អាជ្ញាធរខេត្តស្វាយរៀង ចុះពិនិត្យទីតាំងដែលធ្លាប់ផ្តល់កន្លែងលេងល្បែងស៊ីសង នៅក្រុងបាវិត

លោក សេង សីលា និងលោក ម៉ែន អេង អភិបាលរងខេត្តស្វាយរៀង តំណាងលោកអភិបាលខេត្ត បានអញ្ជើញចុះពិនិត្យទីតាំងដែលធ្លាប់ផ្តល់កន្លែងលេងល្បែងស៊ីសង និងអាជ្ញាបណ្ណ (ឡូតូអនឡាញ និងមាន់ជល់អនឡាញ)មួយចំនួន ស្ថិតនៅក្នុងសង្កាត់បាវិត ក្រុងបាវិត ខេត្តស្វាយរៀង កាលពីថ្ងៃទី១៣ ខែកញ្ញា ឆ្នាំ២០២៣។  

លោក សេង សីលា អភិបាលរងខេត្ត បានឲ្យដឹងថា បន្ទាប់ពីទទួលបានព័ត៌មានថាមានទីតាំងផ្តល់កន្លែងភ្នាល់លេងល្បែងស៊ីសងនោះ លោកអភិបាលខេត្តស្វាយរៀង បានចាត់ឱ្យលោកអភិបាលរងខេត្ត ដឹកនាំសហការជាមួយរដ្ឋបាលក្រុងបាវិត និងមន្ត្រីដែលមានការពាក់ព័ន្ធបានចុះពិនិត្យទីតាំងខាងលើដើម្បីពិនិត្យមើលសុពលភាពអាជ្ញាបណ្ណ ដែលបានផ្តល់ឲ្យកន្លែងលេងល្បែងទាំងនេះ។ លោកអភិបាលរងខេត្ត បានបន្តថា ក្រោយពីចុះទៅដល់ទីតាំងមួយចំនួនខាងលើនេះពិនិត្យឃើញថា គ្មានសកម្មភាពបើកលេងល្បែងស៊ីសងនោះទេ ហើយក៏មានអាជ្ញាបណ្ណរួចហើយ។

ទន្ទឹមនោះ លោក សេង សីលា និងលោក ម៉ែន អេង បានធ្វើការណែនាំដល់ម្ចាស់ទីតាំងទាំងអស់ដែលប្រកបមុខរបរនៅក្នុងមូលដ្ឋានក្រុងបាវិត កុំអោយមានការលួចលាក់ផ្តល់កន្លែងលេងល្បែងស៊ីសងគ្រប់ប្រភេទដែលផ្ទុយទៅនឹងច្បាប់ទាំងអ្នកលេង ទាំងអ្នកផ្តល់ទីតាំង។ លោកអភិបាលរងខេត្ត ក៏បានអំពាវនាវដល់ពលរដ្ឋខ្មែរទាំងអស់កុំអោយនាំគ្នាចូលលេងល្បែងស៊ីសងនៅតាមបណ្តាលកាស៊ីណូ និងទីតាំងបើកលេងល្បែងស៊ីសងគ្រប់ប្រភេទដែលខុសទៅនឹងច្បាប់ ហើយប្រឈម និងទោសទាន់ថែមទៀតផង៕

អត្ថបទ៖ ភក្ដី