ព័ត៌មានជាតិ

ទោះបេសកកម្មជិះកង់សប្បុរសក្នុងទ្វីបអឺរ៉ុបចប់ តែលោក ផូ ផល្លា ស្នើមន្ទីរពេទ្យបន្តរៃអង្គាសថវិកា ដល់ថ្ងៃទី១០កញ្ញា

បានផុស

២ years មុន

នៅ

ថ្ងៃពុធ ៦ កញ្ញា ២០២៣

ដោយ

បេសកកម្មជិះកង់រយៈពេល ៤១ថ្ងៃ ចម្ងាយ ៣១០៤គីឡូម៉ែត្រ ឆ្លងកាត់ប្រទេសចំនួន៨ ក្នុងតំបន់អឺរ៉ុប បានបញ្ចប់ តែលោក ផូ ផល្លា បានស្នើបន្តបេសកកម្ម ដេីម្បីរៃអង្គាសប្រាក់ជូនមន្ទីរពេទ្យកុមារអង្គរ ខេត្តសៀមរាប ដល់ថ្ងៃទី១០ កញ្ញា ឆ្នាំ២០២៣ ដោយសារតែលោកចង់ឆ្លៀតរៃអង្គាសថវិកាបន្ថែម ក្នុងឱកាសពិព័រណ៌ម្ហូបខ្មែរ និងផលិតផលកសិកម្មខ្មែរ មុននឹងប្រកាសថវិកាសប្បុរសធម៌សរុប ក្នុងបេសកកម្មរបស់លោក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រោយបញ្ចប់បេសកកម្មជិះកង់សប្បុរស លោក ផូ ផល្លា បានរៀបរាប់ថា លោកបានចេញដំណេីរពីទីក្រុងប៉ារីស ជិះកង់ដោយសន្សឹមៗទៅតាមគោលដៅដែលបានកំណត់ ដោយភាពអំណត់អត់ធ្មត់ និងឆ្លងកាត់ឧបសគ្គជាច្រើន ដោយត្រូវជិះកាត់ថ្ងៃក្តៅ កាត់ភ្លៀង ទាំងយប់ទាំងថ្ងៃ ឆ្លងកាត់វាលស្រែ ព្រៃភ្នំ ស្ទឹង ទន្លេ សមុទ្រ ត្រូវជិះឡើងចុះភ្នំ និងស្ថានភាពផ្លូវដ៏លំបាកផ្សេងៗ រហូតមានពេលខ្លះ កង់ខូច ត្រូវដាច់ទឹក និងថែមទាំងត្រូវវង្វេងផ្លូវក៏មាន។ លោកថា “ប៉ុន្តែទោះយ៉ាងណា ទីបំផុត ខ្ញុំបានមកដល់គោលដៅចុងក្រោយ គឺទីក្រុង Frankfurt ប្រទេសអាល្លឺម៉ង់ ជាមួយនិងកង់ដែលផលិតនៅប្រទេសកម្ពុជា”។

លោក ផូ ផល្លា បញ្ជាក់ថា ដើមឡើយ កម្មវិធីជិះកង់រៃអង្គាសថវិកាជួយកុមារកម្ពុជានេះ គ្រោងបញ្ចប់ត្រឹមថ្ងៃទី០៣ ខែកញ្ញា ឆ្នាំ២០២៣ ប៉ុន្តែដោយសារនៅថ្ងៃទី៧-១០ កញ្ញា ឆ្នាំ២០២៣ នៅទីក្រុងប៉ារីស មានកម្មវិធីពិព័រណ៌ភូមិមុខម្ហូប អន្តរជាតិ ដូចនេះលោកចង់ឆ្លៀតយកឱកាសនេះ បន្តទទួលថវិកាបរិច្ចាគរបស់សប្បុរសជន ដែលទៅចូលរួមទស្សនាពិព័រណ៌ នាឱកាសនោះបន្ថែមទៀត។

លោកថា “ខ្ញុំនឹងធ្វេីបច្ចុប្បន្នភាពថវិកាដែលទទួលបានប្រចាំថ្ងៃ ចំពោះថវិកាសរុបដែលទទួលបានពីកម្មវិធីជិះកង់ទាំងមូល មន្ទីរពេទ្យនឹងជម្រាបជូននៅថ្ងៃទី១១ កញ្ញា ២០២៣”។

ឆ្លៀតក្នុងឱកាសនេះ ថ្លែងអំណរគុណយ៉ាងជ្រាលជ្រៅជូនចំពោះសប្បុរសជនទាំងអស់ ដែលបានចូលរួមបរិច្ចាគថវិកាជូន មន្ទីរពេទ្យកុមារអង្គរ និងអ្នកដែលបានអនុញ្ញាត្តផ្តល់កន្លែងស្នាក់នៅ និងអាហារដល់លោក ក៏ដូចជាអ្នកដែលចូលរួម ផ្សព្វផ្សាយការជិះកង់សប្បុរសនេះ៕