ស្វែងយល់ពី​បេសកកម្ម មុខងារ ​ភារកិច្ច និងរចនាសម្ព័ន្ធនៅ​ទីស្តីការ​គណៈរដ្ឋមន្រ្តី

ទីស្តីការគណៈរដ្ឋមន្ត្រី​មានបេសកកម្មដឹកនាំ គ្រប់គ្រង និងសម្របសម្រួល​កិច្ចការប្រចាំថ្ងៃរបស់​គណៈរដ្ឋមន្ត្រីក្រោមការដឹកនាំរបស់នាយករដ្ឋមន្ត្រី។

ទីស្តីការគណៈរដ្ឋមន្ត្រីមានមុខងារ និងភារកិច្ចដូចតទៅ៖

១- សម្របសម្រួលការងារប្រចាំថ្ងៃរបស់គណៈរដ្ឋមន្ត្រី៖

-សិក្សាស្រាវជ្រាវបូកសរុបសភាព​ការណ៍​ទូទៅ និងធ្វើរបាយការណ៍​ជូនរាជរដ្ឋាភិបាល ដើម្បី​រាយការណ៍​ថ្វាយព្រះមហាក្សត្រ និង​ចម្លងជូន​ប្រធានព្រឹទ្ធសភា​និងប្រធាន​រដ្ឋសភា

– ផ្សព្វផ្សាយ​និង​ចាត់ចែងអនុវត្តច្បាប់ លិខិតបទដ្ឋានគតិយុត្ត សេចក្តីសម្រេច បទបញ្ជា គោលការណ៍​ណែនាំ និងលិខិតរដ្ឋបាលនានារបស់រាជរដ្ឋាភិបាល

-តាមដាន ពិនិត្យ ក្រើនរំលឹក​ក្រសួង​ស្ថាប័ននានាចំណុះរាជរដ្ឋាភិបាល ក្នុងការអនុវត្ត​កម្មវិធី​នយោបាយ លិខិត​បទដ្ឋានគតិយុត្ត សេចក្តី​សម្រេច បទបញ្ហា និង​គោលការណ៍​ណែនាំ​របស់​រាជរដ្ឋាភិបាល

-ផ្តល់យោបល់លើទិដ្ឋភាព​ទម្រង់និងទិដ្ឋភាពច្បាប់​លើការងារតាក់តែងសេចក្តីព្រាង​ច្បាប់ លិខិត​បទដ្ឋាន​គតិយុត្ត គោលនយោបាយ ផែនការ​យុទ្ធសាស្ត្រ ផែនការ​សកម្មភាព និង​ឯកសារផ្សេងៗ​ទៀតឱ្យមានសង្គតិភាព

-ត្រួតពិនិត្យលើ​លិខិតបទដ្ឋានគតិយុត្តរបស់ក្រសួងស្ថាប័ន​នៅថ្នាក់ជាតិនិងរដ្ឋបាល ថ្នាក់ក្រោម​ជាតិ​ដែលមិនស្របនឹង​លិខិតបទដ្ឋានគតិយុត្តរបស់រាជរដ្ឋាភិបាល

-តាមដាន ពិនិត្យ និងពិចារណាលើគ្រប់សំណើ​របស់ក្រសួងស្ថាប័ន និងលើកយោបល់ តាម​កម្មវិធី​នយោបាយ យុទ្ធសាស្ត្រអភិវឌ្ឍន៍ជាតិ និងគោលនយោបាយ​របស់​រាជរដ្ឋាភិបាល​តាមទិដ្ឋភាព​ច្បាប់ សេដ្ឋកិច្ច សង្គម និង​វប្បធម៌ ជូន​នាយករដ្ឋមន្ត្រី ដើម្បីពិនិត្យ​និងសម្រេច

-រៀបចំកម្មវិធីការងារ​របស់រាជរដ្ឋាភិបាល និងធ្វើរបាយការណ៍ប្រចាំសប្ដាហ៍ ខែ ត្រីមាស ឆមាស និង​ប្រចាំឆ្នាំ

