សម្ដេចធិបតី ហ៊ុន ម៉ាណែត គូសបញ្ជាក់ថា គោលនយោបាយការបរទេសរបស់កម្ពុជា ជាមួយបណ្ដាប្រទេសនានា គឺគិតផលប្រយោជន៍ជាតិជាធំ

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានគូសបញ្ជាក់ៗថា គោលនយោបាយការបរទេសរបស់កម្ពុជា ជាមួយបណ្ដាប្រទេសនានាទាំងអស់ គឺគិតផលប្រយោជន៍ជាតិជាធំ។ ការគូសបញ្ជាក់នេះ គ្រាដែលសម្តេចធិបតី ហ៊ុន ម៉ាណែត បានអញ្ជើញជួបសំណេះសំណាលជាមួយកម្មករ-និយោជិតជិត ២ម៉ឺននាក់ នៅក្នុងស្រុកបាទី ខេត្តតាកែវ នាព្រឹកថ្ងៃទី ១៩ ខែកញ្ញា​ ឆ្នាំ ២០២៣នេះ។

សម្ដេចធិបតី ហ៊ុន ម៉ាណែត មានប្រសាសន៍ថា គោលនយោបាយរបស់រាជរដ្ឋាភិបាល ក្នុងអាណត្តិទី ៧នេះ គឺប្រកាន់ជំហរនិរន្តភាព សង្គតិភាព ជាមួយនឹងគោលនយោបាយរបស់គណបក្សប្រជាជនកម្ពុជា គឺគោលនយោបាយ ដែលឈរលើមូលដ្ឋានអធិបតេយ្យភាព ឯករាជ្យភាព ផ្អែកលើច្បាប់ អនុវត្តដោយច្នៃប្រឌិត វៃឆ្លាត និងផ្អែកលើមូលដ្ឋានជាតិ តម្កល់នូវមូលដ្ឋាននៃផលប្រយោជន៍ជាតិជាធំ។ នេះជាគោលនយោបាយការបរទេសរបស់កម្ពុជា ជាមួយបណ្ដាប្រទេសនានាទាំងអស់។

សម្ដេចធិបតី ហ៊ុន ម៉ាណែត មានប្រសាសន៍បែបនេះថា «ផលប្រយោជន៍ជាតិជាធំ ប្រកាន់ឯករាជ្យភាព ​​ផ្អែកទៅលើច្បាប់អន្តរជាតិ និងហ្នឹងហើយគឺជាធំ បងប្អូនកុំព្រួយបារម្ភ ធ្វើអ្វីក៏ដោយគិតផលប្រយោជន៍ជាតិជាធំ ជឿចុះមិនអាចទៅបាត់ផលប្រយោជន៍ទេ»។

សម្ដេចនាយករដ្ឋមន្ត្រី បានបញ្ជាក់ដែរថា ដំណើរទស្សនកិច្ចរបស់សម្ដេច ទៅកាន់ប្រទេសចិន កាលពីពេលថ្មីៗនេះ គឺដើម្បីបញ្ជាក់ជំហរនូវគោលនយោបាយការទូតរបស់កម្ពុជា ជាមួយប្រទេសចិន ដោយរក្សានូវគោលជំហរដដែល ព្រោះជាគោលជំហររបស់គណបក្សប្រជាជនកម្ពុជា៕