ស្វែង​យល់ក្រសួង​​សំខាន់​​​មួយ​ធ្វើការ​ពាក់ព័ន្ធ​ កិច្ច​​ការពារ​ថែរក្សា និង​លើក​តម្លៃ​បេតិកភណ្ឌ​វប្បធម៌​ជាតិ

ក្រសួងវប្បធម៌ និងវិចិត្រសិល្បៈ ត្រូវបានរាជរដ្ឋាភិបាលកម្ពុជាប្រគល់បេសកកម្មឱ្យដឹកនាំ និង​គ្រប់គ្រង​វិស័យវប្បធម៌ និង វិចិត្រ​សិល្បៈ​នៃព្រះរាជាណាចក្រកម្ពុជា។

ក្រសួងវប្បធម៌ និងវិចិត្រសិល្បៈមានមុខងារ និងភារកិច្ច ​ប្រតិបត្តិនូវ​នយោបាយ​ការពារ ថែរក្សា និង​លើក​តម្លៃ​បេតិកភណ្ឌ​វប្បធម៌​ជាតិ និងសម្បត្តិវប្បធម៌​ទូទៅ​នៃ​ព្រះរាជាណាចក្រកម្ពុជា និងការ​គ្រប់គ្រង​រមណីយដ្ឋាន​វប្បធម៌ បុរាណវិទ្យានរវិទ្យា និង​ប្រវត្តិវិទ្យា។

ក្រសួង​វប្បធម៌​​ចូលរួម​លើកតម្កើង​បណ្តា​តម្លៃ​វប្បធម៌ និង​ជំនឿ​ទំនៀមទម្លាប់ប្រពៃណី​របស់សង្គមជាតិ រួមទាំំង​បំផុសការ​បង្កើតស្នាដៃ ផ្សព្វផ្សាយ និង​អភិវឌ្ឍន៍​សកម្មភាពវប្បធម៌។

ក្រសួង​វប្បធម៌​ក៏ទទួលខុសត្រូវ​ជា​អាណាព្យាបាលបច្ចេកទេស​លើសាកលវិទ្យាល័យ​ភូមិន្ទវិចិត្រសិល្បៈ ក្នុងការបណ្ដុះបណ្តាលសិល្បករ តន្ត្រីករ ស្ថាបត្យករ បុរាណវិទូ និងអ្នកជំនាញ​ផ្សេងៗទៀត​ដែលពាក់ព័ន្ធនឹងវិស័យវប្បធម៌ ដោយ​សហការជាមួយ​ក្រសួងអប់រំ យុវជន និងកីឡា ។

អនុក្រឹត្តពីដំណើរការ​និងការប្រព្រឹត្តិទៅ​នៃ​ក្រសួង​វប្បធម៌ និង​វិចិត្រសិល្បៈ​បែងចែក​​រចនាសម្ព័ន្ធ​ក្រសួង​​មាន​ថ្នាក់​កណ្តាល​ អង្គភាព​មូលដ្ឋាន និង​គ្រឹះស្ថាន​សាធារណៈ។

ក. ថ្នាក់​កណ្ដាល

-ខុទ្ទកាល័យ​រដ្ឋមន្ត្រី
-អធិការដ្ឋាន
-នាយកដ្ឋាន​សវនកម្ម​ផ្ទៃក្នុង
-អគ្គនាយកដ្ឋាន​រដ្ឋបាល និង​ហិរញ្ញវត្ថុ
-អគ្គនាយកដ្ឋាន បច្ចេកទេស​វប្បធម៌
-អគ្គនាយកដ្ឋាន​បេតិកភណ្ឌ
– សាលា​មធ្យម​វិចិត្រ​សិល្បៈ

ខ. អង្គភាពមូលដ្ឋាន :

-មន្ទីរវប្បធម៌ និង​វិចិត្រសិល្បៈខេត្ត-ក្រុង
-ការិយាល័យវប្បធម៌ និងវិចិត្រសិល្បៈ ស្រុក-ខណ្ឌ

គ. គ្រឹះស្ថានសាធារណះ :