-រៀបចំអង្គប្រជុំរបស់គណៈរដ្ឋមន្ត្រី អង្គប្រជុំអន្តរក្រសួង កិច្ចប្រជុំ​ជំនាញបច្ចេកទេស និង​អង្គ​ប្រជុំ​ផ្សេងៗទៀត

-អនុវត្តភារកិច្ចផ្សេងៗទៀតដែលនាយករដ្ឋមន្ត្រីប្រគល់ជូន។

២- ជាសេនាធិការជូនរាជរដ្ឋាភិបាល៖

-សិក្សា វិភាគអំពីទិដ្ឋភាពច្បាប់និង​សភាពការណ៍សេដ្ឋកិច្ច សង្គម និងវប្បធម៌

-ជួយ​លើ​កិច្ចការ​នយោបាយ សិទិ្ធមនុស្ស ការពង្រឹងនិងពង្រីក​ទំនាក់ទំនង​ជាមួយ សង្គមស៊ីវិល និង​អង្គការ​មិនមែន​រដ្ឋាភិបាល

-ពង្រឹង​ការអភិវឌ្ឍ​ប្រទេសជាតិ កិច្ចការពារ​សន្តិសុខ សុវត្ថិភាព សណ្ដាប់ធ្នាប់ សាធារណៈ ការពារ​ជាតិ និង​អភិបាលកិច្ច​ល្អ តាមរយៈ​យន្តការ​គណៈកម្មាធិការ ក្រុមប្រឹក្សា និង​អាជ្ញាធរ

-រៀបចំ​សំណៅ​ដែលមានតម្លៃជាការចែកផ្សាយព្រះរាជក្រមនិងព្រះរាជក្រឹត្យ -តម្កល់និងថែរក្សាសំណៅដើម​ព្រះរាជក្រម ព្រះរាជក្រឹត្យ និង​លិខិតបទដ្ឋានគតិយុត្ត​ផ្សេង​ទៀត

-អនុវត្តភារកិច្ចផ្សេងៗទៀតដែលនាយករដ្ឋមន្ត្រីប្រគល់ជូន។

៣- គ្រប់គ្រង និងចាត់ចែងការងាររបស់ទីស្តីការគណៈរដ្ឋមន្ត្រី៖

-សិក្សាស្រាវជ្រាវ តាមដាន ពិនិត្យពិចារណា និងផ្តួចផ្តើមលើកយោបល់​ជូននាយក រដ្ឋមន្ត្រី​លើ​គ្រប់វិស័យ

– សិក្សាស្រាវជ្រាវ​ដោយសហការជាមួយ​ក្រសួងស្ថាប័នពាក់ព័ន្ធ សង្គមស៊ីវិល អង្គការ មិនមែន​រដ្ឋាភិបាល និង​ផ្នែកឯកជន ដើម្បីលើកគម្រោង​កសាងសេចក្តីព្រាងច្បាប់ និង​លិខិតបទដ្ឋាន​គតិយុត្តផ្សេងទៀត

-ទំនាក់ទំនង សម្របសម្រួល និងផ្តល់យោបល់ដល់ក្រសួងស្ថាប័នពាក់ព័ន្ធនឹងការតាក់តែង​សេចក្តីព្រាងច្បាប់​និងលិខិតបទដ្ឋានគតិយុត្តផ្សេងទៀត ឱ្យស្របតាមអាទិភាព​នៃកម្មវិធី​នយោបាយ យុទ្ធសាស្ត្រអភិវឌ្ឍន៍ជាតិ និងគោលនយោបាយ​របស់រាជរដ្ឋាភិបាល

