សម្ដេច ហ៊ុន ម៉ាណែត ស្នើចិនបន្តគាំទ្រដល់វិស័យសន្តិសុខថាមពល និងសន្តិសុខស្បៀងរបស់កម្ពុជា

នៅក្នុងជំនួបទ្វេភាគីជាមួយប្រធានាធិបតីចិន លោក ស៊ី ជីនពីង នាថ្ងៃទី១៥ ខែកញ្ញា ឆ្នាំ២០២៣នេះ នៅមហាវិមានប្រជាជនចិន នៃរដ្ឋធានីប៉េកាំង សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានស្នើភាគីចិនបន្តគាំទ្រដល់ការធានាសន្តិសុខថាមពល និងសន្តិសុខស្បៀងរបស់កម្ពុជា។

សម្ដេចធិបតីនាយករដ្ឋមន្ត្រី និងលោកប្រធានាធិបតីចិន បានពិភាក្សាអំពីការបន្តរក្សាគោលនយោបាយប្រកបដោយមេត្រីភាពរវាងប្រទេសទាំងពីរ កម្ពុជា-ចិន។ លោកប្រធានាធិបតីចិន បានបញ្ជាក់ថា ចិននៅតែជាមិត្តដ៏ល្អ និងនៅតែបន្តជួយកម្ពុជាលើមាគ៌ានៃការអភិវឌ្ឍសេដ្ឋកិច្ច ហើយដំណើរទស្សនកិច្ចផ្លូវការរបស់សម្តេចធិបតី នាពេលនេះ នឹងនាំមកនូវជោគជ័យបន្ថែមទៀតនៃការសម្រេចឱ្យបានការកសាងសហគមន៍វាសនារួមក្នុងយុគសម័យថ្មីរវាងប្រទេសទាំងពីរ។

តាមរយៈជំនួបនេះ សម្ដេចធិបតី ហ៊ុន ម៉ាណែត បានប្រាប់លោកប្រធានាធិបតីចិនអំពីជំហរគោលនយោបាយរបស់កម្ពុជាចំពោះចិន ជាពិសេសការបន្តអនុវត្តយ៉ាងខ្ជាប់ខ្ជួននូវគោលនយោបាយចិនមួយ។ សម្ដេចធិបតី បញ្ជាក់ថា ទំនាក់ទំនងកម្ពុជា-ចិនដ៏យូរអង្វែងនេះ បាននាំឧត្តមប្រយោជន៍ជាច្រើនដល់ប្រជាជាតិទាំងពីរ ដែលកំពុងទទួលបានផ្លែផ្កាលើគ្រប់វិស័យ ជាពិសេសលើវិស័យសេដ្ឋកិច្ច និងអប់រំ ។

សម្ដេចធិបតី បានបន្ថែមថា ការអភិវឌ្ឍ និងការរីកចម្រើនរបស់កម្ពុជា នាពេលសព្វថ្ងៃនេះ ពិតជាមិនអាចកាត់ផ្ដាច់ចេញបានពីការគាំទ្រ និងកិច្ចសហការពីសំណាក់ភាគីចិនឡើយ តួយ៉ាងដូចជាការគាំទ្ររបស់ចិន នៅក្នុងកាលៈទេសៈដ៏លំបាកនៃការប្រយុទ្ធប្រឆាំងនឹងជំងឺកូវីដ-១៩ ជាដើម។ ក្នុងន័យនេះ សម្ដេចធិបតី ហ៊ុន ម៉ាណែត បានគូសរំលេចជូនលោក ប្រធានាធិបតីចិនអំពីទិសដៅ និងវិស័យនៃកិច្ចសហប្រតិបត្តិការសម្រាប់ពេលអនាគតរវាងប្រទេសទាំងពីរ ជាអាទិ៍ វិស័យថាមពល សន្តិសុខស្បៀង និងវិនិយោគ។

ដើម្បីជំរុញនៃកិច្ចសហប្រតិបត្តិការនេះ សម្ដេចធិបតីនាយករដ្ឋមន្ត្រីកម្ពុជា បានស្នើភាគីចិនបន្តគាំទ្រដល់ការធានាសន្តិសុខថាមពល និង សន្តិសុខស្បៀងរបស់កម្ពុជាបន្ថែមទៀត ខណៈសម្ដេចធិបតី ក៏បានអរគុណចិនចំពោះការនាំចូលអង្ករ និងផលិតផលកសិកម្មផ្សេងទៀតពីកម្ពុជា។ លើសពីការនាំចូលផលិតផលពីកម្ពុជា សម្ដេចធិបតី ក៏បានអរគុណ ចំពោះកិច្ចខិតខំប្រឹងប្រែងកន្លងមករបស់ចិន ក្នុងការជំរុញ និងការលើកទឹកចិត្តឱ្យវិនិយោគិនចិនមកបណ្តាក់ទុនវិនិយោគនៅកម្ពុជាផងដែរ៕