ព័ត៌មានជាតិ

ឯកឧត្ដម ហ៊ុន ម៉ានី ៖ កំណែទម្រង់ការប្រឡងក្របខណ្ឌមន្ត្រីរាជការ មិនចាំបាច់ស្គាល់អ្នកធំ ឬ មានខ្សែអ្វីទេ តែត្រូវមានសមត្ថភាព

បានផុស

១ year មុន

នៅ

ថ្ងៃចន្ទ ១១ កញ្ញា ២០២៣

ដោយ

ឯកឧត្ដម ហ៊ុន ម៉ានី រដ្ឋមន្ត្រីក្រសួងមុខងារសាធារណៈ បញ្ជាក់ចំពោះកំណែទម្រង់ការប្រឡងក្របខណ្ឌមន្ត្រីរាជការ គឺ មិនចាំបាច់ស្គាល់អ្នកធំ ឬ មានខ្សែអ្វីទេ តែត្រូវមានសមត្ថភាពយ៉ាងពិតប្រាកដ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឯកឧត្ដម ហ៊ុន ម៉ានី រដ្ឋមន្ត្រីក្រសួងមុខងារសាធារណៈ បញ្ជាក់បែបនេះ ក្នុងឱកាសអញ្ជើញចូលរួមក្នុងពិធីសំណេះ សំណាលជាមួយថ្នាក់ដឹកនាំ និងមន្ត្រីរាជការសាលាភូមិន្ទរដ្ឋបាល នៅថ្ងៃទី ១១ ខែកញ្ញា ឆ្នាំ ២០២៣ នេះ។

នាឱកាសនោះ ឯកឧត្ដម ហ៊ុន ម៉ានី បានបញ្ជាក់យ៉ាងម៉ឺងម៉ាត់ថា «កំណែទម្រង់ការប្រឡងក្របខណ្ឌមន្ត្រីរាជការ ៖ «មិនចាំបាច់ត្រូវស្គាល់អ្នកធំ មិនចាំបាច់ត្រូវមានខ្សែ តែត្រូវមានសមត្ថភាព»។

ឯកឧត្ដម ហ៊ុន ម៉ានី បន្ថែមថា ឯកឧត្ដម មានតួនាទី និងទំនួលខុសត្រូវខ្ពស់ចំពោះ សម្ដេចមហាបវរធិបតី នាយករដ្ឋមន្ត្រី ក្នុងនាមជារដ្ឋមន្ត្រីក្រសួងមុខងារសាធារណៈ នៅក្នុងការសម្រេចកិច្ចការកែទម្រង់លើការប្រឡងនេះឲ្យបានហ្មត់ចត់ជាទីបំផុត ជាពិសេសក្នុងគោលដៅ ដើម្បីសមធម៌ និងយុត្តិធម៌សង្គម។

គួរជម្រាបថា កាលពីថ្ងៃទី ០៩ ខែកញ្ញា ឆ្នាំ ២០២៣ កន្លងទៅ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានលើកឡើងថា នឹងរៀបចំយន្តការថ្នាក់ជាតិមួយ ដោយរៀបចំឲ្យមានការប្រលងយន្តការថ្នាក់កណ្ដាល ដែលសហការជាមួយក្រសួងជំនាញ ដើម្បីធានាឲ្យបាននូវសង្គតភាព ភាពត្រឹមត្រូវ តម្លាភាព និងយុត្តិធម៌ ហើយធានាឲ្យបានអ្នកចេះគឺជាប់។

ថ្លែងក្នុងពិធីសំណេះសំណាលជាមួយកម្មករនិយោជិត ស្ថិតនៅភូមិរំដួល ឃុំត្រពាំងគង ស្រុកសំរោងទង ខេត្តកំពង់ស្ពឺ សម្ដេច បានអំពាវនាវបន្ថែមទៀតថា «ដើម្បីឲ្យកិច្ចការកំណែទម្រង់មានប្រសិទ្ធភាព ត្រូវមានការដាច់ខាត ប្ដេជ្ញាធ្វើទាំងអស់គ្នា ហើយបង្ហាញឲ្យឃើញពីឆន្ទៈ និងការខិតខំប្រឹងប្រែង ប្ដេជ្ញាចិត្តខ្ពស់ក្នុងការធ្វើ ហ៊ានអារកាត់ ហ៊ានវះកាត់ ហើយជាពិសេសហ៊ានអនុវត្តគោលនយោបាយដែលរាជរដ្ឋាភិបាលបានសម្រេច»។

ក្នុងនាមជារដ្ឋមន្ត្រីក្រសួងមុខងារសាធារណៈ ឯកឧត្ដម ហ៊ុន ម៉ានី ពិតជាមានសេចក្ដីរីករាយ និងមានកិត្តិយស ដោយបានក្លាយជាផ្នែកមួយ ក្នុងនាមជាសេនាធិការរាជរដ្ឋាភិបាល ដើម្បីចូលរួមក្នុងកិច្ចការកំណែទម្រង់វិស័យមុខងារសាធារណៈ។ ក្នុងន័យនេះ ឯកឧត្ដម ហ៊ុន ម៉ានី សូមគាំទ្រឥតងាករេលើប្រសាសន៍ និងគោលការណ៍នយោបាយរបស់រាជរដ្ឋាភិបាល ក្នុងការកែទម្រង់វិស័យមុខងារសាធារណៈ និងធ្វើយ៉ាងណាខិតខំប្រឹងប្រែងពន្លឿនយន្តការដ៏មានសារៈសំខាន់នេះ ឲ្យសម្រេចបានកាន់តែឆាប់រហ័ស៕

អត្ថបទ ៖ ពិសី