តើអ្វីទៅជាគោលនយោបាយ«ភូមិ-ឃុំ-សង្កាត់ មានសុវត្ថិភាព»?

ទោះបីជាកម្ពុជាលែងមានសង្គ្រាម មានសន្តិភាពពេញលេញក៏ដោយ ប៉ុន្តែ បញ្ហាសន្តិសុខ សណ្តាប់ធ្នាប់សាធារណៈ និងសេវាចាំបាច់នានារបស់ពលរដ្ឋ នៅតែជាបញ្ហាចម្បងដែលត្រូវយកចិត្តទុកដាក់ជាប្រចាំ សម្រាប់ធានាឱ្យពលរដ្ឋគ្រប់រូប និងសង្គមមានភាពសុខដុមរមនា។

ហេតុដូច្នេះហើយ ដើម្បីឆ្លើយតបជាមួយនឹងស្ថានភាពបច្ចុប្បន្នទាំងអស់នេះ និងសុវត្ថិភាពរបស់សង្គម នៅក្នុងខែមករា ឆ្នាំ២០២១ រាជរដ្ឋាភិបាលអាណត្តិទី៦ បានកែលម្អលក្ខណសម្បត្តិនៃគោលនយោបាយ “ភូមិ-ឃុំ-សង្កាត់មានសុវត្ថិភាព” ដោយមានលក្ខណ:សម្បត្តិចំនួន ៧ចំណុច៖

១.ផ្តល់សេវាសាធារណៈ ជាពិសេស សេវារដ្ឋបាលប្រកបដោយគុណភាព តម្លាភាព និងទទួលបានជំនឿទុកចិត្ត។

២.គ្មានបទល្មើស លួច ឆក់ ប្លន់ គ្រឿងញៀន ល្បែងស៊ីសងខុសច្បាប់ និងបទល្មើសគ្រប់ប្រភេទ។

៣.មានសណ្តាប់ធ្នាប់សាធារណៈល្អ ជាពិសេស គ្មានគ្រោះថ្នាក់ចរាចរណ៍។

៤.គ្មានអំពើអនាចារ គ្មានការជួញដូរមនុស្ស ពិសេស ស្ត្រី និងកុមារគ្មានអំពើហិង្សាក្នុងគ្រួសារ និងគ្មានក្មេងទំនើង។

៥.ដោះស្រាយវិវាទនៅមូលដ្ឋានក្រៅប្រព័ន្ធតុលាការប្រកបដោយគុណភាព និងប្រសិទ្ធភាព។

៦.មានអនាម័យ មានសោភណភាពល្អ និងបរិស្ថានល្អ។

៧.ឆ្លើយតបបានទាន់ពេលវេលាចំពោះគ្រោះមហន្តរាយ និងរាល់ជំងឺឆ្លងរាតត្បាតកាចសាហាវប្រកបដោយប្រសិទ្ធភាព។

ជាមួយនឹងគោលនយោបាយ “ភូមិ-ឃុំ-សង្កាត់មានសុវត្ថិភាព” រាជរដ្ឋាភិបាល មានគោលបំណង និងសំណូមពរដូចជា បន្តកសាង និងពង្រឹងសន្តិសុខសណ្តាប់ធ្នាប់សន្តិសុខសង្គម លើកកម្ពស់អនាម័យ បរិស្ថាន សុខមាលភាពរបស់ពលរដ្ឋ កាត់បន្ថយគ្រោះថ្នាក់ដែលបណ្តាលមកពីគ្រោះមហន្តរាយ និងជំងឺរាតត្បាតផ្សេងៗ។ លើកទឹកចិត្តឱ្យមានការដោះស្រាយវិវាទនៅមូលដ្ឋានក្រៅប្រព័ន្ធតុលាការ ដើម្បីបង្កភាពអនុគ្រោះដល់ដំណើរការអភិវឌ្ឍន៍សេដ្ឋកិច្ច សង្គមកិច្ចនៅមូលដ្ឋាន និងឈានទៅដល់បង្កើនល្បឿននៃការកាត់បន្ថយភាពក្រីក្រ។

ចំណុចមួយទៀត គឺកសាងបានជាមួយកម្លាំងសរុប វិធានការសរុប និងមធ្យោបាយសរុប ក្នុងការអនុវត្តគោលនយោបាយនេះ ដោយបំផុសឱ្យមានកិច្ចសហការចូលរួមជាមួយសមត្ថកិច្ច ពីវិស័យសាធារណៈ វិស័យេកជន អ្នកពាក់ព័ន្ធនានា និងប្រជាពលរដ្ឋទូទាំងប្រទេស។

គួររម្លឹកឡើងវិញថា គោលនយោបាយ “ភូមិ-ឃុំ មានសុវត្ថិភាព” របស់រដ្ឋាភិបាលកាលពីឆ្នាំ ២០១០ មានដាក់ចេញលក្ខណៈសម្បត្តិចំនួន ៥ចំណុចដូចជា៖

១.គ្មានសកម្មភាព លួច ឆក់ ប្លន់ គ្រប់ប្រភេទ។

២.គ្មានការផលិត ការចែកចាយ និងប្រើប្រាស់គ្រឿងញៀនខុសច្បាប់។

៣.គ្មានអំពើអនាចារ ការជួញដូរស្ត្រី និងកុមារ និងអំពើហិង្សាក្នុងគ្រួសារ។

៤.គ្មានក្មេងទំនើង។

៥.គ្មានការលេងល្បែងស៊ីសងគ្រប់ប្រភេទ ការប្រើប្រាស់អាវុធខុសច្បាប់ និងបទល្មើសគ្រប់ប្រភេទ៕