-សិក្សា​និងតាមដានអត្ថបទច្បាប់​និងលិខិតបទដ្ឋានគតិយុត្តទាំងឡាយដែលប្រកាស​ឱ្យប្រើ ហើយ​លែងសមស្រប​នឹងសភាពការណ៍ជាក់ស្តែងដើម្បីលើកយោបល់​ជូនរាជរដ្ឋាភិបាល​ ដើម្បីពិនិត្យ​និងសម្រេចក្នុងការស្នើធ្វើ​វិសោធនកម្មឬធ្វើការ​កែ​សម្រួល

-រក្សាការពារកិត្យានុភាព​របស់រាជរដ្ឋាភិបាល​ ដោយធ្វើការបកស្រាយ​បំភ្លឺតាមរយៈការធ្វើ​ប្រតិកម្ម​រហ័ស ការធ្វើសន្និសីទកាសែត​ សិក្ខាសាលាឬបណ្ដាញព័ត៌មានសង្គមផ្សេងៗ

-តាមដាន​ពិនិត្យ និងជំរុញការអនុវត្តកម្មវិធីនយោបាយ យុទ្ធសាស្ត្រ​អភិវឌ្ឍន៍ជាតិ គោលនយោបាយ និង​លិខិត​បទដ្ឋាន​គតិយុត្តរបស់រាជរដ្ឋាភិបាល

-គ្រប់គ្រង​និងសម្របសម្រួល​ការងាររបស់ក្រុមប្រឹក្សា អាជ្ញាធរ គណៈកម្មាធិការ និង​អង្គភាពនានា​ចំណុះ​ទីស្តីការគណៈរដ្ឋមន្ត្រី

-គ្រប់គ្រងទ្រព្យ​សម្បត្តិរដ្ឋនិង​មន្ត្រីរាជការរបស់ទីស្តីការគណៈរដ្ឋមន្ត្រី

-គ្រប់គ្រងនិងដោះស្រាយ​ថវិកា មធ្យោបាយសម្ភារៈ ដើម្បីបម្រើសកម្មភាព​នានា របស់​ទីស្តីការ​គណៈរដ្ឋមន្ត្រី​និងនាយករដ្ឋមន្ត្រី

– គ្រប់គ្រង​ការងាររាជកិច្ច

– គ្រប់គ្រងប្រព័ន្ធព័ត៌មានវិទ្យា​របស់ទីស្តីការ​គណៈរដ្ឋមន្តី

-គ្រប់គ្រង​និងថែរក្សាឯកសារ​របស់ទីស្តីការ​គណៈរដ្ឋមន្ត្រី​និងឯកសាររបស់ជាតិ

-ពិនិត្យ​និងរៀបចំគ្រឿង​ឥស្សរិយយស សញ្ញាសក្ដិ និង​ឯកសណ្ឋាន

-ទទួលបន្ទុករ៉ាប់រងការងារ​ពិធីការ សម្រាប់នាយករដ្ឋមន្ត្រី និង​ថ្នាក់ដឹកនាំទីស្តីការ​គណៈរដ្ឋមន្តី

-ការពារសន្តិសុខ សុវត្ថិភាព សណ្តាប់ធ្នាប់សាធារណនៅក្នុងបរិវេណទីស្ដីការគណៈរដ្ឋមន្ត្រី

-គ្រប់គ្រងនិង​សម្របសម្រួលការងារ​របស់រាជបណ្ឌិត្យសភាកម្ពុជា -គ្រប់គ្រងនិងសម្របសម្រួលការងារមេធាវីរាជរដ្ឋាភិបាល

-ចាត់ចែង​បញ្ជូនសេចក្តីព្រាងច្បាប់​ទៅស្ថាប័ន​នីតិប្បញ្ញត្តិ​ដើម្បីសុំការពិនិត្យនិង អនុម័ត និង​សម្របសម្រួល​សហការ​ជាមួយក្រសួង ស្ថាប័ន ដើម្បី​រៀបចំ​តំណាង​រាជរដ្ឋាភិបាល​ទៅ​កាពារ​សេចក្តីព្រាងច្បាប់​នៅស្ថាប័ននីតិប្បញ្ញត្តិ

