សប្តាហ៍តែមួយ បារាំង-កម្ពុជា ជោគជ័យលើការស្នើដាក់សម្បត្តិវប្បធម៌ និងធម្មជាតិខ្លួន ក្នុងបញ្ជីបេតិកភណ្ឌពិភពលោក

ក្នុងសម័យប្រជុំលើកទី៤៥ នៃគណៈកម្មាធិការបេតិកភណ្ឌពិភពលោក នៅប្រទេសអារ៉ាប៊ីសាអូឌីត កាលពីថ្ងៃទី១៦ ខែកញ្ញា ឆ្នាំ២០២៣ អង្គការសហប្រជាជាតិ បានប្រកាសដាក់បញ្ចូល ភ្នំភ្លើង និងព្រៃតំបន់ភ្នំ Pelée និងភ្នំភាគខាងជើង នៃតំបន់ Martinique ប្រទេសបារាំង ក្នុងបញ្ជីបេតិកភណ្ឌពិភពលោក របស់អង្គការយូណេស្កូ។ ការប្រកាសនេះ គឺមុនមួយថ្ងៃនៃការប្រកាសបញ្ចូល «តំបន់ប្រាសាទកោះកេរ» របស់កម្ពុជា ចូលបញ្ជីបេតិកភណ្ឌពិភពលោក នៅថ្ងៃទី១៧ ខែកញ្ញានេះ ពោលគឺក្នុងសប្តាហ៍តែមួយ។

ប្រទេសបារាំង បានសម្តែងក្តីរីករាយចំពោះការដាក់បញ្ចូលភ្នំសម្បត្តិធម្មជាតិរបស់ខ្លួន ទៅក្នុងបញ្ជីបេតិកភណ្ឌពិភពលោក ដែលបញ្ជាក់ពីការទទួលស្គាល់ លក្ខណៈពិសេសនៃសណ្ឋានដី និងជីវៈចម្រុះដ៏ល្អឯកនៃបេតិកភណ្ឌតំបន់នេះ។

ជាមួយគ្នានេះ តាមរយៈស្ថានទូបារាំងប្រចាំកម្ពុជា ក៏បានសម្តែងការអបអរសាទរចំពោះកម្ពុជា បន្ទាប់ពី «រមណីយដ្ឋានប្រាសាទកោះកេរ» បានបញ្ចូលក្នុងបញ្ជីបេតិកភណ្ឌពិភពលោក របស់អង្គការយូ​ណេស្កូ ព្រមៗគ្នានេះផងដែរ។

ប្រភពដដែលបញ្ជាក់ដែរថា ប្រទេសបារាំង បានគាំទ្រយ៉ាងសកម្មចំពោះការអភិរក្សបេតិក​ភណ្ឌកម្ពុជា តាំងពីឆ្នាំ២០០៩ កន្លងទៅ ហើយសាលាបារាំងចុងបូព៌ា បានដាក់ឱ្យមានកម្មវិធីស្រាវជ្រាវមួយ​ផ្នែកបុរាណវិទ្យា ស្តីពីរមណីយដ្ឋានប្រាសាទកោះកេរ ដោយរួមសហការជាមួយអាជ្ញាធរជាតិអប្សរា៕

អត្ថបទ៖ សុធាវី