ព័ត៌មានជាតិ

ស្វែងយល់រចនាសម្ព័ន្ធការងារ ក្រសួងប្រៃសណីយ៍ និងទូរគមនាគមន៍ ដំណើរការយ៉ាងណាខ្លះ?

បានផុស

១ year មុន

នៅ

ថ្ងៃចន្ទ ៤ កញ្ញា ២០២៣

ដោយ

ក្រសួងប្រៃសណីយ៍និងទូរគមនាគមន៍ បំពេញមុខងារជាសេនាធិការឱ្យរាជរដ្ឋាភិបាលលើបេសកកម្មដឹកនាំ និង គ្រប់គ្រងវិស័យប្រៃសណីយ៍ ទូរគមនាគមន៍ និងបច្ចេកវិទ្យាគមនាគមន៍និងព័ត៌មាន ព្រមទាំងធនធានវិសាលគមន៍ហ្វ្រេកង់ស៍វិទ្យុនៃព្រះរាជាណាចក្រកម្ពុជា។

ក្រសួងប្រៃសណីយ៍និងទូរគមនាគមន៍ ក៏មានភារកិច្ចរៀបចំគោលនយោបាយសម្របសម្រួលនិងជំរុញការប្រកួតប្រជែងក្នុងការផ្តល់សេវាប្រៃសណីយ៍ ទូរគមនាគមន៍ និងបច្ចេកវិទ្យាគមនាគមន៍និងព័ត៌មាន ព្រមទាំងការកាត់បន្ថយគម្លាតឌីជីថល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អនុក្រឹត្យស្តីពីដំណើរការ និងការប្រព្រឹត្តិទៅនៃក្រសួងប្រៃសណីយ៍និងទូរគមនាគមន៍ បែងចែករចនាសម្ព័ន្ធក្រសួងមានអង្គភាពថ្នាក់ជាតិ អង្គភាពស្វយ័ត និងអង្គភាពថ្នាក់ក្រោមជាតិ។

ក) អង្គភាពថ្នាក់ជាតិ

១- ខុទ្ទកាល័យរដ្ឋមន្តី
២- អគ្គនាយកដ្ឋាន
– អគ្គនាយកដ្ឋានរដ្ឋបាល
– អគ្គនាយកដ្ឋានប្រៃសណីយ៍
– អគ្គនាយកដ្ឋានទូរគមនាគមន៍
– អគ្គនាយកដ្ឋានបច្ចេកវិទ្យាគមនាគមន៍និងព័ត៌មាន
– អគ្គនាយកដ្ឋានគ្រប់គ្រងធនធានវិសាលគមន៍ហ្វ្រេកង់ស៍វិទ្យុ
៣- អគ្គាធិការដ្ឋាន
៤- វិទ្យាស្ថានជាតិប្រៃសណីយ៍ ទូរគមនាគមន៍ និងបច្ចេកវិទ្យាគមនាគមន៍និងព័ត៌មាន
៥- នាយកដ្ឋានសវនកម្មផ្ទៃក្នុង

ខ) អង្គភាពស្វយ័ត

១- និយ័តករទូរគមនាគមន៍កម្ពុជា
២- សហគ្រាសសាធារណៈ
– ទូរគមនាគមន៍កម្ពុជា
– ប្រៃសណីយ៍កម្ពុជា