-សាកលវិទ្យាល័យភូមិន្ទវិចិត្រសិល្បៈ

ខុទ្ធកាល័យ​រដ្ឋមន្រ្តី

ខុទ្ទកាល័យ​រដ្ឋមន្រ្តី ទទួលបន្ទុកបេសកកម្មទាំងឡាយ​ដែលកំណត់តាម​បទប្បញ្ញត្តិ នៃអនុក្រឹត្យ​លេខ ២០ អនក្រ.បក ចុះថ្ងៃទី ៣០ ខែ មេសា ឆ្នាំ ១៩៩៦ ដូចមានយោងក្នុងមូលបទខាងលើ ស្ដីពីការ​រៀបចំ និងការ ប្រព្រឹត្តទៅរបស់ក្រសួង និងរដ្ឋលេខាធិការដ្ឋាន ។

អធិការដា្ឋន

អធិការដ្ឋានមានភារកិច្ចធ្វើអធិការកិច្ចជាប្រចាំទៅលើគ្រប់អង្គភាពក្រោមឱវាទក្រសួងវប្បធម៌ និងវិចិត្រសិល្បៈ និង​ធ្វើរបាយការណ៍​ជូនរដ្ឋមន្រ្តី​ពីការ​ប្រព្រឹត្តទៅ​របស់​អង្គភាព​ដែលបានធ្វើអធិការកិច្ច និង​ពី​មធ្យោបាយ​កែលម្អការ​ប្រព្រឹត្ត​ទៅ​របស់​អង្គភាពទាំងនោះ។

អធិការដ្ឋានដឹកនាំដោយអធិការមួយរូប អមដោយអធិការរងមួយ ឬច្រើនរូបជាជំនួយការ។

នាយកដា្ឋនសវនកម្មផ្ទៃក្នុង

នាយកដា្ឋន សវនកម្មផ្ទៃក្នុង​ទទួលបន្ទុក​អនុវត្តមុខងារ​និងភារកិច្ច ​តាមខ្លឹមសារអក្រឹត្យ​លេខ ៤០ អនក្រ. បក ចុះថ្ងៃទី ១៥ ខែ កុម្ភៈ ឆ្នាំ ២០០៥ ស្តីពីការ​រៀបចំ និងការប្រព្រឹត្តទៅ​តាម​បណ្តា​ស្ថាប័ន ក្រសួង និង​សហគ្រាសសាធារណៈ ។

អគ្គនាយកដា្ឋនរដ្ឋបាល និងហិរញ្ញវត្ថុ

អគ្គនាយកដ្ឋានរដ្ឋបាល និងហិរញ្ញវត្ថុ មានមុខងារដូចតទៅ៖

– គ្រប់គ្រងការងាររួមមាន: រដ្ឋបាល បូកសរុបរបាយការណ៍ ឯកសារ បុគ្គលិក ផែនការ ស្ថិតិ ហិរញ្ញវត្ថុ សម្ភារៈបរិក្ខា ការងារបណ្តុះបណ្តាលក្របខ័ណ្ឌក្រសួង ការងារ​សហប្រតិបត្តិ​ការវប្បធម៌​អន្តរជាតិ និងកិច្ចការ​អាស៊ាន ការងារ​សិទ្ធិ​អ្នកនិពន្ធ និង​សិទ្ធិ​ប្រហាក់ប្រហែល​និង​នីតិកម្ម

– សម្របសម្រួលរាល់សកម្មភាព​រដ្ឋបាល​នៅក្នុងក្រសួង ជាមួយ​បណ្តា​អង្គភាព​មូលដ្ឋាន​ខេត្ត-ក្រុង និង​ជាមួយ​បណ្តា​ក្រសួង​នានា។

អគ្គនាយក​ដ្ឋានរដ្ឋបាល និងហិរញ្ញវត្ថុ ដឹកនាំដោយអគ្គនាយកមួយរូបនិងអមដោយ​អគ្គនាយករង​មួយ​ចំនួន​ជាជំនួយការតាមការចាំបាច់។

អគ្គនាយកដ្ឋានរដ្ឋបាល និងហិរញ្ញវត្ថុ មាននាយកដ្ឋានចំណុះចំនួន ៨ ប្រាំបី និង​សាលា​បណ្តុះបណ្តាល​ក្របខ័ណ្ឌ​វប្បធម៌ថ្នាក់​ស្មើនាយកដា្ឋន៖

