តែងតាំងលោក ឌិត មុន្ទី និងលោក ហោ ណាំហុង ជាឧត្តមប្រឹក្សាផ្ទាល់ព្រះមហាក្សត្រ ឋានៈស្មើឧបនាយករដ្ឋមន្ត្រី

ព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា បានចេញព្រះរាជក្រឹត្យតែងតាំងលោក ឌិត មុន្ទី និងលោក ហោ ណាំហុង ជាឧត្តមប្រឹក្សាផ្ទាល់ព្រះមហាក្សត្រ ឋានៈស្មើឧបនាយករដ្ឋមន្ត្រី។

ព្រះរាជក្រឹត្យរបស់ព្រះមហាក្សត្រ ឡាយព្រះហត្ថលេខានៅថ្ងៃទី ៤ ខែកញ្ញា ឆ្នាំ ២០២៣នេះ បានត្រាស់បង្គាប់តែងតាំងលោកកិត្តិនីតិកោសលបណ្ឌិត ឌិត មុន្ទី ជាឧត្ដមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា មានឋានៈស្មើឧបនាយករដ្ឋមន្ត្រី។

ព្រះរាជក្រឹត្យរបស់ព្រះមហាក្សត្រ ដាច់ដោយឡែកមួយទៀត ក៏បានត្រាស់បង្គាប់តែងតាំងលោកកិត្តិបរិរក្សបណ្ឌិត ហោ ណាំហុង ជាឧត្ដមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា មានឋានៈស្មើឧបនាយករដ្ឋមន្ត្រី ផងដែរ។

សូមជម្រាបថា លោក ឌិត មុន្ទី ជាអតីតប្រធានតុលាការកំពូល រីឯលោក ហោ ណាំហុង ជាអតីតរដ្ឋមន្ត្រីក្រសួងការបរទេសកម្ពុជា៕