ការសិក្សារបស់ក្រុមហ៊ុន Visa បានបង្ហាញពីការផ្លាស់ប្ដូរយ៉ាងសំខាន់​នូវឥរិយាបថអ្នកប្រើប្រាស់កម្ពុជា ស្របតាមនិន្នាការ នៃបណ្ដាប្រទេសក្នុងតំបន់អាស៊ីអាគ្នេយ៍

ការសិក្សា​របស់​ក្រុមហ៊ុន Visa បានបង្ហាញ​ពី​កំណើន​ នៃ​ចំណាប់អារម្មណ៍ និង​សន្ទុះ នៃ​ការទូទាត់​ដោយ​មិន​ប្រើប្រាស់​សាច់ប្រាក់​សុទ្ធ​របស់​ប្រជាជន​កម្ពុជា ដែល​ហាក់​ដូចគ្នា​ទៅនឹង​ប្រទេស​ក្នុង​តំបន់​អាស៊ីអាគ្នេយ៍​ផងដែរ​។

ក្រុមហ៊ុន Visa ដែលជា​ក្រុមហ៊ុន​បច្ចេកវិទ្យា​ទូទាត់​សាច់ប្រាក់​តាម​ប្រព័ន្ធ​ឌីជីថល​ឈានមុខ​គេ បាន​ចេញ​ផ្សាយ​ការសិក្សារ​ចុងក្រោយ​របស់ខ្លួន ស្តីពី​ឥរិយាបថ​ទូទាត់​ប្រាក់​របស់​អតិថិជន នៅ​ឆ្នាំ ២០២២ ដែល​បញ្ជាក់​ថា ៖ ចំណាប់អារម្មណ៍ និង​សន្ទុះ នៃ​ការទូទាត់​តាមរយៈ​ឌីជីថល​នៅក្នុង​ប្រទេស​កម្ពុជា មានការ​កើនឡើង ដូចនឹង​និន្នាការ​នៅក្នុង​ការសិក្សា​របស់​ប្រជាជន​ក្នុង​តំបន់​អាស៊ីអាគ្នេយ៍​ដែរ។

កំណើន នៃ​ការ​ទូទាត់​តាមរយៈ​ឌីជីថល បាន និង​កំពុង​បន្ត​បោះជំហាន​ទន្ទឹមគ្នា​ជាមួយ​នឹង​បណ្ដា​ប្រទេស​នៅ​ក្នុង​តំបន់

ការសិក្សា​ស្ទង់​មតិ​ដដែល​នេះ បាន​បង្ហាញថា ចាប់ពី​តាំង​ឆ្នាំ ២០២០ មក ការប្រើប្រាស់​កាត​ឥណទាន​/​ឥណ​ពន្ធ នៅ​កម្ពុជា​មានការ​កើនឡើង​ប្រមាណ ១៣ ភាគរយ ខណៈ​ដែល​ចំណាប់​អារម្មណ៍​របស់គាត់​លើ​ការប្រើប្រាស់​ប្រភេទ​កាត​ដែលមាន​បំពាក់​បច្ចេកវិទ្យា contactless ក៏​កំពុងមាន​ការកើនឡើង​ផងដែរ (​ប្រមាណ​ជា ៥៨ ភាគរយ ធៀប​នឹង​ឆ្នាំ ២០២១ ដែលមាន​ត្រឹម ៤២ ភាគរយ ប៉ុណ្ណោះ​) ដែល​នេះ​ស​បញ្ជាក់​ថា ប្រជាជន​កម្ពុជា​កំពុង​បោះជំហាន​ក្នុងដំណាក់កាល​ស្របគ្នា​ជាមួយ​នឹង​កំណើន នៃ​ការទូទាត់​តាមរយៈ​ឌីជីថល​នៅក្នុង​តំបន់​។

