៣០ ឆ្នាំចុងក្រោយ ឥស្សរជនចំនួន១៤រូប  ទទួលបានគោរមងារជា “សម្ដេច”

ចាប់តាំងពីឆ្នាំ១៩៩៣ រហូតមកដល់ឆ្នាំ ២០២៣នេះ មានឥស្សរជនចំនួន១៤រូប  ដែលពោរពេញដោយចំណេះដឹង សមត្ថភាពបំពេញការងារ ព្រមទាំងបានលះបង់ក​ម្លាំងកាយ ប្ដូរជីវិត ដើម្បីបុព្វហេតុសន្តិសុខ សុវត្ថិភាព ស្ថិរភាព សន្តិភាព​ ការអភិវឌ្ឍជាតិ ត្រូវបានព្រះមហាក្សត្រនៃក​ម្ពុជា ទ្រង់ប្រទានគោរមងារជា “សម្ដេច”។

“កម្ពុជាថ្មី” សូមជម្រាបជូនអំពីឥស្សរជនចំនួន១៤រូប ដែលទទួលបានគោរមងារជា សម្ដេច ដូចតទៅ៖

១/ សម្ដេចអគ្គមហាធម្មពោធិសាល ជា ស៊ីម អតីតប្រធានព្រឹទ្ធសភា

នៅឆ្នាំ២០០៧  សម្ដេចព្រះបរមនាថ នរោត្ដម សីហមុនី ទ្រង់ប្រទានគោរមងារជូនដល់សម្ដេច ជា ស៊ីមកូនអ្នកស្រុករមាសហែកខេត្តស្វាយរៀង ជា «សម្ដេចអគ្គមហាធម្មពោធិសាល»។    សម្ដេច ជា ស៊ីម បានទទួលមរណភាពនៅថ្ងៃទី​ ០៨ ខែមិថុនា ឆ្នាំ២០១៥ ក្នុងជន្មាយុ ៨៣ឆ្នាំ ដោយជរាពាធ។

២/សម្ដេចអគ្គមហាពញាចក្រី ហេង សំរិន អតីតប្រធានរដ្ឋសភា

សម្ដេចព្រះបរមនាថ នរោត្ដម សីហមុនី ទ្រង់ប្រទានគោរមងារជូនដល់សម្ដេច ​ហេង សំរិន កូនអ្នកខេត្តព្រៃវែងជា  ​«សម្ដេច​អគ្គ​មហា​ពញា​ចក្រី» ​ នៅខែតុលាឆ្នាំ ២០០៧។

៣/សម្ដេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រីកម្ពុជា​

កើតចេញពីគ្រួសារ ក្នុងស្រុកស្ទឹងត្រង់ ខេត្តកំពង់ចាម នៅថ្ងៃទី ១២ តុលា ឆ្នាំ ២០០៧  សម្តេចព្រះបរមនាថ នរោត្តម សីហមុនី ទ្រង់ប្រទានគោរមងារជា «សម្តេចអគ្គមហាសេនាបតីតេជោ »។

៤/សម្ដេចចៅហ្វាវាំង វរវៀងជ័យ អធិបតីស្រឹង្គា គង់ សំអុល រដ្ឋមន្ត្រីក្រសួងព្រះបរមរាជវាំង

៥/សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា

ភរិយារបស់សម្ដេចតេជោហ៊ុន សែន ត្រូវបានព្រះមហាក្សត្រប្រទានគោរម្យជា «សម្ដេចកិត្តិព្រឹទ្ធបណ្ឌិត  នៅ​ព្រឹក​ថ្ងៃ​ទី​៨ ខែ​ឧសភា ឆ្នាំ​២០១៣ ​ចំ​ថ្ងៃ​ដែល​កាកបាទ​ក្រហម​កម្ពុជា បាន​ប្រារព្ធ​ទិវា​កាកបាទ​ក្រហម អឌ្ឍចន្ទ​ក្រហម ខួប​លើក​ទី​១៥០។

៦/សម្ដេច វិបុលសេនាភក្ដី សាយ ឈុំ ប្រធានព្រឹទ្ធសភា

ព្រះបាទ សម្ដេច​ព្រះ​បរមនាថ នរោត្តម សីហមុនី ទ្រង់បានប្រទានគោរមងារដល់ សម្ដេច សាយ ឈុំ កូនអ្នកខេត្តកំពង់ចាម ជា «សម្ដេច វិបុលសេនាភក្ដី» នៅថ្ងៃទី១៤ខែមិថុនាឆ្នាំ ២០១៥។

៧/សម្ដេចក្រឡាហោម ស ខេង អតីតឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ

ព្រះបាទ សម្ដេច​ព្រះ​បរមនាថ នរោត្តម សីហមុនី ទ្រង់បានប្រទានគោរមងារដល់ ​សម្ដេច ស ខេង  ជា «សម្ដេចក្រឡាហោម» នៅថ្ងៃទី១៤ខែមិថុនាឆ្នាំ ២០១៥ ក្នុងថ្ងៃដំណាលគ្នាជាមួយ សម្ដេចវិបុលសេនាភក្ដី សាយ ឈុំ ។

