អ្នកនាំពាក្យរាជរដ្ឋាភិបាល ៖ មានក្រសួងភាគច្រើនហើយ បានរៀបចំរួចរាល់នូវការបែងចែកតួនាទីភារកិច្ច ជូនថ្នាក់ដឹកនាំ

អ្នកនាំពាក្យរាជរដ្ឋាភិបាល បានឲ្យដឹងថា មានក្រសួងភាគច្រើនហើយ បានរៀបចំរួចរាល់នូវការបែងចែកតួនាទីភារកិច្ច ជូនថ្នាក់ដឹកនាំជារដ្ឋលេខាធិការ និងអនុរដ្ឋលេខាធិការ បន្ទាប់ពីមានការណែនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា កាលពីចុងសប្ដាហ៍មុនមក។

កាលពីថ្ងៃទី ៣ ខែកញ្ញា ឆ្នាំ ២០២៣កន្លងទៅនេះ សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានចេញសារជាសំឡេងមួយ ដោយបានណែនាំឲ្យរដ្ឋមន្រ្តីតាមបណ្តាក្រសួង ដែលមិនទាន់បែងចែកតួនាទីភារកិច្ចជូនថ្នាក់ដឹកនាំជារដ្ឋលេខាធិការ និងអនុរដ្ឋលេខាធិការ ត្រូវប្រញាប់បែងចែកតួនាទីភារកិច្ចឲ្យបានរួចរាល់ក្នុងសប្ដាហ៍នេះ ដើម្បីធានាដល់និរន្តរភាព និងចីរភាព ទាំងលើការងារដឹកនាំ និងការអនុវត្តការងាររបស់ក្រសួង។

លោក ប៉ែន បូណា រដ្ឋមន្រ្តីប្រតិភូអមនាយករដ្ឋមន្រ្តី និងជាប្រធានអង្គភាពអ្នកនាំពាក្យរាជរដ្ឋាភិបាល មានប្រសាសន៍ប្រាប់កម្ពុជាថ្មី នៅថ្ងៃទី ៦ ខែកញ្ញានេះថា បន្ទាប់ពីមានការណែនាំរបស់សម្ដេចធិបតីនាយករដ្ឋមន្ត្រី កាលពីសប្ដាហ៍មុនមក គឺក្រសួងនីមួយៗ បានខិតខំធ្វើកិច្ចការងារនេះ។ ក្នុងនោះដែរមានក្រសួងភាគច្រើនហើយ បានប្រកាសចេញសេចក្ដីសម្រេចបែងចែកតួនាទីភារកិច្ច ជូនថ្នាក់ដឹកនាំជារដ្ឋលេខាធិការ និងអនុរដ្ឋលេខាធិការ ជាបន្តបន្ទាប់ហើយដែរ។

លោកកត់សម្គាល់បែបនេះថា «ទាក់ទងទៅនឹងការណែនាំរបស់សម្ដេចធិបតីនាយករដ្ឋមន្ត្រី ដែលឲ្យក្រសួងនីមួយៗ បែងចែកការងារដល់មន្ត្រីឲ្យចប់រួចរាល់ហ្នឹង យើងឃើញថា ឥឡូវនេះក្រសួងនីមួយៗហ្នឹង បានខិតខំធ្វើកិច្ចការងារហ្នឹងយ៉ាងខ្លាំង ហើយមានក្រសួងជាច្រើនបានប្រកាសចេញជាបន្តបន្ទាប់ហើយថា គាត់ធ្វើរួចរាល់ហើយ»។

បន្ថែមពីលើនេះ លោករដ្ឋមន្រ្តីប្រតិភូអមនាយករដ្ឋមន្រ្តី ជឿជាក់ថា គ្រប់ក្រសួងទាំងអស់ ​នឹងបញ្ចប់ការបែងចែកការងារដល់មន្ត្រីរបស់ខ្លួន ក្នុងសប្ដាហ៍នេះ តាមការចង់បានរបស់សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដើម្បីរៀបចំការងារ និងដំណើរការរបស់ក្រសួងនីមួយៗ ប្រកបដោយប្រសិទ្ធភាព៕