គ) អង្គភាពថ្នាក់ក្រោមជាតិ

– មន្ទីរប្រៃសណីយ៍និងទូរគមនាគមន៍រាជធានីខេត្ត។

លោក ជា វ៉ាន់ដេត ក្រសួងប្រៃសណីយ៍និងទូរគមនាគមន៍

ខុទ្ទកាល័យរដ្ឋមន្តី

ខុទ្ទកាល័យរដ្ឋមន្ត្រីទទួលបន្ទុកបេសកកម្ម ដែលមានកំណត់ក្នុងអនុក្រឹត្យលេខ ១១ អនក្រ.បក ចុះថ្ងៃទី៣១ ខែមករា ឆ្នាំ២០១៧ ស្តីពីការរៀបចំនិងការប្រព្រឹត្តទៅរបស់ខុទ្ទកាល័យនាយករដ្ឋមន្ត្រី ឧបនាយករដ្ឋមន្ត្រី ទេសរដ្ឋមន្ត្រី រដ្ឋមន្ត្រី និងរដ្ឋលេខាធិការជាប្រធានស្ថាប័ន និងអនុក្រឹត្យលេខ២០ អនក្រ.បក ចុះថ្ងៃទី៣០ ខែមេសា ឆ្នាំ១៩៩៦ ស្តីពី ការរៀបចំនិងការប្រព្រឹត្តទៅរបស់ក្រសួងនិងរដ្ឋលេខាធិការដ្ឋាន។

អគ្គនាយកដ្ឋានរដ្ឋបាល

អគ្គនាយកដ្ឋានរដ្ឋបាលមានតួនាទី និងភារកិច្ចដឹកនាំគ្រប់គ្រងនិងសម្របសម្រួលកិច្ចការរដ្ឋបាល ធនធានមនុស្ស ហិរញ្ញវត្ថុ ទ្រព្យសម្បត្តិរដ្ឋ ពិធីការ ការងារសន្តិសុខផ្ទៃក្នុង ការងារនីតិកម្ម ការងារសហប្រតិបត្តិការអន្តរជាតិ និងសម្របសម្រួលការងារទូទៅជាមួយបណ្តាក្រសួងស្ថាប័ននៃរាជរដ្ឋាភិបាល។

អគ្គនាយកដ្ឋានរដ្ឋបាលមាននាយកដ្ឋានចំណុះចំនួន ៥ (ប្រាំ)៖

-នាយកដ្ឋានរដ្ឋបាល
-នាយកដ្ឋានបុគ្គលិកនិងបណ្តុះបណ្តាល
-នាយកដ្ឋានផែនការនិងហិរញ្ញវត្ថុ
-នាយកដ្ឋានសហប្រតិបត្តិការអន្តរជាតិ
-នាយកដ្ឋាននីតិកម្ម

អគ្គនាយកដ្ឋានប្រៃសណីយ៍

អគ្គនាយកដ្ឋានប្រៃសណីយ៍ មានតួនាទីនិងភារកិច្ចដឹកនាំគ្រប់គ្រងនិងសម្របសម្រួលកិច្ចការរៀបចំគោលនយោបាយនិងកសាងផែនការយុទ្ធសាស្ត្រជាតិ សម្រាប់អភិវឌ្ឍវិស័យប្រៃសណីយ៍ ធ្វើនិយ័តកម្មលើវិស័យប្រៃសណីយ៍ អភិវឌ្ឍធនាគារប្រៃសណ៍យ៍និងសេវាប្រៃសណីយ៍ហិរញ្ញវត្ថុ ព្រមទាំងចូលរួមការងារកិច្ចសហប្រតិបត្តិការទ្វេភាគី អនុតំបន់ តំបន់ សកលលោក និងអង្គការអន្តរជាតិក្នុងវិស័យប្រៃសណីយ៍។

អគ្គនាយកដ្ឋានប្រៃសណីយ៍មាននាយកដ្ឋានចំណុះចំនួន ៣ (បី)៖

-នាយកដ្ឋានគោលនយោបាយប្រៃសណីយ៍
-នាយកដ្ឋានគ្រប់គ្រង និងនិយតកម្មប្រៃសណីយ៍ឯកជន
-នាយកដ្ឋានគ្រប់គ្រងសេវាប្រៃសណីយ៍ហិរញ្ញវត្ថុ និងភស្តុភាកម្ម