១- នាយកដ្ឋាន រដ្ឋបាលទូទៅ
២- នាយកដា្ឋន បុគ្គលិក
៣- នាយកដ្ឋាន​នីតិកម្ម
៤- នាយកដា្ឋន គណនេយ្យ និង ហិរញ្ញវត្ថុ
៥- នាយកដា្ឋន សម្ភារៈ និង​បរិក្ខារ
៦- នាយកដា្ឋន ផែនការ ស្ថិតិ និង​សរុប
៧- នាយកដា្ឋន សិទ្ធិអ្នកនិពន្ធ និង​សិទ្ធិប្រហាក់ប្រហែល
៨- នាយកដ្ឋាន សហប្រតិបត្តិការវប្បធម៌ អន្តរជាតិ និង កិច្ចការ​អាស៊ាន
៩- សាលាបណ្តុះបណ្តាលក្របខ័ណ្ឌវប្បធម៌

អគ្គនាយកដា្ឋនបច្ចេកទេសវប្បធម៍

អគ្គនាយកដ្ឋានបច្ចេកទេសវប្បធម៌ មានមុខងារអនុវត្តនូវរាល់​បេសកកម្មរបស់ក្រសួង ក្នុងការ​ប្រតិបត្តិ​នយោបាយលើ​វិស័យអភិវឌ្ឍន៍​វប្បធម៌ និង​អប់រំសិល្បៈ​ភាពយន្ត វីដេអូ និង​ពហុមេឌីយ៉ា សិល្បៈ​ទស្សនីយភាព សិល្បៈ​សូនរូប និង​សិល្បៈសិប្បកម្ម សៀវភៅ និងការអានសាធារណៈ​។

អគ្គនាយកដ្ឋានបច្ចេកទេសវប្បធម៌ ដឹកនាំដោយ​អគ្គនាយកមួយរូប អមដោយអគ្គនាយករងមួយចំនួន​ជាជំនួយការ។

អគ្គនាយកដ្ឋាន បច្ចេកទេសវប្បធម៌ មាននាយកដ្ឋានចំណុះចំនួន ៥ (ប្រាំ)

១. នាយកដ្នាន អភិវឌ្ឍន៍វប្បធម៌
២. នាយកដ្នាន សិល្បៈភាពយន្ត និងផ្សព្វផ្សាយវប្បធម៌
៣. នាយកដា្ឋន សិល្បៈទស្សនីយភាព
៤. នាយកដា្ឋន សិល្បៈស្មូនរូប និងសិល្បៈសិប្បកម្ម
៥. នាយកដា្ឋន សៀវភៅ និងការអាន

អគ្គនាយកដ្ឋានបេតិកភណ្ឌ

អគ្គនាយកដ្នានបេតិកភណ្ឌ មាន​មុខងារ​អនុវត្តរាល់បេសកកម្មរ​បស់ក្រសួង ក្នុង​ប្រតិបត្តិការ​នយោបាយ​លើផ្នែក​បេតិកភណ្ឌ សារមន្ទីរ គាំពារ និងអភិរក្ស​សំណង់បុរាណ និង​វត្ថុបុរាណ ការស្រាវជ្រាវ រុករក និង​កំណាយ ស្ថានីយ​បុរេប្រវត្តិ ប្រវត្តិសាស្ត្រ​ដែលកប់ក្នុងដី ក្រោមទឹក និង​ការ​អប់រំ​ផ្សព្វផ្សាយ ។

អគ្គនាយកដ្ឋានបេតិកភណ្ឌ ត្រូវបានដឹកនាំដោយអគ្គនាយកមួយរូប អម​ដោយអគ្គនាយករង​មួយចំនួន​ជាជំនួយការតាមការចាំបាច់ ។

អគ្គនាយកដ្ឋានបេតិកភណ្ឌ មាននាយកដ្ឋានចំណុះចំនួន ៤ (បូន)

១– នាយកដា្ឋន បុរាណវត្ថុ
២ – នាយកដា្ឋន សារមន្ទីរ
៣-នាយកដា្ឋន គាំពារ និងអភិរក្សសំណង់បុរាណ
៤- នាយកដា្ឋន បុរាណវិទ្យា បុរេប្រវត្តិវិទ្យា ។

