ប្រកាសអាសន្ន! បើកទ្វារទឹកទំនប់វារីអគ្គិសនីតាតៃ អាជ្ញាធរត្រៀមជម្លៀសពលរដ្ឋរកទួលសុវត្ថិភាព

ក្រុមហ៊ុនវារីអគ្គិសនីតាតៃបានប្រកាសបើកទ្វារទំនប់ទឹកនៅរសៀលថ្ងៃទី ០៤ ខែកញ្ញា ឆ្នាំ២០២៣ បន្ទាប់ពីទឹកភ្លៀងពីខ្សែទឹកខាងលើអាងស្តុកទឹកវារីអគ្គសនីតាតៃ កំពុងកើនឡើងជាលំដាប់។

ក្រុមហ៊ុនវារីអគ្គិសនីតាតៃបានបើកទ្វារទឹក ដែលលំហូរទឹកបញ្ចេញមាន ១ ២០០ ម៉ែត្រគូបក្នុងមួយវិនាទី ចាប់ពីម៉ោង ២ រសៀលថ្ងៃទី ៤ ខែកញ្ញានេះ។

លោក ខ្លឹម យុនវិសិដ្ឋ អនុប្រធានមន្ទីររ៉ែ និងថាមពលខេត្តកោះកុង ប្រាប់កម្ពុជាថ្មី នៅរសៀលថ្ងៃទី ០៤ ខែកញ្ញា ឆ្នាំ ២០២៣​នេះថា វារីអគ្គិសនីចិនបានផ្ញើលិខិតមួយដោយប្រកាសអាសន្នបើកទំនប់បញ្ចេញទឹក ១២០០ ម៉ែត្រគូប ក្នុងមួយវិនាទី។

លោកថា ការបើកទំនប់ទឹកនេះ អាចនឹងប៉ះពាល់ដល់ប្រជាពលរដ្ឋដែលរស់នៅក្បែរតាមដៃព្រែកស្ថិតក្នុងឃុំតាតៃក្រោម ស្រុកកោះកុង ខេត្តកោះកុងមួយចំនួនដែរ ហើយអាជ្ញាធរបានត្រៀមខ្លួនរួចហើយក្នុងការជួយសង្គ្រោះប្រជាពលរដ្ឋក្នុងករណីរងគ្រោះធ្ងន់ធ្ងរ។

អាជ្ញាធរខេត្តកោះកុងក៏បានអំពាវនាវដល់ប្រជាពលរដ្ឋរស់នៅតាមដៃព្រែក ស្ថិតក្នុងឃុំតាតៃក្រោម ស្រុកកោះកុង ខេត្តកោះកុង បង្កើនការប្រុងប្រយ័ត្នខ្ពស់ ជៀសវាងគ្រោះថ្នាក់ជាយថាហេតុ៕