អគ្គនាយកដា្ឋនទូរគមនាគមន៍

អគ្គនាយកដា្ឋនទូរគមនាគមន៍ មានតួនាទីនិងភារកិច្ចដឹកនាំគ្រប់គ្រង និងសម្របសម្រួលកិច្ចការរៀបចំគោលនយោបាយ និងកសាងផែនការយុទ្ធសាស្ត្រជាតិសម្រាប់អភិវឌ្ឍវិស័យទូរគមនាគមន៍ បន្តពង្រឹងពង្រីកការអភិវឌ្ឍហេដ្ឋារចនាសម្ព័ន្ធទូរគមនាគមន៍ និងចូលរួមសហការលើការងារទូរគមនាគមន៍ក្នុងក្របខ័ណ្ឌកិច្ចសហប្រតិបត្តិការទ្វេភាគី អនុតំបន់ តំបន់ សកលលោក និងអង្គការអន្តរជាតិ។

អគ្គនាយកដា្ឋនទូរគមនាគមន៍មាននាយកដ្ឋានចំនួន ២ (ពីរ) និងមជ្ឈមណ្ឌលចំនួន១ (មួយ)៖

-នាយកដ្ឋានគោលនយោបាយទូរគមនាគមន៍
-នាយកដ្ឋានគោលនយោបាយផ្កាយរណប
-មជ្ឈមណ្ឌលគ្រប់គ្រងទិន្នន័យសេវាទូរគមនាគមន៍ និងព័ត៌មានវិទ្យា

អគ្គនាយកដ្ឋានបច្ចេកវិទ្យាគមនាគមន៍ និងព័ត៌មាន

អគ្គនាយកដ្ឋានបច្ចេកវិទ្យាគមនាគមន៍ និងព័ត៌មាន មានតួនាទីនិងភារកិច្ចដឹកនាំគ្រប់គ្រងនិងសម្របសម្រួលកិច្ចការរៀបចំអនុវត្ត និងតាមដានគោលនយោបាយ យុទ្ធសាស្ត្រ ផែនការសកម្មភាពអភិវឌ្ឍវិស័យបច្ចេកវិទ្យាគមនាគមន៍ និងព័ត៌មាន និងចូលរួមសហការលើការងារបច្ចេកវិទ្យាគមនាគមន៍និងព័ត៌មាន ក្នុងក្របខ័ណ្ឌកិច្ចសហប្រតិបត្តិការទ្វេភាគី អនុតំបន់ តំបន់ សកលលោក និងអង្គការអន្តរជាតិព្រមទាំងកំណត់ស្តង់ដាកម្មវិធីកុំព្យូទ័រនិងសន្តិសុខព័ត៌មានលើវិស័យ បច្ចេកវិទ្យាគមនាគមន៍និងព័ត៌មាន។

អគ្គនាយកដ្ឋានបច្ចេកវិទ្យាគមនាគមន៍និងព័ត៌មាន មាននាយកដ្ឋានចំណុះចំនួន ៧ (ប្រាំពីរ)៖

-នាយកដ្ឋានរដ្ឋាភិបាលអេឡិចត្រូនិក
-នាយកដ្ឋានគោលនយោបាយបច្ចេកវិទ្យា គមនាគមន៍និងព័ត៌មាន
-នាយកដ្ឋានគ្រប់គ្រងហេដ្ឋារចនាសម្ព័ន្ធព័ត៌មានជាតិ និងគ្រប់គ្រងប្រព័ន្ធវិដេអូនៃសន្និសីទរបស់រាជរដ្ឋាភិបាល
-នាយកដ្ឋានកម្មវិធីកុំព្យូទ័រ និងមាតិកាព័ត៌មាន
-នាយកដ្ឋានសន្តិសុខបច្ចេកវិទ្យាគមនាគមន៍និងព័ត៌មាន
-នាយកដ្ឋានឧស្សាហកម្មបច្ចេកវិទ្យាគមនាគមន៍និងព័ត៌មាន
-នាយកដ្ឋានបច្ចេកវិទ្យាគមនាគមន៍និងព័ត៌មានសម្រាប់ជនបទ