-រៀបចំ​បែបបទថ្វាយ​ព្រះមហាក្សត្រ​សូមឡាយ​ព្រះហស្តលេខាលើ​ព្រះរាជក្រម​ប្រកាស​ឱ្យ​ប្រើ​ច្បាប់

-សម្របសម្រួល​ការងារ​សំណួរ ចម្លើយ​សភា

-អនុវត្តភារកិច្ចផ្សេងៗទៀតដែលនាយករដ្ឋមន្ត្រីប្រគល់ជូន។

លោក វង្សី វិស្សុត រដ្ឋមន្ត្រីទទួលបន្ទុកទីស្តីការគណៈរដ្ឋមន្រ្តី

ទីស្តីការគណៈរដ្ឋមន្ត្រីមានរចនាសម្ព័ន្ធដូចតទៅ៖

១- ខុទ្ទកាល័យ

២- អគ្គនាយកដ្ឋាន

-អគ្គនាយកដ្ឋានរដ្ឋបាលនិងហិរញ្ញវត្ថុ
-អគ្គនាយកដ្ឋានសម្របសម្រួលកិច្ចការទូទៅ
-អគ្គនាយកដ្ឋានសហប្រតិបត្តិការ​អន្តរជាតិ
-អគ្គនាយកដ្ឋានសម្របសម្រួលកិច្ចការផ្ទៃក្នុង
-អគ្គនាយកដ្ឋានសេដ្ឋកិច្ចនិងទេសចរណ៍
-អគ្គនាយកដ្ឋានកិច្ចការសង្គម
-អគ្គនាយកដ្ឋានផលិតកម្ម រៀបចំដែនដី នគរូបនីយកម្ម និងសំណង់
-អគ្គនាយកដ្ឋានរាជកិច្ចនិងតម្កល់ឯកសារជាតិ

៣- នាយកដ្ឋានសវនកម្មផ្ទៃក្នុង

៤- រដ្ឋលេខាធិការដ្ឋានអាកាសចរណ៍ស៊ីវិល និងអង្គភាពចំណុះទីស្តីការគណៈរដ្ឋមន្ត្រី

អគ្គនាយកដ្ឋាននីមួយៗដឹកនាំដោយអគ្គនាយកមួយរូប ​និងអមដោយអគ្គនាយករងមួយចំនួនជាជំនួយការ។ នាយកដ្ឋាននីមួយៗដឹកនាំដោយប្រធានមួយរូប និងមានអនុប្រធានមួយចំនួនជាជំនួយការ។

ខុទ្ទកាល័យ

ខុទ្ទកាល័យនាយករដ្ឋមន្ត្រី និងខុទ្ទកាល័យរដ្ឋមន្ត្រីទទួល​បន្ទុកទីស្តីការ​គណៈរដ្ឋមន្ត្រី​ទទួលបន្ទុក​បេសកកម្ម​​ទាំងឡាយ ដែល​មានកំណត់​ក្នុងអនុក្រឹត្យលេខ១១ អនក្រ.បក ចុះថ្ងៃទី ៣១ ខែមករា ឆ្នាំ២០១៧ ស្តីពីការរៀបចំ​និងការប្រព្រឹត្តទៅ​របស់ខុទ្ទកាល័យ​នាយករដ្ឋមន្ត្រី ឧបនាយករដ្ឋមន្ត្រី ទេសរដ្ឋមន្ត្រី រដ្ឋមន្ត្រី និងរដ្ឋលេខាធិការជាប្រធានស្ថាប័ន និងអនុក្រឹត្យលេខ២០ អនក្រ.បក ចុះថ្ងៃទី៣០ ខែមេសា ឆ្នាំ១៩៩៦ ស្តីពីការរៀបចំនិងការប្រព្រឹត្តទៅរបស់ក្រសួង​និង​រដ្ឋលេខាធិការដ្ឋាន​។