+នាយកដា្ឋន បុរាណវត្ថុ មានភារកិច្ចដូចតទៅ៖

– គ្រប់គ្រង និងអភិរក្សរាល់បុរាណវត្ថុផ្សេងៗដែលមានតម្លៃជាប្រវត្តិសាស្ត្រ សិល្បៈ សាសនា វិទ្យាសាស្ត្រ ហើយ​ដែលកិច្ចការពារ រាល់ចលន​សម្បត្តិវប្បធម៌​ទាំងឡាយ​នោះបម្រើឱ្យ​ប្រយោជន៍សាធារណៈ
-រៀបចំចងក្រងលិខិតបទដ្ឋានផ្សេងៗ ដើម្បីធានាដល់ការ​ការពារបុរាណវត្ថុ និងត្រួតពិនិត្យ​លើការនាំចេញ​នាំ​ចូល វត្ថុសិល្បៈផ្សេងៗ ដើម្បីទប់ស្កាត់ចរាចរសម្បត្តិវប្បធម៌ខុសច្បាប់
-រៀបចំ និង​ផ្តល់អាជ្ញាប័ណ្ណ សម្រាប់ការ​សុំអនុញ្ញាតនាំចេញ នាំចូល វត្ថុសិល្បៈ​ផ្សេងៗ
– ចុះអប់រំ និង​ផ្សព្វផ្សាយ ដល់សាធារណជន អំពីច្បាប់ការពារបេតិកភណ្ឌ​វប្បធម៌ និង​លិខិតបទដ្ឋាន ផ្សេងៗ​ដែលមាន​ទិសដៅថែរក្សា និងការពារឱ្យបានគង់វង្សនូវសម្បត្តិវប្បធម៌​ជាតិ
-ទទួលអនុវត្តសិទ្ធិស្មើសុំ ឬប្តឹងទាមទារឱ្យធ្វើការបញ្ជូនត្រឡប់មកប្រទេសកម្ពុជាវិញ នូវ​បុរាណ​វត្ថុ​ទាំងឡាយណា​ដែលត្រូវបានគេនាំចេញ ឬធ្វើនីហរណកម្ម​ដោយខុសច្បាប់
– ធ្វើរបាយការណ៍ពី​សកម្មភាពការងាររបស់ខ្លួន
-ទទួលអនុវត្តភារកិច្ចផ្សេងទៀត ដែលថ្នាក់ដឹកនាំក្រសួងប្រគល់ជូន

នាយកដា្ឋន បុរាណវត្ថុ ដឹកនាំដោយប្រធានមួយរូប និងអនុប្រធានមួយចំនួន​ជាជំនួយការ។

+នាយកដា្ឋន​សារមន្ទីរ មានភារកិច្ចដូចតទៅ៖

– គ្រប់គ្រង​ការអភិរក្ស ការថែរក្សា ការជួសជុល ការសិក្សា និង​ការធ្វើឱ្យ​សំបូរបែប​នៃ​សមុច្ច័យ​សាធារណៈ
-ធានាការផ្សព្វផ្សាយ និងការតាំងបង្ហាញសមុច្ច័យទាំងឡាយចំពោះសាធារណៈជន ព្រមទាំង​ត្រួត​ពិនិត្យ​តាមលក្ខណៈវិទ្យាសាស្ត្របច្ចេកទេស បណ្ដា​សមុច្ច័យទាំងនោះ
– គ្រប់គ្រងលើសារមន្ទីររដ្ឋ និង​សារមន្ទីរគ្រប់ប្រភេទ​នៅទូទាំងប្រទេស
– ធ្វើ​របាយការណ៏​ពីសកម្មភាពការងារ​របស់ខ្លួន
– ទទួលអនុវត្ត​ភារកិច្ច​ផ្សេងទៀត ដែលថ្នាក់ដឹកនាំក្រសួងប្រគល់ជូន។