ក្នុង​រយៈពេល​ប៉ុន្មាន​ឆ្នាំ​ចុង​ក្រោយនេះ ពោល​ចាប់តាំងពី​ឆ្នាំ ២០២១ មក ប្រជាជន​កម្ពុជា​ក៏បាន​ផ្តោត​ការ​ចំណាប់អារម្មណ៍​របស់ខ្លួន​ច្រើនជាង​មុន លើ​មុខងារ​សេវា​ធនាគារ​និម្មិត ក្នុងនោះ​មាន​ប្រមាណ​ជា ៣០ ភាគរយ ហើយ​លទ្ធផល​ដែល​ឆ្លុះបញ្ចាំង​ពី​កំណើន​នេះ គឺ​ដើរ​ស្រប​នឹង​និន្នាការ​ក្នុង​តំបន់​សម្រាប់​សេវាកម្ម​ធនាគារ​ឌីជីថល​។ សម្រាប់​អ្នកប្រើប្រាស់​មាន​ប្រមាណ ៩០ ភាគរយ ដែល​និយាយ​ថា​ពួកគេ​មាន​ចំណាប់​អារម្មណ៍​ខ្លាំង​ប្រសិនបើ​សេវា​បែបនេះ នឹង​ផ្តល់​ជូន​ដោយ​ធនាគារ​ប្រពៃណី ហើយ​ប្រមាណ​ជា ៧៦ ភាគរយ ទំនោរ​ទៅ​រក​ធនាគារ​ចំណូល​ថ្មី​។

ដោយសារតែ​ការប្រើប្រាស់​សាច់ប្រាក់​សុទ្ធ​នៅតែ​បន្ត​យ៉ាង​ទូលំទូលាយ វា​បាន​ក្លាយជា​ហេតុផល​មួយ​ដែល​នាំ​ឲ្យ​ប្រទេស​កម្ពុជា​មាន​ភាព​យឺតយ៉ាវ​សម្រាប់​ការទទួលយក​នូវ​វិធីសាស្ត្រ​ទូទាត់​តាមរយៈ​ប្រព័ន្ធ​ឌីជីថល​ថ្មីៗ​ទៀត បើ​ប្រៀបធៀប​នឹង​បណ្តា​ប្រទេសជិតខាង​ក្នុង​តំបន់ តែ​វា​ក៏បាន​បង្ហាញ​ពី​សក្ដានុពល នៃ​ឱកាស​ទីផ្សារ​ដ៏​ធំ​ដែល​មិនទាន់​ត្រូវបាន​ប្រើប្រាស់​ពេញលេញ សម្រាប់​ម្ចាស់​អាជីវកម្ម​លក់រាយ និង ធនាគារ ដែល​ផ្តោត​ខ្លាំង​លើ​សមត្ថភាព នៃ​សេវាកម្ម​ឌីជីថល និង ធនាគារ​ចល័ត របស់​ពួកគេ ក្នុង​កិច្ចការ​ប្រកួតប្រជែង​គុណសម្បត្តិ ដើម្បី​ទទួលបាន​នូវ​អត្ថប្រយោជន៍​ផងដែរ។

វិស័យ​សំខាន់ៗ​ដែល​ទំនងជា​ទទួលបាន​អត្ថប្រយោជន៍​ពី​ការធ្វើ​ឌីជីថល​នីយកម្ម នៃ​សង្គម​កម្ពុជា​មាន​ដូចជា អាជីវកម្ម ខ្នាត​មីក្រូ ខ្នាតតូច និង មធ្យម។ អ្នកប្រើប្រាស់​ដែល​បាន​ចូលរួម​ស្ទង់​មតិ ប្រមាណ ៧៦ ភាគរយ បាន​និយាយថា​ពួកគេ​ទិញ​ទំនិញ​នៅតាម​បណ្តា​អាជីវកម្ម ខ្នាត​មីក្រូ ខ្នាតតូច និង​មធ្យម យ៉ាងហោចណាស់​ម្តង​ក្នុង​មួយ​សប្ដាហ៍ និង​បាន​ប្រើប្រាស់​ការទូទាត់​ជា​សាច់ប្រាក់​សុទ្ធ​មាន​ប្រមាណ​ជា ៦៦ ភាគរយ ទើប​មានការ​ស្នើ​ឲ្យ​បណ្តា​ម្ចាស់​អាជីវកម្ម ខ្នាត​មីក្រូ ខ្នាតតូច និង​មធ្យម គិតគូរ​លើ​ដំណោះស្រាយ នៃ​ការ​ជ្រើស​ប្រើ វិធីសាស្ត្រ​ទូទាត់​តាមរយៈ​ឌីជីថល ដែលមាន​ភាព​ងាយស្រួល និង​តម្លាភាព ដើម្បី​ផ្តល់​បទពិសោធន៍​ដល់​អតិថិជន​ឲ្យ​កាន់តែ​ប្រសើរឡើង និង​ដើម្បី​អភិវឌ្ឍន៍​នូវ​កំណើន​អាជីវកម្ម​ផងដែរ​។