អគ្គនាយកដា្ឋនរដ្ឋបាល និងហិរញ្ញវត្ថុ

អគ្គនាយកដ្ឋានរដ្ឋបាលនិងហិរញ្ញវត្ថុមានតួនាទីនិងភារកិច្ចដឹកនាំ គ្រប់គ្រង និងសម្របសម្រួលកិច្ច ការរដ្ឋបាល បុគ្គលិក ហិរញ្ញវត្ថុ ទ្រព្យសម្បត្តិ​រដ្ឋ ពិធីការ និងការងារ​សន្តិសុខផ្ទៃក្នុង។ អគ្គនាយកដ្ឋានរដ្ឋបាលនិងហរិញ្ញវត្ថុ មាននាយកដ្ឋានចំនួន៤(បួន)៖

-នាយកដ្ឋានរដ្ឋបាល
-នាយកដ្ឋាន​ផ្គត់ផ្គង់​និង​ហិរញ្ញវត្ថុ
-នាយកដ្ឋាន​បុគ្គលិក
-នាយកដ្ឋាន​ពិធីការ

អគ្គនាយកដា្ឋនសម្របសម្រួលកិច្ចការទូទៅ

អគ្គនាយកដ្ឋានសម្របសម្រួលកិច្ចការទូទៅ មានតួនាទីនិងភារកិច្ចរៀបចំ ចាត់ចែង និងសម្រប សម្រួល​ការងារ​សម្រាប់កិច្ចប្រជុំពេញអង្គគណៈរដ្ឋមន្ត្រី កិច្ចប្រជុំអន្តរក្រសួង និង​កិច្ចប្រជុំ​ផ្សេងៗ​ទៀត​ កិច្ចការ​ស្រាវជ្រាវនិងរៀបចំឯកសារសម្រាប់គាំទ្រ​កិច្ចប្រជុំ ការងារ​ប្រព័ន្ធព័ត៌មានវិទ្យា កិច្ចការ​សរុប ធ្វើរបាយការណ៍​ស្ដីពីសកម្មភាពការងាររបស់រាជរដ្ឋាភិបាល​និងការងារឥស្សរិយយស។

អគ្គនាយកដ្ឋានសម្របសម្រួលកិច្ចការទូទៅមាននាយកដ្ឋានចំនួន ៥ (ប្រាំ)៖

-នាយកដ្ឋាន​រៀបចំ​កិច្ច​ប្រជុំ​ពេញ​អង្គ និង​កិច្ច​ប្រជុំផ្សេង​ទៀត​
-នាយកដ្ឋាន​ស្រាវជ្រាវ​និង​រៀបចំ​ឯកសារ​គាំទ្រ​កិច្ច​ប្រជុំ
-នាយកដ្ឋាន​ឯកសារ​អេឡិចត្រូនិក ​និង​ព័ត៌មានវិទ្យា
-នាយកដ្ឋាន​សរុប
-នាយកដ្ឋាន​ឥស្សរិយយស

អគ្គនាយកដា្ឋនសហប្រតិបត្តិការអន្តរជាតិ

អគ្គនាយកដ្ឋានសហប្រតិបត្តិការអន្តរជាតិ មានតួនាទីនិងភារកិច្ចទំនាក់ទំនង និង​សម្របសម្រួល​ជាមួយ​ក្រសួង​ស្ថាប័ននានាពាក់ព័ន្ធនឹងវិស័យទំនាក់ទំនងអន្តរជាតិ​និង​កិច្ចការអាស៊ាន។

អគ្គនាយកដ្ឋានសហប្រតិបត្តិការអន្តរជាតិ មាននាយកដ្ឋានចំនួន២(ពីរ)៖

-នាយកដ្ឋាន​ទំនាក់ទំនង​អន្តរជាតិ
-នាយកដ្ឋាន​អាស៊ាន

អគ្គនាយកដា្ឋនសម្របសម្រួលកិច្ចការផ្ទៃក្នុង

អគ្គនាយកដ្ឋានសម្របសម្រួលកិច្ចការផ្ទៃក្នុង មានតួនាទីនិងភារកិច្ច​ទំនាក់ទំនង​និងសម្របសម្រួល ការងារផ្ទៃក្នុង​ជាមួយក្រសួងមហាផ្ទៃ ក្រសួងការពារជាតិ ក្រសួងយុត្តិធម៌ ស្ថាប័ន​ធម្មនុញ្ញ និង​ក្រសួង​ស្ថាប័នពាក់ព័ន្ធ។

