថ្ងៃទី៣០ ខែសីហា ដើម្បីឲ្យម្ចាស់សំណង់ផ្អាកការសាងសង ព្រោះសំណង់រំលោភយកដីចំណីស្ទឹងដោយគ្មានច្បាប់អនុញ្ញាត។ តែលោកអភិបាលស្រុករូបនេះមិនបានបញ្ជាក់ថា តើតម្រូវឲ្យម្ចាស់សំណង់ត្រូវរុះរើសំណង់នោះចោលវិញឬយ៉ាងណានោះទេ។

សូមរំលឹកផងដែរថា ក្រោយពីមានករណីសាងសង់ “រីសត” រំលោភយកដីចំណីស្ទឹង ១ ករណីយ៉ាងចម្រូងចម្រាស់ លោក សុខ លូ អភិបាលខេត្តបាត់ដំបងក៏ចេញលិខិតជូនដំំណឹងដល់អាជ្ញាធរមូលដ្ឋានគ្រប់លំដាប់ថ្នាក់ ត្រូវពិនិត្យទប់ស្កាត់ និងត្រូវបញ្ឈប់រាល់ការសាងសង់សំណង់នានាដែលបន្តរំលោភលើដីចំណីមាត់ស្ទឹង បឹងបួរ ឬ អូរព្រែក ដោយខុសច្បាប់។ ក្រោយការចេញការណែនាំ ក៏មានការសាងសង់បន្តនៅផ្នែកខាងក្រោមរហូតដល់ ២ ករណីបន្ថែមទៀត ធ្វើឲ្យពលរដ្ឋនិងមហាជនបន្តការរិះគន់លើករណីដដែលៗនេះតគ្នាដូចសត្វខ្យង។

ការបន្តសាងសង់សំណង់រឹងបំពានលើដីចំណីស្ទឹងនេះ បានកើតឡើង ២ ករណីបន្ថែមទៀតបន្ទាប់ពីសំណង់រឹង ប្រភេទ”រីសត”។ ក្រោយមកក៏មានការសាងសង់សំណង់កម្ពស់បីជាន់បានសាងសង់លើចំណីស្ទឹងស្ថិតនៅភូមិថ្កូវ សង្កាត់ក្តុល ដូនទាវ ក្រុងបាត់ដំបង ហើយក៏ត្រូវបានលោកអភិបាលក្រុងចេញសេចក្តីជូនដំណឹងឲ្យផ្អាកការសាងសង់បណ្ដោះអាសន្ន ។ ចំណែកករណីទី២ បានសាងសង់សំណង់រឹងស្ថិតនៅក្នុងភូមិខ្វិត ឃុំព្រែកខ្ពប ស្រុកឯកភ្នំ ហើយលោកអភិបាលស្រុកឯកភ្នំក៏បានចេញសេចក្តីជូនដំណឹងឲ្យផ្អាកការសាងសង់ផងដែរ។

អត្ថបទ៖ សៅ សារិទ្ធ