នាយកដា្ឋនសារមន្ទី ដឹកនាំដោយប្រធានមួយរូប និងអនុប្រធានមួយចំនួនជាជំនួយការ។

+នាយកដា្ឋន គាំពារ និងអភិរក្សសំណង់បុរាណ​មានភារកិច្ចដូចតទៅ៖

-ធ្វើបញ្ជី និងធ្វើចំណាត់ថ្នាក់ប្រាសាទបុរាណ រមណីយដ្ឋានវប្បធម៌ និង​សំណង់បុរាណផ្សេងៗទៀត ដែល​មាន​នៅតាម​ខេត្ត-ក្រុងនានា ដោយសហការយ៉ាងជិតស្និទជាមួយមន្ទីរវប្បធម៌ និង វិចិត្រ​សិល្បៈ​ខេត្ត-ក្រុង ដើម្បីរៀប​ចំទុកជាឯកសារ
-គ្រប់គ្រង និងសិក្សាស្រាវជ្រាវ ដើម្បីអនុវត្តកិច្ចការការពារបេតិកភណ្ឌវប្បធម៌ ដូចមានចែងនៅក្នុង ច្បាប់​ស្តីពីកិច្ចការពារបេតិកភណ្ឌវប្បធម៌ជាតិ
-រៀបចំ ស្ថាបនាអភិរក្សដ្ឋាន​នៅតាមបណ្តាក្រុមប្រាសាទ និង​រមណីយដ្ឋាន​វប្បធម៌នានា​ដោយមាន អភិរក្សករ និង​អ្នកជំនាញផ្សេងៗធ្វើការនៅទីនោះ
-សិក្សាស្រាវជ្រាវ និងចងក្រងជាឯកសារប្រវត្តិសាស្ត្រ និងវិទ្យាសាស្រ្ត​នូវ​បណ្តាប្រាសាទ​បុរាណ រមណីយដ្ឋាន​វប្បធម៌ និងសំណង់បុរាណ​ដែលទើបរក​ឃើញថ្មីពុំទាន់​បោះពុម្ភផ្សព្វផ្សាយ
-ធ្វើរបាយការណ៍ពីសកម្មភាពការងាររបស់ខ្លួន
– ទទួល​អនុវត្តភារកិច្ច​ផ្សេងទៀត ដែលថ្នាក់ដឹកនាំក្រសួងប្រគល់ជូន។

នាយកដ្ឋាន​គាំពារ និងអភិរក្សសំណង់បុរាណ ដឹកនាំដោយប្រធានមួយរូប និងអនុប្រធានមួយចំនួន ជា​ជំនួយការ តាមការចាំបាច់ ។

នាយកដា្ឋនបុរាណវិទ្យា និងបុរេប្រវត្តិវិទ្យា មានភារកិច្ចដូចតទៅ៖

-ស្រាវជ្រាវ រុករកកំណត់ទីតាំង និងចុះបញ្ជីទីតាំងនៃស្ថានីយបុរេប្រវត្តិ និង​ប្រវត្តិសាស្ត្រ​ដែល​កប់​ក្នុង​ដី
-ធ្វើកំណាយស្របច្បាប់​លើស្ថានីយមួយចំនួន ដែល​មានសារៈសំខាន់​ក្នុងការយល់ដឹងពី​សង្គម និង​វប្បធម៌
-ធ្វើការវិភាគរាល់វត្ថុបុរាណ ដែល​ជីក​បាន​ពីស្ថានីយ​ដែលមាន​ប្រភព​ច្បាស់លាស់
-ផ្សព្វផ្សាយ​នូវ​ពត៌មាន ដែលស្រាវជ្រាវរកឃើញ​ពីកំណាយ​ស្របច្បាប់ ដើម្បី​ចែករំលែក​ចំណេះ​ដឹង​ដល់​មន្ត្រី​ក្រសួង និង​បញ្ញវន្តទូទៅ
-ធ្វើរបាយការណ៍​ពីសកម្មភាពការងារ​របស់ខ្លួន

-ទទួលអនុវត្តភារកិច្ច​ផ្សេងទៀត ដែលថ្នាក់ដឹកនាំ​ក្រសួងប្រគល់ជូន។

នាយកដា្ឋនបុរាណវិទ្យា និងបុរេប្រវត្តិវិទ្យា ដឹកនាំ​ដោយប្រធានមួយរូប​និងអនុប្រធាន​មួយចំនួន​ជាជំនួយការ​តាមការ​ចាំបាច់ ។

