សម្ដេចតេជោ ហ៊ុន សែន ចូលរួមប្រជុំអាស៊ានលើកដំបូង ជានាយករដ្ឋមន្ត្រីក្មេងជាងគេ រីឯសម្ដេចធិបតី ហ៊ុន ម៉ាណែត ក៏ដូចគ្នាដែរ

សម្ដេចតេជោ ហ៊ុន សែន បានឲ្យដឹងថា កាលពីពេលចូលរួមកិច្ចប្រជុំកំពូលអាស៊ានលើកដំបូង នៅឆ្នាំ ១៩៩៩ នៅប្រទេសហ្វីលីពីន សម្ដេច ជានាយករដ្ឋមន្ត្រី ដែលមានវ័យក្មេងជាងគេ ហើយនៅឆ្នាំ ២០២៣នេះ សម្ដេចធិបតី ហ៊ុន ម៉ាណែត ចូលរួមកិច្ចប្រជុំកំពូលអាស៊ានលើកដំបូង នៅប្រទេសឥណ្ឌូណេស៊ី ក៏ជានាយករដ្ឋមន្ត្រី ដែលក្មេងជាងគេផងដែរ។

តាមរយៈបណ្ដាញសង្គមតេលេក្រាម នាល្ងាចថ្ងៃទី ៥ ខែកញ្ញានេះ សម្ដេចតេជោ ហ៊ុន សែន បានសរសេរថា «ហាក់ដូចជាគាប់ជួន ឬទេវតារៀបចំ? កាលខ្ញុំចូលរួមប្រជុំអាស៊ានលើកដំបូងដែលជាការប្រជុំកំពូលអាស៊ានលើកទី ៣ នៅហ្វីលី ពីនឆ្នាំ ១៩៩៩ ខ្ញុំជានាយករដ្ឋមន្ត្រី ដែលមានវ័យក្មេងជាងគេ ក្នុងចំណោមប្រទេសអាស៊ាន ១០ គឺមានអាយុ ៤៧ឆ្នាំ»។

សម្ដេចតេជោ ហ៊ុន សែន បានសរសេរបន្តថា «ពេលនេះការប្រជុំកំពូលលើកទី ៤៣ ដែលឥណ្ឌូណេស៊ី ធ្វើជាម្ចាស់ផ្ទះ ហ៊ុន ម៉ាណែត គឺជានាយករដ្ឋមន្ត្រី ដែលក្មេងជាងគេក្នុងចំណោមប្រទេសអាស៊ាន ១១ រាប់ទាំងទីម័រខាងកើត។ ពេលនេះ ហ៊ុន ម៉ាណែត អាយុ ៤៥ឆ្នាំ»។

ជាមួយគ្នានេះ សម្ដេចតេជោ ហ៊ុន សែន ក៏បានជូនពរថ្នាក់ដឹកនាំអាស៊ាន ដែលជាមិត្តចាស់យូរឆ្នាំ និងក៏បានគោរពលាពីចម្ងាយ ផងដែរ៕