មន្ត្រីជាន់ខ្ពស់ក្រសួងវប្បធម៌ ធ្វើជាវាគ្មិនក្នុងវេទិកាអាស៊ាន-ឥណ្ឌូប៉ាស៊ីហ្វិក

តាងនាម បណ្ឌិតសភាចារ្យរដ្ឋមន្ត្រី លោកស្រី ប៉ែន មុនីមករា រដ្ឋលេខាធិការ និងជាប្រធានឧត្តមមន្ត្រីអាស៊ានទទួលបន្ទុកវប្បធម៌ និងសិល្បៈកម្ពុជា បានអញ្ជើញចូលរួមជាវាគ្មិនក្នុងបទអន្តរាគមន៍គន្លឹះក្នុងវេទិកាអាស៊ាន-ឥណ្ឌូប៉ាស៊ីហ្វិក ក្រោមប្រធានបទ៖ “ការអនុវត្តទស្សនវិស័យអាស៊ានស្តីពីឥណ្ឌូ-ប៉ាស៊ីហ្វិក” នៅសណ្ឋាគារ Mulia នាទីក្រុងហ្សាកាតា សាធារណរដ្ឋឥណ្ឌូនេស៊ី។ នេះបើតាមការផ្ដល់ព័ត៌មានពី ក្រសួងវប្បធម៌ និងវិចិត្រសិល្បៈ នៅថ្ងៃទី៧ ខែកញ្ញា ឆ្នាំ២០២៣ នេះ។

វេទិកានេះ ធ្វើឡើងនៅថ្ងៃទី៦ ខែកញ្ញា ឆ្នាំ២០២៣ ក្នុងទម្រង់ពិភាក្សាជាក្រុម ដោយមានវាគ្មិនចំនួន ១២រូប ចូលរួមធ្វើបទបង្ហាញ ក៏ដូចជាធ្វើការពិភាក្សាលើប្រធានបទចំនួន ៤ គឺ ១. ហេដ្ឋារចនាសម្ព័ន្ធបៃតង និងសង្វាក់ផ្គត់ផ្គង់រឹងមាំ ២. ការផ្លាស់ប្តូរឌីជីថល និងសេដ្ឋកិច្ចច្នៃប្រឌិតប្រកបដោយបរិយាប័ន្ន ៣. ហិរញ្ញវត្ថុប្រកបដោយចីរភាពនិងច្នៃប្រឌិត និង ៤. សេដ្ឋកិច្ចច្នៃប្រឌិត។

ក្នុងនាមជាវាគ្មិនតំណាង ផ្នែកវប្បធម៌ និងសិល្បៈកម្ពុជា លោកស្រីរដ្ឋលេខាធិការ បានធ្វើបទបង្ហាញ ស្តីពី “ការកសាងប្រព័ន្ធអេកូសេដ្ឋកិច្ចច្នៃប្រឌិតដែលប្រកបដោយបរិយាប័ន្ន (Building and Inclusive Creative Economy Ecosystem)”។

គួរបញ្ជាក់ថា វេទិកាដ៏មានសារៈសំខាន់នេះ គឺជាផ្នែកមួយ នៃកិច្ចប្រជុំកំពូលអាស៊ានលើកទី៤៣ និងកិច្ចប្រជុំកំពូលពាក់ព័ន្ធ ដែលប្រទេសឥណ្ឌូនេស៊ីធ្វើជាម្ចាស់ផ្ទះ៕