អ្នកស្រី Ivana Tranchini នាយិកា​គ្រប់គ្រង​ក្រុមហ៊ុន Visa ប្រចាំ​ប្រទេស​កម្ពុជា បាន​មានប្រសាសន៍ថា​៖ “​តាមរយៈ​របាយការណ៍ នៃ​ការសិក្សា វា​បាន​ឆ្លុះបញ្ចាំង​ពី​ការបោះ​ជំហាន​ដ៏​អស្ចារ្យ​របស់​ប្រទេស​កម្ពុជា ក្នុងការ​ទទួលយក​វិធីសាស្ត្រ​ទូទាត់​ដោយ​មិន​ប្រើប្រាស់​សាច់ប្រាក់​សុទ្ធ និង​ឱកាស​សម្រាប់​ម្ចាស់​អាជីវកម្ម និង​អ្នកផ្តល់​សេវា​ទូទាត់​ប្រាក់ ដើម្បី​បំពេញតម្រូវការ​ដែល​កំពុង​តែមាន​សន្ទុះ​កើន​ឡើង​នេះ​ផងដែរ​”។ អ្នកស្រី​បន្តទៀតថា​៖ “​នេះ​គឺជា​ពេលវេលា​ដ៏​គួរ​ឲ្យ​រំភើប​មួយ សម្រាប់​ដំណើរការ​ផ្លាស់ប្ដូរ​ទៅរក​ប្រព័ន្ធ​ឌីជីថល​របស់​ប្រទេស​កម្ពុជា ឆ្ពោះទៅរក​សង្គម​ដែល​មិន​ប្រើប្រាស់​សាច់ប្រាក់​សុទ្ធ ហើយ​សម្រាប់​ក្រុមហ៊ុន Visa នឹង​ប្ដេជ្ញា​ផ្តល់ជូន​អ្នកប្រើប្រាស់ និង​ម្ចាស់​អាជីវកម្ម នូវ​បណ្តាញ នៃ​ប្រព័ន្ធ​ទូទាត់​ប្រាក់​តាមរយៈ​ឌីជីថល​មួយ​ដែល​ភាពងាយស្រួល គួរ​ឲ្យ​ទុកចិត្តបាន និង​មាន​សុវត្ថិភាព​ខ្ពស់”។

ការ​លេចឡើង នៃ​ឥរិយាបថ​គ្រប់គ្រង​ហិរញ្ញវត្ថុ​ថ្មី​

តាមរយៈ​ការសិក្សា​មួយ​នេះ បានបង្ហាញ​ពី​ការជះឥទ្ធិពល​លើ​លំនាំ​ចំណាយ​នៅ​ទូទាំង​តំបន់ ដែល​បណ្តាល​មកពី​ផល​ប៉ះទង្គិច នៃ​ការរីក​រាលដាល​ជំងឺ​កូវីដ​-១៩។ ប្រជាជន​កម្ពុជា​ភាគច្រើន​និយាយថា ពេលនេះ​ពួកគេ​សន្សំ​បាន​កាន់តែច្រើន​សម្រាប់​អនាគត (​ប្រមាណ ៧៥ ភាគរយ​) និង​កំហិត​ថវិកា​សម្រាប់​ចំណាយ​លើ​តម្រូវ​ការចាំបាច់ ដូចជា អាហារ និង​ការថែទាំ​សុខភាព (​ប្រមាណ ៧៤ ភាគរយ​) បាន​ច្រើនជាង​មុន ស្របតាម​មធ្យមភាគ​ក្នុង​តំបន់។

