លោក សេង ផល្លី ប្រាប់មន្ត្រីត្រូវស្វែងរកបញ្ហាប្រឈម ដើម្បីបង្កើតគំនិតថ្មីពេលធ្វើការ

នាយឧត្តមសេនីយ៍ សេង ផល្លី អគ្គនាយកនៃអគ្គនាយកដ្ឋានធនធានមនុស្ស បានណែនាំឱ្យអង្គភាពក្រោមចំណុះអគ្គនាយកដ្ឋាន ត្រូវខិតខំស្វែងរកចំណុចខ្លាំង និងចំណុចខ្សោយរបស់អង្គភាព ដោយផ្អែកលើការបំពេញការងារកន្លងមក ដើម្បីអភិវឌ្ឍន៍ខ្លួន និងបង្កើតគំនិតថ្មីៗថែមទៀត។

ក្នុងឱកាសជួបសំណេះសំណាលជាមួយថ្នាក់ដឹកនាំ និងមន្ត្រីនៃនាយកដ្ឋានបុគ្គលិកមន្ដ្រីនគរបាលជាតិ នាព្រឹកថ្ងៃទី១៣ ខែកញ្ញានេះ លោកនាយឧត្តមសេនីយ៍ សេង ផល្លី បានលើកឡើងថា តាមរយៈការកំណែទម្រង់ ផ្លាស់ប្តូររចនាសម្ព័ន្ធ និងផ្លាស់ប្ដូរថ្នាក់ដឹកនាំរបស់នាយកដ្ឋាន គឺអង្គភាពត្រូវស្វែងរកចំណុចល្អ និងបញ្ហាប្រឈម ដោយផ្អែកលើការងារជំនាញកន្លងមកនេះ ក្នុងការអភិវឌ្ឍន៍ខ្លួន និងស្វែងរកគំនិតថ្មីៗ ដើម្បីធ្វើឱ្យនាយកដ្ឋានមួយនេះ មានភាពរីកចម្រើនបន្ថែមទៀត។ លោកនាយឧត្តមសេនីយ៍ បានបន្តថា ដើម្បីឱ្យនាយកដ្ឋានមួយទទួលបានជោគជ័យ និងរីកចម្រើនបាននោះ មន្ដ្រីទាំងអស់ត្រូវបន្ដរួបរួមសាមគ្គីគ្នា ឯកភាពផ្ទៃក្នុងនៅពេលបំពេញការងារ។

ឆ្លៀតក្នុងឱកាសនោះ លោកឧត្តមសេនីយ៍ឯក ជា សុផាត ប្រធាននាយកដ្ឋានបុគ្គលិកមន្ដ្រីនគរបាលជាតិ បានប្តេជ្ញានឹងធ្វើការវិភាគ សិក្សាឱ្យបានល្អិតល្អិននូវរចនាសម្ព័ន្ធ តួនាទី-ភារកិច្ចរបស់នាយកដ្ឋាន អង្គភាព និងស្នងការដ្ឋាននគរបាលរាជធានី-ខេត្ត ឱ្យកាន់តែមានលក្ខណៈវិទ្យាសាស្ត្រ មានដំណើរការរលូន ដោយមិនជាន់តួនាទីភារកិច្ចគ្នា ដើម្បីឱ្យដំណើរការនៃការបញ្ជាដឹកនាំ ប្រកបដោយប្រសិទ្ធភាព និងស្របតាមការវិវត្តនៃសភាពការណ៍រីកចម្រើនរបស់សង្គមជាតិ។

លោកប្រធាននាយកដ្ឋានរូបនេះ ក៏បានលើកឡើងនូវកាលវិភាគមុខងារគ្រប់នាយកដ្ឋាន អង្គភាព និងស្នងការដ្ឋាននគរបាលរាជធានី-ខេត្ត ឱ្យបានត្រឹមត្រូវ ស្របតាមតម្រូវការនៃប្រតិបត្តិការជំនាញ ដើម្បីសំដៅពង្រឹងការងារក្នុងស្ថាប័ន និងលើកកម្ពស់ប្រសិទ្ធភាពការបំពេញការងារ។

ក្នុងអាណត្តិទី៧នេះ រាជរដ្ឋាភិបាល បានសម្រេចបង្កើតឱ្យមាន​អគ្គនាយកដ្ឋាន​ថ្មីមួយ ក្រោមចំណុះក្រសួងមហាផ្ទៃ គឺអគ្គនាយកដ្ឋានធនធានមនុស្ស ដើម្បី​គ្រប់គ្រង​មន្ត្រីរាជការ​ស៊ីវិល មន្ត្រី​នគរបាលជាតិ មន្ត្រី​ពន្ធ​នា​គារ ព្រមទាំងមន្ត្រី​នៅតាម​មូលដ្ឋាន​។ ​ អគ្គនាយកដ្ឋាន​ធន​ធាន​មនុស្ស​នេះ ចែកចេញជា​នាយកដ្ឋាន​ចំនួន​៤​ រួមមាន​៖ នា​យក​ដ្ឋា​ន​រដ្ឋបាល​សរុប​ នាយក​ដ្ឋា​ន​បុគ្គលិក​មន្ត្រី​នគរបាលជាតិ​ នាយកដ្ឋាន​បុគ្គលិក​មន្ត្រីរាជការ​ស៊ីវិល និង​មន្ត្រី​ពន្ធនាគារ និង​នា​​យក​ដ្ឋា​ន​គោលនយោបាយ​៕