តំណាងនិយោជក ដាក់តួលេខថ្មី ២០១.៥០ដុល្លារ ខណៈតំណាងកម្មករ មានតួលេខថ្មីចំនួន ២

ក្រុមប្រឹក្សាជាតិប្រាក់ឈ្នួលអប្បបរមា បានបន្តកិច្ចប្រជុំលើកទី ៥ របស់ខ្លួន នៅព្រឹកថ្ងៃទី ១៨ ខែកញ្ញា ឆ្នាំ ២០២៣ ដើម្បីបន្តពិភាក្សាកំណត់ប្រាក់ឈ្នួលអប្បបរមា ផ្នែកវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរ និងកាបូប សម្រាប់ឆ្នាំ ២០២៤។

កិច្ចប្រជុំនេះ ធ្វើឡើងក្រោមអធិបតីភាពលោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ និងមានការចូលរួមពីភាគីតំណាងកម្មករ-និយោជិត និងភាគីតំណាងនិយោជក។

បន្ទាប់ពីកិច្ចប្រជុំអស់រយៈពេល ៤ម៉ោងមក លោក ហេង សួរ មានប្រសាសន៍ប្រាប់ក្រុមអ្នកសារព័ត៌មានថា ជាលទ្ធផលក្នុងកិច្ចប្រជុំនៅថ្ងៃនេះ ភាគីតំណាងនិយោជក បានដាក់នូវតួលេខថ្មីចំនួន ២០១.៥០ដុល្លារ ជាគោលជំហរចុងក្រោយរបស់ខ្លួន។ ចំណែកភាគីតំណាងកម្មករ-និយោជិត ក៏បានដាក់នូវតួលេខថ្មីចុងក្រោយរបស់ខ្លួនចំនួន ២តួលេខ គឺ ២០៤​ដុល្លារ និង ២១៣ដុល្លារ។

រីឯភាគីរាជរដ្ឋាភិបាល ដែលបានគណនាទៅតាមរូបមន្ត និងតួលេខផ្លូវការ គឺបានកំណត់នូវតួលេខកណ្ដាលមួយ នោះគឺ ២០២ដុល្លារ។ លោក ហេង សួរ បានបញ្ជាក់ថា «ហើយយោងទៅលើអ្វីដែលចែងនៅក្នុងយន្ដការ ក៏ដូចជាច្បាប់ ស្ដីពី ប្រាក់ឈ្នូលអប្បរមានេះ កិច្ចប្រជុំថ្ងៃនេះ លទ្ធផលនៅថ្ងៃនេះ ក្លាយជាគោលជំហរផ្លូវការចុងក្រោយ របស់ភាគីនីមួយៗ ហើយយោងតាមច្បាប់ដោយសារភាគីនីមួយៗ មានតួលេខផ្សេងគ្នា មានន័យថា យើងអត់បានឯកភាពជាឯកច្ឆ័ន ឬកុងសងស៊ីសទេ»។

ដូច្នេះ តាមច្បាប់ត្រូវបើកកិច្ចប្រជុំលើកទី ២ ដើម្បីពិនិត្យទៅលើគោលជំហរចុងក្រោយម្ដងទៀត ហើយប្រសិនបើកិច្ចប្រជុំលើកទី ២ ភាគីនីមួយៗនៅតែរក្សាគោលជំហររៀងៗខ្លួន ដែលមិនមានការឯកភាពជាឯកច្ឆ័ននោះ គឺនឹងមានការបោះឆ្នោត ជ្រើសរើសតួលេខមួយនៅក្នុងកិច្ចប្រជុំ នាថ្ងៃទី ២៨ ខែកញ្ញា ឆ្នាំ ២០២៣តែម្ដង៕