អគ្គនាយកដ្ឋានសម្របសម្រួលកិច្ចការផ្ទៃក្នុងមាននាយកដ្ឋានចំនួន ៣ (បី)៖

-នាយកដ្ឋាន​មហាផ្ទៃ ការពារជាតិ យុត្តិធម៌ ស្ថាប័ន​ធម្មនុញ្ញ
-នាយកដ្ឋាន​មុខងារ​សាធារណៈ ​និង​ទំនាក់ទំនង​ជាមួយ​រដ្ឋសភា ព្រឹទ្ធសភា និង​អធិការកិច្ច
-នាយកដ្ឋាន​ព័ត៌មាន ប្រៃសណីយ៍ និង​ទូរគមនាគមន៍

អគ្គនាយកដា្ឋនសេដ្ឋកិច្ចនិងទេសចរណ៍

អគ្គនាយកដ្ឋានសេដ្ឋកិច្ចនិងទេសចរណ៍​មានតួនាទីនិងភារកិច្ចទំនាក់ទំនង ​និងសម្របសម្រួល ជាមួយ​ក្រសួង​ស្ថាប័ននានាពាក់ព័ន្ធនឹងវិស័យសេដ្ឋកិច្ច ហិរញ្ញវត្ថុ ធនាគារ មីក្រូហិរញ្ញវត្ថុ ឧស្សាហកម្ម សិប្បកម្ម រ៉ែ ថាមពល ពាណិជ្ជកម្ម និងទេសចរណ៍។

អគ្គនាយកដ្ឋានសេដ្ឋកិច្ច និងទេសចរណ៍មាននាយកដ្ឋានចំនួន ៤ (បួន)៖

-នាយកដ្ឋាន​ហិរញ្ញវត្ថុ​និង​ធនាគារ
-នាយកដ្ឋាន​ឧស្សាហកម្ម សិប្បកម្ម រ៉ែ និង​ថាមពល
-នាយកដ្ឋាន​ពាណិជ្ជកម្ម​និងទេសចរណ៍
-នាយកដ្ឋាន​ផែនការ​និង​អភិវឌ្ឍ

អគ្គនាយកដ្ឋានកិច្ចការសង្គម

អគ្គនាយកដ្ឋានកិច្ចការសង្គម​មានតួនាទីនិងភារកិច្ចទំនាក់ទំនង​និងសម្របសម្រួលជាមួយក្រសួង ស្ថាប័ននានា​ពាកព័ន្ធ​វិស័យអបរំ វប្បធម៌ ធម្មការ សាសនា សង្គមកិច្ច កិច្ចការ​នារី ការងារ ការបណ្តុះ​បណ្តាលវិជ្ជាជីវៈ និងសុខាភិបាល។

អគ្គនាយកដ្ឋានកិច្ចការសង្គមមាននាយកដ្ឋានចំនួន ២ (ពីរ)៖

-នាយកដ្ឋាន​សុខាភិបាល សង្គមកិច្ច​និង​កិច្ចការ​នារី
-នាយកដ្ឋាន​អប់រំកាយ ការងារ វប្បធម៌ ធម្មការ សាសនា

