លោក វង្សី វិសុទ្ធ ៖ យើងធ្វើការបានល្អហើយ តែបើយឺតពេល វាអាចបាត់បង់នូវតម្លៃ និងលទ្ធផលការងារនោះវិញ

ពាក់ព័ន្ធនឹងកត្តាពេលវេលា  លោក វង្សី វិសុទ្ធ ឧបនាយករដ្ឋមន្ត្រី រដ្ឋមន្ត្រីទីស្ដីការគណៈរដ្ឋមន្ត្រីបានសង្កត់ធ្ងន់ទៅកាន់មន្ត្រីចំណុះឱ្យទីស្ដីការគណៈរដ្ឋមន្ត្រីថា ជួនកាលយើងធ្វើកិច្ចការបានល្អហើយ ក៏ប៉ុន្តែបើយឺតពេល វាអាចធ្វើឲ្យបាត់បង់នូវតម្លៃ និងលទ្ធផលការងារនោះវិញ។

ក្នុងឱកាស ដឹកនាំកិច្ចប្រជុំពិភាក្សាការងារផ្ទៃក្នុង ដើម្បីស្វែងយល់ការលំបាក និងបញ្ហាប្រឈម ផ្សេងៗ លោក  វង្សី វិស្សុត បានដាក់ចេញនូវគោលការណណែនាំមួយចំនួន ជូន ថ្នាក់ដឹកនាំ និងមន្រ្តីរាជការទីស្តីការគណៈរដ្ឋមន្ត្រី យកទៅអនុវត្តឱ្យមានប្រសិទ្ធភាព ពាក់ព័ន្ធនឹង កិច្ចប្រជុំ ពេញ អង្គគណៈរដ្ឋមន្រ្តី ចាប់តាំងពីដំណាក់កាលនៃការរៀបចំ រហូតដល់ការតាមដានការអនុវត្ត ការសម្រេចរបស់គណៈរដ្ឋមន្រ្តី ការរៀបចំកណត់បង្ហាញលើសំណើ និងរបាយការណ៍នានាជូន សម្តេចធិបតី នាយករដ្ឋមន្រ្តី ពិនិត្យ និងសម្រេច ឱ្យបានលឿនទាន់ពេល ច្បាស់លាស់ គុណភាព និងប្រសិទ្ធភាព ព្រមទាំងត្រូវមានត្រូវមានវាយតម្លៃ ការផ្តល់មតិយោបល់ និងជូនជាជម្រើសទាំងក្នុងក្របខណ្ឌ នយោបាយ ច្បាប់ និងក្របខណ្ឌបច្ចេកទេសផ្សេងៗ។

ជាមួយគ្នានេះ លោក វង្សី វិសុទ្ធ បានផ្តល់ការណែនាំពាក់ព័ន្ធនឹងការរៀបចំប្រព័ន្ធនិងលំហូរការងារ ដោយផ្សារភ្ជាប់ជាមួយនឹងការធ្វើបរិវត្តកម្មឌីជីថល ព្រមទាំងការរៀបចំបំពេញរចនាសម្ព័ន្ធមួយចំនួន ហើយអគ្គនាយកដ្ឋាននីមួយៗ ត្រូវរៀបចំផែនការអភិវឌ្ឍស្ថាប័នរបស់ខ្លួន ដើម្បីជាមូលដ្ឋានសម្រាប់ការរៀបចំផែនការយុទ្ធសាស្រ្តថវិកាបីឆ្នាំរំកិលរបស់ទីស្តីការគណៈរដ្ឋមន្រ្តី និងផែនការយុទ្ធសាស្រ្ត៥ឆ្នាំ ដោយរួមបញ្ជូលទាំងផែនការអភិវឌ្ឍធនធានមនុស្សរបស់ទីស្តីការគណៈរដ្ឋមន្រ្តី។

បន្ថែមពីនេះ លោកឧបនាយករដ្ឋមន្ត្រីប្រចាំការក៏បានលើកទឹកចិត្ត ដល់ថ្នាក់ដឹកនាំ និងមន្រ្តីរាជការនៃទីស្តីការគណៈរដ្ឋមន្រ្តី បន្តបង្កើនសមត្ថភាពការងារ តាមរយៈការបើកវគ្គបំប៉ន់ផ្ទៃក្នុង និងតាមរយៈចូលរួមវគ្គបណ្តុះបណ្តាលខ្លី ទាំងក្នុង និងក្រៅប្រទេស ព្រមទាំងសិក្ខាសាលា និងកិច្ចប្រជុំនានា៕

ដោយ៖ ង៉ិល ណារ៉ាត់