ប្រតិភូចិន នឹងមកផ្លាស់ប្តូរបទពិសោធន៍ការប្រឆាំងអំពើពុករលួយអន្តរជាតិជាមួយកម្ពុជា

គណៈប្រតិភូគណៈកម្មការត្រួតពិនិត្យកិច្ចការនៃបក្សកុម្មុយនិស្តចិន ខេត្តហឺណាន នឹងមកបំពេញទស្សនកិច្ចផ្លូវការនៅកម្ពុជា ដើម្បីពង្រឹងកិច្ចសហប្រតិបត្តិការ និងការផ្លាស់ប្តូរបទពិសោធន៍ក្នុងការប្រយុទ្ធប្រឆាំងអំពើពុករលួយអន្តរជាតិជាមួយអង្គភាពប្រឆាំងអំពើពុករលួយ។

លោកស្រី Qu Xiaoli សមាជិកគណៈកម្មាធិការអចិន្ត្រៃយ៍នៃគណៈកម្មាធិការបក្សកុម្មុយនិស្តចិន ខេត្តហឺណាន និងជាប្រធានគណៈកម្មការត្រួតពិនិត្យកិច្ចការ ខេត្តហឺណាន នឹងដឹកនាំសមាជិកគណៈប្រតិភូចំនួន ៥រូប មកបំពេញទស្សនកិច្ចផ្លូវការនៅអង្គភាពប្រឆាំងអំពើពុករលួយ និងស្ថាប័នពាក់ព័ន្ធមួយចំនួនរបស់កម្ពុជា។ ដំណើរទស្សនកិច្ចនេះ តបតាមការអញ្ជើញរបស់លោកទេសរដ្ឋមន្ត្រី ឱម យ៉ិនទៀង ប្រធានអង្គភាពប្រឆាំងអំពើពុករលួយ។  

បើតាមសេចក្ដីប្រកាសព័ត៌មានរបស់អង្គភាពប្រឆាំងអំពើពុករលួយ គណៈប្រតិភូគណៈកម្មការត្រួតពិនិត្យកិច្ចការនៃបក្សកុម្មុយនិស្តចិន នឹងចាប់ពីថ្ងៃទី១០ ដល់ថ្ងៃទី១២ ខែកញ្ញា ឆ្នាំ២០២៣។ ក្នុងដំណើរទស្សនកិច្ចនេះ គណៈប្រតិភូចិន នឹង ជួបពិភាក្សាការងារជាមួយលោកទេសរដ្ឋមន្ត្រី ឱម យ៉ិនទៀង ដោយផ្ដោតការពិភាក្សាលើការពង្រឹងកិច្ចសហប្រតិបត្តិការ ឱ្យកាន់តែស៊ីជម្រៅ ពង្រឹងការផ្លាស់ប្តូរបទពិសោធន៍ការប្រយុទ្ធប្រឆាំងអំពើពុករលួយអន្តរជាតិ ក៏ដូចជាពង្រីកបណ្តាញស្វែងរកជនរត់គេចខ្លួន និងប្រមូលទ្រព្យសម្បត្តិ ដែលត្រូវបានលួចត្រឡប់មកវិញ។

ជាមួយគ្នានេះ គណៈប្រតិភូចិន ក៏នឹងធ្វើទស្សនកិច្ចផ្លូវការទៅកាន់ខេត្តសៀមរាប ដោយមានជំនួបពិភាក្សាការងារជាមួយលោកអភិបាលខេត្តសៀមរាប និងប្រធានមន្ទីរទំនាក់ទំនងរដ្ឋសភា-ព្រឹទ្ធសភា និងអធិការកិច្ច ខេត្តសៀមរាប ផងដែរ។នេះជាដំណើរទស្សនកិច្ចលើកទី២ ហើយរបស់គណៈប្រតិភូខេត្តហឺណាន ដែលមកបំពេញទស្សនកិច្ចនៅកម្ពុជា ខណៈលើកទី១ កាលពីឆ្នាំ២០១៨៕