ការទិញ​ទំនិញ​ដោយ​ប្រើប្រាស់​វិធីសាស្ត្រ​បង់​រំលស់​ក្នុង​ទម្រង់​បែប​ថ្មី ដូចជា គម្រោង​ទិញ​ឥលូវ​នេះ ទូទាត់​នៅពេល​ក្រោយ (BNPL) ក៏បាន​ក្លាយជា​ការពេញនិយម​នៅក្នុង​ប្រទេស​កម្ពុជា​ផងដែរ មាន​ប្រមាណ​ជា ៨១ ភាគរយ នៃ​អ្នកប្រើប្រាស់​ដែល​បាន​ចូលរួម​ស្ទង់​មតិ​បាន​និយាយថា ពួកគេ​បាន​ប្រើប្រាស់​គម្រោង​ទិញ​ឥលូវ​នេះ ទូទាត់​នៅពេល​ក្រោយ (BNPL) មាន​ប្រមាណ​ជា ៦៩ ភាគរយ ដែល​ចំនួន​នេះ​លើសពី​មធ្យមភាគ​ក្នុង​តំបន់ និង​ដើរ​យឺតៗ​ប្រដេញ​ជាមួយ ប្រទេស​វៀតណាម ដែល​មាន​ប្រមាណ​ជា ៨៣ ភាគរយ​។ ប្រជាជន​កម្ពុជា ក៏​ជាប់​ចំណាត់ថ្នាក់​ឈានមុខ​គេ សម្រាប់​ការ​ប្រើប្រាស់ គម្រោង ទិញ​ឥលូវ​នេះ ទូទាត់​នៅពេល​ក្រោយ (BNPL) ក្នុង​រយៈពេល​ពីរ​ឆ្នាំ​មកនេះ​ផង​ដែរ បើ​គិត​ជា​មធ្យមភាគ​ប្រមាណ​ជា ៦.៦ ក្នុងចំណោម​មនុស្ស​ម្នាក់ ក្រោម​ប្រទេស​ឥណ្ឌូណេស៊ី ដែល​មាន​មធ្យមភាគ​ប្រមាណ​ជា ៧.៦ និង​ច្រើនជាង​មធ្យមភាគ នៃ​ផែនការ​កំណត់​ក្នុង​តំបន់ ដែល​គិត​ត្រឹមតែ ៥.៩ ប៉ុណ្ណោះ។

រួមជាមួយ​ប្រភេទ​កាត​ឥណទាន គម្រោង​ទិញ​ឥលូវ​នេះ ទូទាត់​នៅពេល​ក្រោយ (BNPL) ផ្តល់​ឲ្យ​ធនាគារ​នូវ​ឧបករណ៍​មួយ ដើម្បី​គាំទ្រ​អតិថិជន​ដែល​ប្រឈមមុខ​នឹង​ការលំបាក តាមរយៈ​ការ​ផ្តល់នូវ​ហិរញ្ញប្បទាន​រយៈពេល​ខ្លី ដែល​អនុញ្ញាតឲ្យអតិថិជន​ផ្លាស់ប្តូរ​ទៅរក​ទម្រង់​ឥណទាន ផ្សេង​មួយទៀត ជួយ​កសាង​នូវ​ប្រវត្តិ​ឥណទាន និង​ស្ថិរភាព​ហិរញ្ញវត្ថុ​របស់​ពួកគេ​។ នៅក្នុង​ប្រទេស​/​តំបន់ ផ្សេងទៀត ធនាគារ​ជាច្រើន​បាន​ប្រើប្រាស់ គម្រោង​ទិញ​ឥលូវ​នេះ ទូទាត់​នៅពេល​ក្រោយ (BNPL) ដោយ​ជោគជ័យ សម្រាប់​ការផ្តល់​ឥណទាន និង​ការធ្វើ​បរិយាបន្ន​ឥណទាន។