អគ្គនាយកដា្ឋនផលិតកម្ម រៀបចំដែនដី នគរូបនីយកម្ម និងសំណង់

អគ្គនាយកដ្ឋានផលិតកម្ម រៀបចំដែនដី នគរូបនីយកម្ម និងសំណង់ មានតួនាទី​និងភារកិច្ចទំនាក់ ទំនង​និងសម្របសម្រួល​ជាមួយក្រសួង ស្ថាប័ននានាពាក់ព័ន្ធនឹងវិស័យកសិកម្ម រុក្ខាប្រមាញ់ និង​នេសាទ ធនធានទឹក​និងឧតុនិយម អភិវឌ្ឍន៍ជនបទ សាធារណការនិងដឹកជញ្ជូន រៀបចំដែនដី នគរូបនីយកម្ម និង សំណង់ បរិស្ថាន និងធនធានធម្មជាតិ។

អគ្គនាយកដ្ឋានផលិតកម្ម រៀបចំដែនដី នគរូបនីយកម្ម និងសំណង់ មាននាយកដ្ឋានចំនួន ៣ (បី)៖

-នាយកដ្ឋាន​កសិកម្ម​ និង​ធនធាន​ទឹក
-នាយកដ្ឋាន​អភិវឌ្ឍ​ជនបទ សាធារណការ​និង​ដឹកជញ្ជូន
-នាយកដ្ឋាន​រៀបចំ​ដែនដី នគរូបនីយកម្ម​ សំណង់ និង​បរិស្ថាន

អគ្គនាយកដ្ឋានរាជកិច្ច និងតម្កល់ឯកសារជាតិ

អគ្គនាយកដ្ឋានរាជកិច្ច និងតម្កល់ឯកសារជាតិមានតួនាទីនិងភារកិច្ចចងក្រង តម្កល់ និងបោះពុម្ព ផ្សាយ​ច្បាប់​និងលិខិតបទដ្ឋានគតិយុត្តនានា ។

អគ្គនាយកដ្ឋានរាជកិច្ច និងតម្កល់ឯកសារជាតិមាននាយកដ្ឋានចំនួន ២ (ពីរ)៖

-នាយកដ្ឋាន​រាជកិច្ច​
-នាយកដ្ឋាន​តម្កល់​ឯកសារ​ជាតិ

នាយកដា្ឋនសវនកម្មផ្ទៃក្នុង

នាយកដ្ឋានសវនកម្មផ្ទៃក្នុង ទទួលបន្ទុកអនុវត្តភារកិច្ចតាមអនុក្រឹត្យលេខ៤០ អនក្រ.បក ចុះ​ថ្ងៃទី​១៥ ខែកុម្ភៈ ឆ្នាំ២០០៥​ស្តីពីការរៀបចំ​និងការប្រព្រឹត្តទៅ​នៃនាយកដ្ឋានសវនកម្មផ្ទៃក្នុង​តាមបណ្តា​ស្ថាប័ន ក្រសួង និង​សហគ្រាសសាធារណៈ។

រដ្ឋលេខាធិការដា្ឋនអាកាសចរណ៍ស៊ីវិល និងអង្គភាពចំណុះទីស្តីការគណៈរដ្ឋមន្តី

រដ្ឋលេខាធិការដ្ឋានអាកាសចរណ៍ស៊ីវិល ចំណុះទីស្តីការគណៈរដ្ឋមន្ត្រី ក្រោមការគ្រប់គ្រងរបស់នាយករដ្ឋមន្ត្រី។

អង្គភាពត្រួតពិនិត្យហិរញ្ញវត្ថុ

អង្គភាពត្រួតពិនិត្យហិរញ្ញវត្ថុ​បង្កើតឡើង​ដោយរដ្ឋមន្ត្រីក្រសួងសេដ្ឋកិច្ច​និងហិរញ្ញវត្ថុ តាម​លក្ខខណ្ឌ​នៃ​បទបញ្ជា​កំណត់ក្នុងអនុក្រឹត្យលេខ៨១ ចុះថ្ងៃទី១៦ ខែវិច្ឆិកា ឆ្នាំ១៩៩៥ ស្តីពីការបង្កើត​សា្ថប័ន ត្រួត​ពិនិត្យហិរញ្ញវត្ថុ​លើចំណាយថវិកាក្នុងបណ្តាក្រសួង៕