ព័ត៌មានជាតិ

ឡើងដឹកនាំក្រុមប្រឹក្សាអភិវឌ្ឍន៍កម្ពុជា លោក ស៊ុន ចាន់ថុល ផ្តើមទស្សនកិច្ចនៅតំបន់សេដ្ឋកិច្ចពិសេសខេត្តព្រះសីហនុ

បានផុស

១ year មុន

នៅ

ថ្ងៃចន្ទ ១១ កញ្ញា ២០២៣

ដោយ

ក្រោយទទួលបានការតែងតាំងដឹកនាំនៅក្រុមប្រឹក្សាររភិវឌ្ឍន៍កម្ពុជា លោក ស៊ុន ចាន់ថុល បានផ្តើមដំណើរទស្សនកិច្ចនៅតំបន់សេដ្ឋកិច្ចពិសេសនៅក្នុងខេត្តព្រះសីហនុ ដើម្បីពិនិត្យមើលពីវឌ្ឍនភាពនៃការអភិវឌ្ឍ និងស្វែងយល់ពីបញ្ហាប្រឈមនានា។

កាលពីព្រឹកថ្ងៃទី១១ ខែកញ្ញា ឆ្នាំ២០២៣ លោកស៊ុន ចាន់ថុល អមដំណើរដោយលោក ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា បានចុះទៅបំពេញទស្សនកិច្ចពិនិត្យវឌ្ឍនភាពនៃការអភិវឌ្ឍតំបន់សេដ្ឋកិច្ចពិសេសក្នុងខេត្តព្រះសីហនុ។

ក្នុងដំណើរទស្សនកិច្ចលោក ស៊ុន ចាន់ថុល បានចុះពិនិត្យវឌ្ឍនភាពនិងស្វែងយល់ពីបញ្ហាប្រឈមព្រមទាំងរកដំណោះស្រាយសមស្របជូនក្រុមហ៊ុនដែលកំពុងវិនិយោគនៅតំបន់សេដ្ឋកិច្ចពិសេសខេត្តព្រះសីហនុ ។

គួរបញ្ចាក់ថា នីតិកាលទី ៧ នៃរាជរដ្ឋាភិបាល លោកឧបនាយករដ្ឋមន្ត្រី ស៊ុន ចាន់ថុល ត្រូវទទួលភារកិច្ចជួយនាយករដ្ឋមន្ត្រីលើការងារទាក់ទាញការវិនិយោគឯកជន។ លោកក៏ទទួលបានការតែងតាំងជាអនុប្រធានទី១ នៃក្រុមប្រឹក្សាររភិវឌ្ឍន៍កម្ពុជា ជាសហប្រធានខាងភាគីកម្ពុជានៃគណៈកម្មាធិការសម្របសម្រួលអន្តររដ្ឋាភិបាលកម្ពុជា-ចិន ដើម្បីអនុវត្តកិច្ចសហប្រតិបត្តិការភាពជាដៃគូយុទ្ធសាស្ត្រគ្រប់ជ្រុងជ្រោយ។

អតីតរដ្ឋមន្រ្តីក្រសួងសាធារណការនិងដឹកជញ្ជូនរូបនេះ ក៏ទទួលបន្ទុកជួយនាយករដ្ឋមន្ត្រីលើការងារគមនាគមន៍ដឹកជញ្ជូននិងភស្តុភារកម្ម ទាំងការដឹកជញ្ជូនផ្លូវគោក ផ្លូវទឹក និងផ្លូវអាកាស។

ជាមួយគ្នានេះ លោកក៏ជាប្រធានក្រុមប្រឹក្សាជាតិភស្តុភារកម្ម ព្រមទាំងទទួលបន្ទុកអនុវត្តការងារពិសេសនិងបេសកកម្មពិសេសផ្សេងទៀតដែលនាយករដ្ឋមន្ត្រីប្រគល់ជូន៕