កសិករអាចរកចំណូលពីការដាំបន្លែធម្មជាតិបានសមរម្យទោះស្ថិតក្នុងវិបត្តិសេដ្ឋកិច្ច

ប្រជាកសិករដាំបន្លែរស់នៅក្នុងភូមិសាមឃួយ ឃុំសាមឃួយ ស្រុកសេសាន ខេត្តស្ទឹងត្រែង នៅតែបន្តដាំបន្លែទោះសេដ្ឋកិច្ចកំពុងមានការធ្លាក់ចុះយ៉ាងណាក៏ដោយក៏ពួកគាត់នៅតែអាចរកប្រាក់ចំណូលពីការដាំបន្លែធម្មជាតិ ដើម្បីរកប្រាក់ចំណូលផ្គត់ផ្គង់គ្រួសារបានសមរម្យផងដែរ។

លោកស្រី ខាវ ខាំអន មេឃុំសាមឃួយបានបញ្ជាក់ថា មុខរបរដាំបន្លែនេះ កសិករពួកគាត់បាន​ដាំជា​ច្រើន​ឆ្នាំមកហើយ ដោយសារបន្លែទាំងនេះគឺជាទីពេញនិយមរបស់អ្នកបរិភោគ ភាគច្រើនៅតាម រមណីយដ្ឋាន ភោជនីយដ្ឋាននានា និងនៅទីផ្សារក្រុងស្ទឹងត្រែង ទិញយកទៅលក់បន្ត​អាចកា​មង់បានដោយសារបន្លែទាំងនេះមិនប្រើប្រាស់សារធាតុគីមី គឺប្រើប្រាស់ជីធម្មជាតិដូចជាជីលា​មកសត្វ និងអង្កាមដុត រួមទាំងជីកំប៉ុស។

លោកស្រីបានបន្តទៀតថា កសិករបានប្រាប់ពីមូលហេតុនៃការដាំបន្លែនៅក្នុងរោងសំណាញ់លើធ្នើរ ព្រោះមានភាពងាយស្រួលក្នុងការដាំដុះថែទាំ សំអាតយកស្មៅ និងគ្រប់គ្រងជីបានយូរ រួមទាំងការពារសត្វល្អិតបានយ៉ាងល្អប្រសើរទៀតផង ចំពោះការដាំផ្ទាល់ដី សត្វល្អិត ដង្កូវ ស្រមោច ចង្រិត រួមទាំងសត្រូវជាច្រើនទៀត វាមកបំផ្លាញដំណាំ និងត្រូវធ្វើរោងសម្រាប់គ្របពីលើរងដំណាំ ដើម្បីកាត់បន្ថយកម្ដៅ។

លោកស្រីថា កសិករនៅក្នុងឃុំរបស់គាត់ជាច្រើនគ្រួសារនិយមដាំបន្លែលើធ្នើរ រោងសំណាញ់ឬលើករងឱ្យខ្ពស់ភាគច្រើនជាបន្លែ ស្ពៃ សាឡាត់ ខាត់ណា សំដែកគួរ ត្រប់វែង ប៉េងប៉ោះ ម្រះជាដើម។

លោកថាទោះជាសេដ្ឋកិច្ចកំពុងធ្លាក់ចុះពិបាករកប្រាក់យ៉ាងណាក៏ដោយក៏ប្រជាកសិករក្នុងឃុំនេះនៅតែអាចរកប្រាក់ចំណូលបានពីការលក់ បន្លែដើម្បីដោះស្រាយជីវភាព បានសមរម្យថែមមួយកម្រិតទៀតផងដែរ។

សូមបញ្ចាក់ថា៖ នៅក្នុងឃុំសាមឃួយមានកសិករប្រមាណ៨៥%បន្ទាប់ពីធ្វើស្រែចំការបានដាំបន្លែបង្ការនិងចិញ្ចឹមសត្វជាលក្ខគ្រួសារ ក្រៅពីនោះប្រកបរបរលក់ដូររកប្រាក់ចំណូលសម្រាប់ដោះស្រាយជីវភាព ដែលជាផ្នែកមួយបានកាត់បន្ថយ ការចំណាកស្រុក ការពឹងផ្អែកទៅលើផលអនុផលព្រៃឈើ និងការចុះទូកធ្វើនេសាទដែលនាំឱ្យមានហានិភ័យខ្ពស់៕

អត្ថបទ៖ ងិនលីម