៨/សម្ដេច វិបុលបញ្ញា សុខ អាន អតីតឧបនាយករដ្ឋមន្ត្រី រដ្ឋមន្ត្រីទីស្ដីការគណៈរដ្ឋមន្ត្រី

មានដើមកំណើតនៅស្រុកគិរីវង់ ខេត្តតាកែវ សម្ដេចសុខ អាន ត្រូវបាន ព្រះបាទ សម្ដេច​ព្រះ​បរមនាថ នរោត្តម សីហមុនី ទ្រង់ប្រទានគោរមងារដល់ សម្ដេច សុខ អាន ជា «សម្ដេច វិបុលបញ្ញា» នៅថ្ងៃទី១៣ខែមិនាឆ្នាំ ២០១៧។  យ៉ាងណាក្រោយទទួលបានគោរមងារនេះ បានតែពីរថ្ងៃប៉ុណ្ណោះ សម្ដេចវិបុលបញ្ញាសុខអាន បានទទួលមរណៈភាព ដោយរោគាពាធ នៅលើទឹកដីនៃទីក្រុងប៉េកាំង ប្រទេសចិន។

៩/សម្ដេចពិជ័យ សេនា ទៀ បាញ់ អតីតឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ

ជាកូនកសិករក្រីក្រ កើត​នៅស្រុក​កោះកុង ខេត្ត​កោះកុង សម្ដេច ទៀ បាញ់ ត្រូវបានព្រះមហាក្សត្រប្រទានគោរមងារជា «សម្ដេចពិជ័យសេនា» ​នៅ​ថ្ងៃទី​២៩ ខែកក្កដា ឆ្នាំ​២០១៧​​។

១០/សម្ដេច​ធម្មវិសុទ្ធវង្សា សៅ ទី ហេង សំរិន ភរិយា សម្ដេចអគ្គមហាពញាចក្រី ហេង សំរិន

ព្រះមហាក្សត្រនៃកម្ពុជានៅថ្ងៃទី​២៣​ខែមករា​ឆ្នាំ​២០២០ ទ្រង់ប្រទានគោរម្យជា «សម្ដេច​ធម្មវិសុទ្ធវង្សា» ជូនដល់ សម្ដេច សៅ ទី ហេង​សំរិន ។

១១/សម្ដេចឧត្ដមទេពញាណ ហ៊ុន​ ណេង

បងប្រុសរបស់សម្ដេចតេជោ ហ៊ុន សែន​ ត្រូវបានព្រះមហាក្សត្រនៃកម្ពុជា ទ្រង់ប្រទានគោរម្យជា «សម្ដេចឧត្ដមទេព ញាណ» នៅថ្ងៃទី ០៧ខែឧសភាឆ្នាំ២០២២។ ព្រះមហាក្សត្រទ្រង់ប្រទានគោរមងារជា សម្ដេចឧត្ដមទេពញាណ នេះ ក្រោយពេលសម្ដេច ហ៊ុន ណេង​ ទទួលមរណភាពបានចំនួន២ថ្ងៃ(សម្ដេច ហ៊ុន ណេង ទទួលមរណភាពថ្ងៃទី ០៥​ ខែឧសភា ឆ្នាំ ២០២៣)។

១២/សម្ដេចកិត្តិសង្គហបណ្ឌិត ម៉ែន សំអន អតីតឧបនាយករដ្ឋមន្ត្រី រដ្ឋមន្រ្តីក្រសួងទំនាក់ទំនងរដ្ឋសភា ព្រឹទ្ធសភា​ និងអធិការកិច្ច

កើតនៅឃុំ​សំបួរ ស្រុក​សំបូរ ខេត្ត​ក្រចេះ សម្ដេច ម៉ែន សំអន ត្រូវបាន សម្តេចព្រះបរមនាថ នរោត្តម សីហមុនី ទ្រង់ប្រទានគោរមងារជា «សម្ដេចកិត្តិសង្គហបណ្ឌិត» នៅថ្ងៃទី ០៨ ខែមេសា​ ឆ្នាំ២០២៣។

១៣/សម្ដេចមហារដ្ឋសភាធិការធិបតី ​ឃួន សុដារី​ ប្រធានរដ្ឋសភា​ នីតិកាលទី៧

ព្រះមហាក្សត្រ ទ្រង់ប្រទាន គោរមងារជា «សម្ដេចមហារដ្ឋសភាធិការធិបតី» ដល់សម្ដេច ឃួន សុដារី នៅថ្ងៃទី២ខែកញ្ញាឆ្នាំ ២០២៣។

១៤/សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា​អណត្តិទី៧

សម្ដេច ហ៊ុន ម៉ាណែត ត្រូវបានសម្តេចព្រះបរមនាថ នរោត្តម សីហមុនី ទ្រង់ប្រទានគោរមងារជា «សម្ដេចមហាបវរធិបតី» នៅថ្ងៃទី​០២​ ខែកញ្ញា ឆ្នាំ ២០២៣ ពោលគឺក្នុងថ្ងៃតំណាលគ្នាជាមួយនឹង សម្ដេចមហារដ្ឋសភាធិការធិបតី ឃួន សុដារី៕

អត្ថបទដោយ៖  ង៉ិល ណារ៉ាត់

​