​គម្រោង​រេដ​បូក ​ផ្លាស់ប្តូរ​ជីវភាព​​ពលរដ្ឋជាង ២០០០ ​គ្រួសារ​ ដោយការ​ចូលរួមការពារព្រៃឈើ

គម្រោងរេដបូកជួរភ្នំក្រវាញខាងត្បូង បានជួយដល់ជនជាតិដើមភាគតិចនិងប្រជាសហគមន៍មូលដ្ឋាននៅក្នុង​ខេត្តកោះកុងចំនួនជាង ២០០០ គ្រួសារ ផ្លាស់ប្តូរ​ជីវភាពល្អ​ប្រសើរ​ប្រកប​ដោយនិរន្តរភាព តាម​រយៈការ​ផ្តល់ការ​គាំទ្រ​ដល់ការអភិវឌ្ឍហេដ្ឋារចនាសម្ព័ន្ធ​ដូចជា​​​ទឹកស្អាត ផ្លូវថ្នល់ បង្គន់អនាម័យ និងរហូតដល់ជួយឱ្យកូនពលរដ្ឋ​បានសិក្សាថ្នាក់សាកលវិទ្យាល័យថែមទៀតផង។

អត្ថប្រយោជន៍ទាំងអស់នេះត្រូវបានបង្កើតឡើងដើម្បីឆ្លើយតបទៅនឹងការស្នើសុំ និងធាតុចូលរបស់អ្នកភូមិរស់នៅតាមជនបទក្នុងខេត្តកោះកុង។ នេះបើ​តាម​សេចក្តី​ប្រកាស​របស់​អង្គការដែល​​​ធ្វើការ​ពាក់ព័ន្ធ​​ការ​អភិរក្សធនធាន​​ព្រៃឈើនៅប្រទេស​កម្ពុជា។

“រេដបូក” សំដៅលើកម្មវិធីកាត់បន្ថយការបំភាយឧស័្មនផ្ទះកញ្ចក់ដែលបណ្ដាលមកពីការបាត់បង់និងរេចរឹលព្រៃឈើ។ គម្រោងរេដបូកជួរភ្នំក្រវាញខាងត្បូង ដឹកនាំដោយក្រសួងបរិស្ថាន និងអនុវត្តដោយអង្គការសម្ព័ន្ធមិត្តសត្វព្រៃ ចាប់តាំងពីឆ្នាំ ២០១៥ មកម្ល៉េះ។ គម្រោងនេះបង្កើតប្រាក់ចំណូលបានពីការលក់ឥណទានកាបូន ដែលមួយផ្នែកធំនៃប្រាក់ចំណូលត្រូវបានប្រើប្រាស់ជាអត្ថប្រយោជន៍ផ្នែកហិរញ្ញវត្ថុសម្រាប់ទ្រទ្រង់ជីវភាពសហគមន៍មូលដ្ឋាន និងអភិរក្សធនធានធម្មជាតិ។

បើប្រៀបធៀបកាលពីមុន អ្នកភូមិត្រូវដើរចម្ងាយជាង ៥ គីឡូម៉ែត្រដើម្បីទទួលបានទឹកដែលកខ្វក់។ តែបច្ចុប្បន្ននេះមានអណ្តូងទឹកដើរដោយថាមពលសូឡាចំនួន ៩៤ កន្លែង ដែលបានផ្តល់ទឹកស្អាតប្រើប្រាស់ដោយងាយស្រួលជូនប្រជាពលរដ្ឋជាង ១៨០០ គ្រួសារ។ ផ្លូវចំនួន ៥ ខ្សែដែលមានប្រវែង ៥ គីឡូម៉ែត្រនិងវែងជាងនេះ ត្រូវបានសាងសង់ឡើង ដើម្បីឱ្យការធ្វើដំណើរចូលទៅកាន់ទីផ្សារពីភូមិដាច់ស្រយាលមានភាពងាយស្រួលជាងមុន។