សាលាមធ្យមវិចិត្រសិល្បៈ

សាលាមធ្យមវិចិត្រសិល្បៈ មានភារកិច្ចដូចតទៅ៖

-ជ្រើសរើសសិស្សតាមឧបនិស្ស័យឱ្យចូលសិក្សា និងប្រឡងបញ្ចប់​ដោយផ្តល់នូវ​សញ្ញាប័ត្រសិល្បៈ និងបណ្តុះបណ្តាល​ធនធានមនុស្ស​ចាប់តាំងពី​កម្រិតបឋម​ដល់មធ្យម ដើម្បីឱ្យក្លាយ​ជាអ្នក​ជំនាញ​សិល្បៈ​ទាំង​ទ្រឹស្តី ទាំង​ការអនុវត្ត និងការបង្កើតថ្មី​តាមការចាំបាច់​របស់សង្គម​ពេញលេញ
-បំពាក់បំប៉ន​មន្ត្រីជំនាញ និង​សិល្បករ ឱ្យក្លាយជាគ្រូបង្ហាត់ ដែល​មានគរុកោសល្យសិល្បៈ និង​វិជ្ជាជីវៈ
-ស្រាវជ្រាវ​ចងក្រងកម្មវិធី​សិក្សា និង​វិធីសាស្រ្ត​បង្រៀនទុក​ជាឯកសារ​បច្ចេកទេសសិល្បៈ
-សម្របសម្រួល​កម្មវិធីសិក្សា​ជាមួយ​សាកលវិទ្យាល័យភូមិន្ទវិចិត្រសិល្បៈ និង​សហការ​ជាមួយអង្គការ​ជាតិ និងអន្តរជាតិ​លើមូលដ្ឋាន​ការងារ​បណ្តុះបណ្តាល និង​ស្រាវជ្រាវ​បច្ចេកទេស​សិល្បៈ ដើម្បី​ធ្វើការ​ឱ្យ​កាន់តែ​ប្រសើរ​ឡើង​ការអប់រំសិល្បៈ
– ធ្វើរបាយការណ៍​ពីសកម្មភាពការងាររបស់ខ្លួន
– ទទួលអនុវត្តភារ​កិច្ចផ្សេងទៀត ដែលថ្នាក់ដឹកនាំក្រសួងប្រគល់ជូន។

សាលាមធ្យមវិចិត្រសិល្បៈ ដឹកនាំដោយ​នាយកសាលាមួយរូប​មានឋានៈស្មើប្រធាននាយកដា្ឋន និង នាយករង​មួយចំនួន មានឋានៈ​ស្មើអនុប្រធាននាយកដា្ឋន​ជាជំនួយការ​។

សាលាមធ្យមវិចិត្រសិល្បៈ​អាចបង្កើតសាលាឯកទេស​សិល្បៈផ្សេងៗ ទៅតាមការ​រីកចម្រើន និង​តម្រូវការ​ចំពោះមុខរបស់សង្គមជាតិ ។

អង្គភាពមូលដា្ឋន

នៅ​តាម​ខេត្ត-ក្រុងនីមួយៗ មាន​មន្ទីរវប្បធម៌ និង​វិចិត្រសិល្បៈខេត្ត-ក្រុង​មួយ​ដែល​ទទួល​បន្ទុក​អនុវត្ត កិច្ច​សម្របសម្រួល​សកម្មភាព​របស់ក្រសួង។ នៅតាម​ស្រុក-ខ័ណ្ឌនីមួយ១ មាន​ការិយាល័យ​វប្បធម៌ និង​វិចិត្រ​សិល្បៈ​ស្រុក-ខ័ណ្ឌ ដែល​ទទួលបន្ទុក​អនុវត្ត និង​សម្របសម្រួល​សកម្មភាព​របស់​មន្ទីរ​វប្បធម៌ និង​វិចិត្រ​សិល្បៈ​ខេត្ត-ក្រុង។

គ្រឹះស្ថានសាធារណៈ

ការរៀបចំ និងការប្រព្រឹត្តទៅរបស់គ្រឹះស្ថានសាធារណៈ ត្រូវកំណត់ដោយអនុក្រឹត្យ ដែល​មាន​លក្ខន្តិកៈ​មួយដោយឡែករបស់ខ្លួន ដោយ​អនុវត្ត​ស្រប​តាម​ព្រះរាជក្រឹត្យ​លេខ នស/រកត/១២៩៧ ៩១ ចុះ​ថ្ងៃទី ៣១ ខែ- ធ្នូ ឆ្នាំ ១៩៩៧ ស្តីពី​លក្ខន្តិកៈ​គតិយុត្តនៃគ្រឹះស្ថានសាធារណៈរដ្ឋបាល​។

អង្គភាពត្រួតពិនិត្យហិរញ្ញវត្ថុ

អង្គភាពត្រួតពិនិត្យហិរញ្ញវត្ថុត្រូវបានបង្កើតឡើងដោយ​រដ្ឋមន្រ្តី ក្រសួងសេដ្ឋកិច្ច និង​ហិរញ្ញវត្ថុ តាម លក្ខខ័ណ្ឌ​នៃបទបញ្ជា​កំណត់ក្នុងអនុក្រឹត្យ​លេខ ៨១ ចុះថ្ងៃទី ១៦ ខែ វិច្ឆិកា ឆ្នាំ ១៩៩៥ ស្តីពីការ​បង្កើតស្ថាប័ន ត្រួត​ពិនិត្យហិរញ្ញវត្ថុ​លើការ​ចំណាយ​ថវិកាក្នុងបណ្តាក្រសួង៕