អគ្គនាយកដ្ឋានគ្រប់គ្រងធនធានវិសាលគមន៍ហ្វ្រេកង់ស៍វិទ្យុ

អគ្គនាយកដ្ឋានគ្រប់គ្រងធនធានវិសាលគមន៍ហ្វ្រេកង់ស៍វិទ្យុ មានតួនាទីនិងភារកិច្ចដឹកនាំគ្រប់គ្រងនិងសម្របសម្រួល កិច្ចការរៀបចំគោលនយោបាយ ផែនការជាតិវិសាលគមន៍ហ្វ្រេកង់ស៍វិទ្យុ គ្រប់គ្រង និងបែងចែកធនធានវិសាលគមន៍ ហ្វ្រេកង់ស៍វិទ្យុ ដោយសហការជាមួយក្រសួង ស្ថាប័នពាក់ព័ន្ធនិងចូលរួមសហការលើការងារធនធានវិសាលគមន៍ ហ្វ្រេកង់ស៍វិទ្យុក្នុងក្របខ័ណ្ឌកិច្ចសហប្រតិបត្តិការទ្វេភាគី អនុតំបន់ តំបន់ សកលលោក និងអង្គការអន្តរជាតិ។

អគ្គនាយកដ្ឋានគ្រប់គ្រងធនធានវិសាលគមន៍ហ្វ្រេកង់ស៍វិទ្យុមាននាយកដ្ឋានចំនួន ៣(បី)៖

-នាយកដ្ឋានគោលនយោបាយ និងផែនការវិសាលគមន៍ហ្រ្វេកង់ស៍វិទ្យុ
-នាយកដ្ឋានគ្រប់គ្រងហេដ្ឋារចនាសម្ព័ន្ធហ្រ្វេកង់ស៍វិទ្យុ
-នាយកដ្ឋានគ្រប់គ្រងធនធានវិសាលគមន៍ហ្រ្វេងកង់ស៍វិទ្យុ

អគ្គាធិការដ្ឋាន

អគ្គាធិការដ្ឋានមានតួនាទីនិងភារកិច្ចដឹកនាំគ្រប់គ្រង និងសម្របសម្រួលការងារអធិការកិច្ចជាប្រចាំលើការងារបច្ចេកទេសការងាររដ្ឋបាលនិងហិរញ្ញវត្ថុ។

អគ្គាធិការដ្ឋានមាននាយកដ្ឋានចំនួន៣(បី)៖

-នាយកដ្ឋានអធិការកិច្ចរដ្ឋបាល និងទទួលពាក្យបណ្តឹង
-នាយកដ្ឋានអធិការកិច្ចហិរញ្ញវត្ថុ
-នាយកដ្ឋានអធិការកិច្ចបច្ចេកទេស

វិទ្យាស្ថានជាតិប្រៃសណីយ៍ ទូរគមនាគមន៍បច្ចេកវិទ្យាគមនាគមន៍និងព័ត៌មាន

វិទ្យាស្ថានជាតិប្រៃសណីយ៍ ទូរគមនាគមន៍ បច្ចេកវិទ្យាគមនាគមន៍ និងព័ត៌មាន មានតួនាទីនិងភារកិច្ចដឹកនាំ គ្រប់គ្រងនិងសម្របសម្រួលលើការងារអប់រំបណ្ដុះបណ្ដាលស្រាវជ្រាវ និងនវានុវត្តន៍លើវិស័យប្រៃសណីយ៍ទូរគមនាគមន៍បច្ចេកវិទ្យាគមនាគមន៍និងព័ត៌មាន។

វិទ្យាស្ថានជាតិប្រៃសណីយ៍ ទូរគមនាគមន៍ បច្ចេកវិទ្យាគមនាគមន៍និងព័ត៌មានមានលេខាធិការដ្ឋានចំនួន១ (មួយ) មហាវិទ្យាល័យចំនួន៣(បី) មជ្ឈមណ្ឌលចំនួន៣(បី) និងសាលាចំនួន១ (មួយ)។

