ព័ត៌មានជាតិ

អាជីវករនិងអ្នករស់នៅលើឆ្នេរ ពយយាយម៉ី និងឆ្នេរតាបារាំង ត្រូវរុះរើឲ្យបានមុនថ្ងៃទី២៨ ខែកុម្ភៈនេះ ជាកំហិត

បានផុស

៤ years មុន

នៅ

ថ្ងៃអង្គារ ២ កុម្ភៈ ២០២១

ដោយ

អភិបាលខេត្តព្រះសីហនុ បានស្នើឲ្យប្រជាពលរដ្ឋ ដែលកំពុងរស់នៅនិងប្រកបអាជីវកម្មរំលោភលើដីចំណីឆ្នេរស្ថិតនៅចំណុចពយយាយម៉ី និងឆ្នេរតាបារាំង ស្ថិតក្នុងភូមិរិទ្ធី២ ឃុំកែវផុស ស្រុកស្ទឹងហាវ ខេត្តព្រះសីហនុ ត្រូវរុះរើសំណង់និងការ្យផ្សេងៗឲ្យបានមុនថ្ងៃទី២៨ ខែកុម្ភៈ ឆ្នាំ២០២១ខាងមុខនេះជាកំហិត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក គួច ចំរើន អភិបាលខេត្តព្រះសីហនុបានឲ្យដឹងនៅក្នុងលិខិតមួយចុះថ្ងៃទី២កុម្ភៈនេះថា«រដ្ឋបាលខេត្តព្រះសីហនុ បានពិនិត្យឃើញថា សំណង់របស់លោកលោកស្រី ដែលកំពុងរស់នៅនិងប្រកបអាជីវកម្មត្រង់ចំណុចឆ្នេរពយយាយម៉ីនិងឆ្នេរតាបារាំងក្នុងភូមិរឹទ្ធី ២ឃុំកែវផុសស្រុកស្ទឹងហាវខេត្តព្រះសីហនុ គឺស្ថិតនៅលើដីចំណីឆ្នេរសាធារណៈរបស់រដ្ឋ ដែលធ្វើឲ្យប៉ះពាល់ដល់បរិស្ថានអនាម័យសណ្ដាប់ធ្នាប់និងសោភ័ណភាពឆ្នេរ»។ លោកអភិបាលខេត្តបានឲ្យដឹងបន្តថា ឆ្នេរសមុទ្រពយយាយម៉ីនិងឆ្នេរតាបារាំងជាដីរបស់រដ្ឋនិងលម្អឆ្នេរសាធារណៈ ដែលអាចទាក់ទាញភ្ញៀវទេសចរជាតិនិងអន្តរជាតិមកលំហែកាយកម្សាន្តនៅខេត្តព្រះសីហនុ។

លោកបានបន្ថែមថា«ដូច្នេះរដ្ឋបាលខេត្តព្រះសីហនុសូមជូនដំណឹងដល់លោកលោកស្រីត្រូវរុះរើសំណង់និងការ្យផ្សេងៗដែលបានសង់នៅលើដីចំណីឆ្នេរសាធារណៈរបស់រដ្ឋស្ថិតនៅចំណុចពយយាយម៉ីនិងឆ្នេរតាបារាំងចាប់ពីថ្ងៃចេញសេចក្តីជូនដំណឹងនេះ រហូតដល់ថ្ងៃទី២៨ ខែកុម្ភៈ ឆ្នាំ២០២១ជាកំហិត»។

លោកអភិបាលខេត្តបានបញ្ជាក់ថា ក្នុងករណីលោកលោកស្រីមិនរុះរើតាមសេចក្តីជូនដំណឹងនេះ រដ្ឋបាលខេត្តព្រះសីហនុនិងសហការជាមួយគណៈបញ្ជាការឯកភាពរដ្ឋបាលស្រុកស្ទឹងហាវចុះអនុវត្តវិធានការរដ្ឋបាលនិងវិធានការច្បាប់ដោយមិនទទួលខុសត្រូវរាល់ការខូចខាតសម្ភារៈឬបាត់បង់ទ្រព្យសម្បត្តិរបស់បងប្អូនឡើយ៕

អត្ថបទ៖ សំអឿន

សូមចុចអាន៖ កម្ពុជាទទួលបានចំណូលប៉ុន្មានពីធនាគារប្រេង? 