សម្ដេចធិបតី ហ៊ុន ម៉ាណែត ៖ រាជរដ្ឋាភិបាល នឹងបង្កើនឲ្យកាន់មុតស្រួចចំពោះកម្មវិធីនយោបាយ ផ្ដល់ប្រយោជន៍ជូនពលរដ្ឋ

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានបញ្ជាក់ថា រាជរដ្ឋាភិបាល អាណត្តិទី ៧ នឹងបង្កើនឲ្យកាន់មុតស្រួចចំពោះកម្មវិធីនយោបាយ ដើម្បីផ្ដល់ប្រយោជន៍ជូនប្រជាពលរដ្ឋ។

ការបញ្ជាក់នេះ បានធ្វើឡើងគ្រាដែលសម្តេចធិបតី ហ៊ុន ម៉ាណែត បានអញ្ជើញជួបសំណេះសំណាលជាមួយកម្មករ-និយោជិតជិត ២ម៉ឺននាក់ នៅក្នុងស្រុកបាទី ខេត្តតាកែវ នាព្រឹកថ្ងៃទី ១៩ ខែកញ្ញា​ ឆ្នាំ ២០២៣នេះ។

សម្ដេចធិបតី ហ៊ុន ម៉ាណែត បានថ្លែងអំណរគុណដល់ប្រជាពលរដ្ឋនៅខេត្តតាកែវ និយាយដោយឡែក និងនិយាយជារួម ប្រជាពលរដ្ឋនៅទូទាំងប្រទេស ដែលបានបោះឆ្នោតជូនគណបក្សប្រជាជនកម្ពុជា បន្តដឹកនាំប្រទេសជាបន្តទៀត។

សម្ដេចនាយករដ្ឋមន្ត្រី មានប្រសាសន៍ថា មានបុគ្គលខ្លះលើកឡើងថា គណបក្សប្រជាជនកម្ពុជា ដាក់ចេញកម្មវិធីនយោបាយដដែលៗ។ ចំណុចនេះ សម្ដេចធិបតី ហ៊ុន ម៉ាណែត បានឆ្លើយតបថា គោលនយោបាយដែលគណបក្សប្រជាជនកម្ពុជា បានដាក់ចេញកន្លងមក និងនៅអាណត្តិទី ៧នេះ គឺដើម្បផលប្រយោជន៍ប្រជាពលរដ្ឋ។

សម្ដេចធិបតី ហ៊ុន ម៉ាណែត មានប្រសាសន៍បែបនេះថា «អ្នកខ្លះគេថា គណបក្សប្រជាជនកម្ពុជា ហ៊ុន ម៉ាណែត កម្មវិធីនយោបាយដដែលៗ គោលនយោបាយដដែលៗ គោលនយោបាយដែលដើរសម្រាប់ប្រជាពលរដ្ឋ គោលនយោបាយដែលបានប្រជាពលរដ្ឋ មានភាពកក់ក្ដៅ ផ្ដល់ការទុកចិត្តហើយ យើងដូរទៅណា យើងមានតែរក្សាលំនឹង ហើយនិងបង្កើនឲ្យកាន់មុតស្រួច ​ជូនប្រជាពលរដ្ឋ នេះហើយជាការយកចិត្តទុកដាក់ និងការប្ដេជ្ញាចិត្តរបស់គណបក្សប្រជាជនកម្ពុជា»៕