​ប្រកាសផ្លូវការ​មុននេះ​! ទីបំផុត​​រមណីយដ្ឋានកោះកេរត្រូវ​បាន​ដាក់បញ្ចូល​ជា​សម្បត្តិបេតិកភណ្ឌពិភពលោក

នៅមុននេះបន្តិច អង្គការ​យូណេស្កូ​បាន​ប្រកាស​ដាក់​រមណីយដ្ឋានបុរាណវិទ្យាកោះកេរ្តិ៍ជាសម្បត្តិបេតិកភណ្ឌពិភពលោក។

នៅវេលាម៉ោងជាង ៤ រសៀលម៉ោង​នៅព្រះរាជាណាចក្រកម្ពុជា អង្គការយូណេស្កូតាមរយៈសេចក្តីសម្រេច 45 COM 8B.8 នៃកិច្ចប្រជុំគណៈកម្មការបេតិកភណ្ឌពិភពលោកទី៤៥ នៅទីក្រុងរីយ៉ាតនៃព្រះរាជាណាចក្រអារ៉ាបីសាអូឌីត​បានប្រកាសដាក់​​រមណីយដ្ឋានបុរាណវិទ្យាកោះកេរនៃអតីតរាជធានីលិង្គបុរៈ​ឬឆោកគគ៌្យរ (Koh Ker : Archeological Site Of Ancient Lingapura Or Chok Gargyar) ទៅក្នុងបញ្ជីសម្បត្តិបេតិកភណ្ឌពិភពលោក។

​

ការ​ប្រកាស​បញ្ចូល​រមណីយដ្ឋានបុរាណវិទ្យាកោះកេរជាសម្បត្តិបេតិកភណ្ឌពិភពលោក ជា​មោទនភាព​ជាតិ​មួយ​ទៀត​របស់​កម្ពុជា។

នៅមុននេះដែរ តំណាងអង្គការ​យូណេស្កូប្រចាំប្រទេស​កម្ពុជា ក៏​បានផ្ញើសារ​អបអរសាទរប្រទេសកម្ពុជាដែលបានចុះបញ្ជីតំបន់ប្រាសាទកោះកេរក្នុងបញ្ជីបេតិកភណ្ឌពិភពលោករបស់អង្គការយូណេស្កូ។ អង្គការយូណេស្កូ ទទួលស្គាល់ពីសារៈសំខាន់ផ្នែកប្រវត្តិសាស្ត្រ និងស្ថាបត្យកម្មពិសេសនៃរមណីយដ្ឋានបុរាណវិទ្យាកោះកេរ និងតម្លៃជាសាកលដ៏លេចធ្លោរបស់ខ្លួន ដែលជាកិត្តិយសដល់កេរដំណែលដ៏យូរអង្វែងនៃអរិយធម៌ខ្មែរ និងការខិតខំប្រឹងប្រែងរបស់ប្រទេសកម្ពុជា ដើម្បីការពាររតនសម្បត្តិរបស់ខ្លួនសម្រាប់មនុស្សជាតិជំនាន់ក្រោយ៕