មន្ទីរកិច្ចការនារីខេត្តក្រចេះ ចងក្រងសហគមន៍ ស្រ្តីផលិតក្រឡាន ដើម្បីជួយស្រ្តីឲ្យមានការងារធ្វើ

មន្ទីរកិច្ចការនារីខេត្តក្រចេះ បានរួមចំណែកផ្តល់ជាគំនិត និងធាតុចូលមួយចំនួន ដើម្បីចងក្រងសហគមន៍ស្រ្តីផលិតក្រឡាន ក្នុងគោលបំណងជួយដល់ស្រ្តី ពិសេស ស្រ្តីមេម៉ាយ ស្រ្តីក្រីក្រ និងស្រ្តីចាស់ៗ អាចមានការងារធ្វើ និងមានប្រាក់ចំណូលអាចជួយសេដ្ឋកិច្ចគ្រួសារបានបន្ថែមទៀត ក្រៅពីការងារកសិកម្ម និងអាចកាត់បន្ថយការធ្វើចំណាកស្រុក។ នេះបើតាមការឲ្យដឹងរបស់ក្រសួងកិច្ចការនារី កាលពីសប្តាហ៍មុន។

អ្នកស្រី អ៊ឹម ណារី ជាស្រ្តីមេម៉ាយម្នាក់ដែលរស់នៅ ឃ្មុំថ្មគ្រែលើ ស្រុកចិត្តបុរី ខេត្តក្រចេះ បានលើកឡើងថា អ្នកស្រី ពិតជាសប្បាយចិត្តខ្លាំងណាស់ ដែលមានសហគមន៍ផលិតក្រឡាននេះ ព្រោះថាចាប់តាំងពីប្តីអ្នកស្រីស្លាប់ទៅ អ្នកស្រីមិនមានលទ្ធភាពក្នុងការផលិតក្រឡានដោយខ្លួនឯងបានទេ ព្រោះការផលិតក្រឡានត្រូវការចំណាយពេល កម្លាំង និងដើមទុនច្រើនក្នុងការធ្វើវា។ អ្នកស្រីថា៖ «យើងត្រូវចំណាយកម្លាំងក្នុងការទៅកាប់បំពង់ឬស្សី ចំណាយកម្លាំង ដើម្បីសកបំពង់ឬស្សី ចំណាយកម្លាំងរលីងដូង និងកោសដូង និងចំណាយកម្លាំងដុតទៀតផង យ៉ាងហោចណាស់យើងក៏ត្រូវមានមនុស្ស៣ទៅ៤នាក់ដែរ បានអាចធ្វើទៅបានតាមតម្រូវការ និងទាន់ទីផ្សារគេ»។

អ្នកស្រី អ៊ឹម ណារី បានបន្តទៀតថា សព្វថ្ងៃអ្នកស្រីធ្វើការឲ្យសហគមន៍ផលិតក្រឡាន ដោយធ្វើតែលើផ្នែករលីង និងកោសដូង ប៉ុណ្ណោះ ក្នុងមួយថ្ងៃអ្នកស្រីអាចរកប្រាក់ចំណូលបានពី៤០០០០រៀល ទៅ៥០០០០រៀល ដោយមិនបាច់ចំណាយដើមទុន ហើយមានពេលច្រើនអាចធ្វើការងារផ្ទះ និងមើលថែទាំកូនចៅទៀតផង។

ក្រសួងកិច្ចការនារី និងមន្ទីរកិច្ចការនារី គឺជាយន្តការសម្រាប់ជម្រុញ និងលើកកម្ពស់សមភាពយេនឌ័រ និងបរិយាបន្ន ការបង្កើនភាពអង់អាចផ្នែកសេដ្ឋកិច្ចដល់ស្រ្តី។ មន្ទីរបានដើរតួយ៉ាងសំខាន់ក្នុងការជំរុញស្វែងរកការគាំទ្រមតិ ការទំនាក់ទំនង និងការសម្របសម្រួលដល់មន្ទីរពាក់ពន្ធ័និងដៃគូរអភិវឌ្ឍន៍ ដើម្បីបង្កើនការចូលរួមរបស់ស្រ្តីលើវិស័យសេដ្ឋកិច្ច។ ក្រសួងកិច្ចការនារី និងមន្ទីរកិច្ចការនារី បានធ្វើការងារពង្រឹងផ្នែកសេដ្ឋកិច្ចរបស់ស្រ្តី តាមរយៈការលើកកម្ពស់ការធ្វើអាជីវកម្មខ្នាតតូច ផ្តល់ការបណ្តុះបណ្តាលជំនាញវិជ្ជាជីវៈដល់ស្រ្តី អប់រំផ្សព្វផ្សាយដល់ស្រ្តីឲ្យចេះធ្វើការសម្របខ្លួនទៅនិងការប្រែប្រួលអាកាសធាតុ ជំរុញនិងបង្កើនការដាំដុះ ដើម្បីកាត់បន្ថយការចំណាយ៕​