ផ្នែកអនាម័យក៏មានភាពប្រសើរជាងមុន តាមរយៈការផ្តល់ជូននូវបង្គន់អនាម័យចំនួន ៧៤ កន្លែងក្នុងទូទាំងខេត្ត។ ចំណែកផ្នែកអប់រំក៏មានការអភិវឌ្ឍ ដោយសាលាមួយខ្នងត្រូវបានសាងសង់ឡើងសម្រាប់សិស្សបឋមសិក្សា ហើយសិស្សចំនួន ១៦ នាក់ដែលមកពីគ្រួសារក្រីក្រ ឬជាកុមារកំព្រា បានទទួលអាហារូបករណ៍ពេញលេញដើម្បីសិក្សានៅសាកលវិទ្យាល័យក្នុងរាជធានីភ្នំពេញ។ ឥឡូវនេះពលរដ្ឋជិត ៥០០ គ្រួសារទទួលបានជីវភាពរស់នៅប្រកបដោយនិរន្តរភាពតាមរយៈសហគមន៍អេកូទេសចរណ៍ធម្មជាតិ ដូច្នេះហើយពួកគាត់មិនចាំបាច់ពឹងផ្អែកលើព្រៃឈើដើម្បីរកប្រាក់ចំណូលទៀតនោះទេ។

មុនពេលគម្រោងនេះត្រូវបានអនុវត្ត អង្គការសម្ព័ន្ធមិត្តសត្វព្រៃបានធ្វើការប្រជុំពិគ្រោះយោបល់ និងចុះសិក្សាជាបន្តបន្ទាប់ ដើម្បីស្វែងយល់ពីតម្រូវការរបស់អ្នកភូមិ ទទួលសំណូមពរ និងការស្នើសុំសាងសង់ហេដ្ឋារចនាសម្ព័ន្ធ និងគម្រោងលើកកម្ពស់ជីវភាពរស់នៅ។ បន្ទាប់ពីផែនការត្រូវបានបង្កើតឡើងដោយមានការសម្របសម្រួលពីជនជាតិដើមភាគតិចនិងពីប្រជាសហគមន៍មូលដ្ឋាននិងអាជ្ញាធរមូលដ្ឋាន ការយល់ព្រមឯកភាពពីប្រជាពលរដ្ឋនេះត្រូវបានដាក់ជូនតាមរយៈមេភូមិ មុនពេលគម្រោងចាប់ផ្តើម។ ប្រអប់សំបុត្របណ្ដឹង-តវ៉ាក៏ត្រូវបានដំឡើងនៅតាមតំបន់និងទីតាំងដែលទីតាំងអព្យាក្រឹតនិងងាយស្រួលទៅដល់ ដូចជាសាលាឃុំ ឬផ្ទះមេភូមិ ដែលជនជាតិដើមភាគតិចនិងប្រជាសហគមន៍មូលដ្ឋានអាច​យក​បណ្តឹង-តវ៉ានិងសំណូមពររបស់ពួកគាត់ទៅទម្លាក់បាន យោង ដំណើរការឆ្លើយតបមតិត្រឡប់ និងដោះស្រាយបណ្ដឹង-តវ៉ាដែលមានស្រាប់។

លោក ស៊ី ស៊ីថា មកពីឃុំជីផាត ខេត្តកោះកុងបានមានប្រសាសន៍ថា “អាស្រ័យដោយមានគម្រោងរេដបូកជួរភ្នំក្រវាញខាងត្បូង គណៈកម្មាធិការមួយត្រូវបានបង្កើតឡើង ហើយឥឡូវនេះយើងទទួលបានទឹកស្អាតហូរចូលដល់ផ្ទះរបស់យើងតែម្ដងដែលបូមចេញពីអណ្តូងទឹក ។ គណៈកម្មការនេះត្រូវធានាថា ទឹកត្រូវបានប្រើប្រាស់ដោយសន្សំសំចៃ ដើម្បីឱ្យគ្រួសារទាំងអស់អាចទទួលបានអត្ថប្រយោជន៍ដូចគ្នា។ ចាប់ពីពេលនេះទៅ យើងត្រូវបន្តការពារតំបន់ជួរភ្នំក្រវាញរបស់យើង ដើម្បីរក្សាប្រភពទឹក។”

លោក ទិត្យ សួរ ជានិស្សិតអាហារូបករណ៍ជនជាតិដើមភាគតិចជងពីតំបន់ឆាយអារ៉ែងបានលើកឡើងថា “ការទទួលបានការសិក្សា ជាពិសេសតាមរយៈអាហារូបករណ៍ថ្នាក់បរិញ្ញាបត្រដែលទទួលបានពីគម្រោងរេដបូក បានជួយឱ្យខ្ញុំអភិវឌ្ឍសមត្ថភាពផ្ទាល់ខ្លួនឱ្យមានអនាគតល្អនិងវែងឆ្ងាយសម្រាប់ខ្ញុំក៏ដូចជាសម្រាប់គ្រួសាររបស់ខ្ញុំតទៅអនាគត”៕