-លេខាធិការដ្ឋាន
-មហាវិទ្យាល័យប្រៃសណីយ៍និងភស្តុភារ (ឡូជីស្ទិក)
-មហាវិទ្យាល័យបច្ចេកវិទ្យាទូរគមនាគមន៍និងបណ្តាញ
-មហាវិទ្យាល័យវិទ្យាសាស្រ្តកុំព្យូទ័រ
-មជ្ឍមណ្ឌលបណ្តុះបណ្តាលជំនាញវិជ្ជាជីវៈ
-មជ្ឍមណ្ឌលស្រាវជ្រាវនិងនវានុវត្តន៍
-មជ្ឍមណ្ឌលអប់រំពីចម្ងាយ
-សាលាក្រោយបរិញ្ញាបត្រ
-នាយកដា្ឋនសវនកម្មផ្ទៃក្នុង

នាយកដ្ឋានសវនកម្មផ្ទៃក្នុងទទួលបន្ទុកអនុវត្តភារកិច្ចតាមអនុក្រឹត្យលេខ៤០ អនក្រ.បក ចុះថ្ងៃទី១៥ ខែកុម្ភៈ ឆ្នាំ២០០៥ ស្តីពីការរៀបចំ និងប្រព្រឹត្តទៅនៃនាយកដ្ឋានសវនកម្មផ្ទៃក្នុងតាមបណ្តាក្រសួង ស្ថាប័ន និងសហគ្រាសសាធារណៈ។

អង្គភាពស្វយ័ត

ក្រសួងប្រៃសណីយ៍និងទូរគមនាគមន៍មានអង្គភាពស្វយ័តដូចខាងក្រោម៖

១) និយ័តករទូរគមនាគមន៍កម្ពុជា ជានីតិបុគ្គលនៃនីតិសាធារណៈដែលបានទទួលសិទ្ធិពីរាជរដ្ឋាភិបាល បំពេញមុខងារនិងភារកិច្ចដោយមានស្វ័យភាពខាងផ្នែករដ្ឋបាលនិងនិយ័តកម្ម ព្រមទាំងដោយឯករាជ្យពីប្រតិបត្តិករទូរគមនាគមន៍ និងបុគ្គលពាក់ព័ន្ធនឹងវិស័យទូរគមនាគមន៍ស្របតាមច្បាប់ស្តីពីទូរគមនាគមន៍។

២) សហគ្រាសសាធារណៈចំនួន២ (ពីរ) ដូចមានខាងក្រោម៖

– ទូរគមនាគមន៍កម្ពុជា
– ប្រៃសណីយ៍កម្ពុជា

អង្គភាពថ្នាក់ក្រោមជាតិ

មន្ទីរប្រៃសណីយ៍និងទូរគមនាគមន៍រាជធានី ខេត្ត មានតួនាទីនិងភារកិច្ចដឹកនាំគ្រប់គ្រងនិងសម្របសម្រួល ការងារលើវិស័យប្រៃសណីយ៍ ទូរគមនាគមន៍ និងបច្ចេកវិទ្យាគមនាគមន៍និងព័ត៌មាន ព្រមទាំងធនធានវិសាលគមន៍ ហ្វ្រេកង់ស៍វិទ្យុនៅថ្នាក់ក្រោមជាតិក្រោមការដឹកនាំផ្ទាល់របស់រដ្ឋមន្ត្រី។

អង្គភាពត្រួតពិនិត្យហិរញ្ញវត្ថុ

អង្គភាពត្រួតពិនិត្យហិរញ្ញវត្ថុ បង្កើតឡើងដោយរដ្ឋមន្រ្តីក្រសួងសេដ្ឋកិច្ចនិងហិរញ្ញវត្ថុ តាមក្របខ័ណ្ឌ នៃបទបញ្ជាកំណត់ក្នុងអនុក្រឹត្យលេខ ៨១ ចុះថ្ងៃទី១៦ វិច្ឆិកា ១៩៩៥ ស្តីពីការបង្កើត សា្ថប័នត្រួតពិនិត្យហិរញ្ញវត្ថុ លើការចំណាយថវិកាក្នុងបណ្តាក្រសួង៕