ការនាំចេញរបស់កម្ពុជា ទៅទីផ្សារសិង្ហបុរីកើន​ឡើងជាង ៥៥០ភាគរយ

ការធ្វើពាណិជ្ជកម្មទ្វេភាគីរវាងកម្ពុជា និងសិង្ហបុរី បានកើនឡើងខ្ពស់ ពោលគិតត្រឹមរយៈពេល ៨ខែឆ្នាំ ២០២៣ មានទំហំ​ទឹកប្រាក់ប្រមាណជាង ១.១០ពាន់លានដុល្លារ ដោយក្នុងនោះ ការនាំចេញរបស់កម្ពុជា មានប្រមាណជាង ៤៧៦លានដុល្លារ កើនឡើង ៥៥៤ភាគរយ ដោយឡែកការនាំចូលពីសិង្ហបុរី មានចំនួនទឹកប្រាក់ជាង ៦២៥លានដុល្លារ ធ្លាក់ចុះ ៧៨ភាគរយ។ នេះបើតាមរបាយការណ៍អគ្គនាយកដ្ឋានគយ និងរដ្ឋាករកម្ពុជា។

អ្នកជំនាញសេដ្ឋកិច្ច បានលើកឡើងថា កំណើននៃការនាំចេញ គឺបានឆ្លុះបញ្ចាំងពីភាពរីកចម្រើននៃការផលិតកម្ម នៅក្នុងស្រុកជាពិសេសលើវិស័យឧស្សាហកម្មធុនធំ និង SME ជាដើម។

​ចំពោះទំនិញសំខាន់ៗ ដែលកម្ពុជានាំចេញទៅសិង្ហបុរី ភាគច្រើនជាផលិតផលកសិកម្ម និងក្រៅពីនេះ ក៏មានផលិតផល​វាយនភណ្ឌ ស្បែកជើង គ្រឿងបន្លាស់ម៉ាស៊ីន ផលិតផលធ្វើពីលោហៈ និងរ៉ែ។ ចំណែកកម្ពុជា នាំចូលទំនិញពីសិង្ហបុរី រួមមានគ្រឿងអលង្ការ គ្រឿងអេឡិចត្រូនិក ផលិតផលធ្វើពីក្រដាស ប្លាស្ទិក ផលិតផលខូស្មិចទិក និងសម្ភារៈ​បន្ទប់ទឹក​ជាដើម។

កិច្ចសហប្រតិបត្តិការដ៏ជិតស្និទ្ធ និងមិត្តភាពយូរអង្វែងរវាងកម្ពុជា-សិង្ហបុរី លើវិស័យជាច្រើន ជាពិសេសកិច្ច​សហប្រ​តិបត្តិការ​លើវិស័យពាណិជ្ជកម្ម ដោយក្នុងនោះ ទំហំពាណិជ្ជកម្មទ្វេ​ភាគីរវាងប្រទេសទាំងពីរបានកើនឡើងពី ៣.៥ ប៊ីលានដុល្លារក្នុងឆ្នាំ២០២០ ដល់ ៥.៣ ប៊ីលានដុល្លារក្នុងឆ្នាំ២០២១។

បរិយាកាសធុរកិច្ច និងការវិនិយោគដ៏អំណោយផលរបស់កម្ពុជា ពិសេសការលើកទឹកចិត្ត និងភាពបត់បែនដែលផ្តល់​ដោយក្របខណ្ឌយុទ្ធសាស្រ្ត និងកម្មវិធីសម្រាប់ការស្តារសេដ្ឋកិច្ច ក្នុងទម្រង់ធម្មតា​ថ្មី២០២១-២០២៣ ក៏ដូចជាច្បាប់​ស្តីពីការវិនិយោគដែលទើបប្រកាសដាក់ឱ្យអនុវត្ត នឹងទាក់ទាញវិនិយោគិនបន្ថែមទៀត រួមទាំងវិនិយោគិនមក​ពីប្រទេស​សិង្ហបុរីផងដែរ។

កម្ពុជា គឺជាប្រទេសមួយក្នុងចំណោមប្រទេសដំបូងគេបំផុត ដែលបានទទួលស្គាល់ឯករាជ្យរបស់​ប្រទេសសិង្ហបុរី​ក្នុងឆ្នាំ១៩៦៥។ ទំនាក់ទំនងការទូតរបស់ប្រទេសកម្ពុជា និងសិង្ហបុរីត្រូវបានបង្កើត ដោយព្រះបរមរតនកោដ្ឋ សម្តេចព្រះនរោត្តម សីហនុ និងអតីតនាយករដ្ឋមន្ត្រីសិង្ហបុរី លី ក្វាន់យូ។ ចាប់តាំងពីពេលនោះមក ទំនាក់ទំនង​ទ្វេភាគីរវាងកម្ពុជា-សិង្ហបុរី ត្រូវបានពង្រឹង និងរីកចម្រើនជាបន្តបន្ទាប់៕