ក្នុង​កិច្ចខិតខំ​ប្រឹងប្រែង​រក​មធ្យោបាយ​ដើម្បី​លើកកម្ពស់​ការប្រើប្រាស់​សេវាកម្ម​ធានារ៉ាប់រង និង​ស្វះ​ស្វែងរក​ដំណោះស្រាយ​ផែនការ​ហិរញ្ញវត្ថុ​ផ្សេងៗ​ទៀត ថ្មីៗ​នេះ ក្រុមហ៊ុន Visa បានប្រកាស​ផ្តល់ជូន​ប្រជាជន​កម្ពុជា​នូវ​ប័ណ្ណ​ទឹកប្រាក់​ទិញ​ទំនិញ​តាម​អន​ឡាញ​របស់​ផ្សារ​ទំនើប អេ​អន (Aeon e-voucher) នូវ​រៀង​រាល់ពេល​ទិញ​ផលិតផល​ធានារ៉ាប់រង​ឌីជីថល​ពី​ក្រុមហ៊ុន​ព្រូ​ដិ​នស​ល និង​ទូទាត់​ជាមួយ Visa កាត ដែល​ការផ្តល់ជូន​នេះ មាន​សុពលភាព​រហូតដល់​ថ្ងៃទី ៣១ ខែតុលា ឆ្នាំ ២០២៣។

“​ដំណោះស្រាយ​ការទូទាត់​តាមរយៈ​ឌីជីថល ដើរតួនាទី​យ៉ាងសំខាន់​ក្នុងការ​ផ្តល់នូវ​តម្លាភាព និង​ទិន្នន័យ​ដើម្បី​គ្រប់គ្រង​ប្រាក់​ប្រកបដោយ​ប្រសិទ្ធភាព​”​។ នេះ​បើតាម​ការបញ្ជាក់​បន្ថែម​របស់​អ្នកស្រី Tranchini ។ អ្នកស្រី​បន្តទៀតថា​៖ “​ធនាគារ គួរតែ​គិតគូរ​អំពី​ចំណុច​ទាំងអស់នោះ ព្រមទាំង​គិតគូរ​ពី​ការនាំយក​ការដាក់បញ្ចូល​នូវ​ផលិតផល​ទាំងនោះ ទៅក្នុង​មុខងារ​ធនាគារ​ចល័ត​របស់ខ្លួន ក៏ដូចជា​ការលើកទឹកចិត្ត​ប្រជាជន​កម្ពុជា​ឱ្យ​បន្ត​ប្រើប្រាស់​វិធីសាស្ត្រ​គ្រប់គ្រង​លុយ​ប្រកបដោយ​ការ​ទទួល​ខុសត្រូវ ដូចជា​ការប្រើប្រាស់​គម្រោង ទិញ​ឥលូវ​នេះ ទូទាត់​នៅពេល​ក្រោយ (BNPL) ការប្រើប្រាស់​កាត​ឥណទាន និង​ការទទួលយក​សេវាកម្ម​ធានារ៉ាប់រង​ជាដើម”។

របាយការណ៍ នៃ​ការសិក្សា​នេះ​ក៏បាន​បង្ហាញ​ពី​កំណើន នៃ​ការប្តេជ្ញាចិត្ត​កាន់តែខ្លាំង​ឡើង​របស់​អ្នក​ប្រើប្រាស់​កម្ពុជា ក៏ដូចជា​ប្រជាជន​ក្នុង​តំបន់ ក្នុងការ​គិតគូរ​ដល់​បរិស្ថាន​ផងដែរ តាមរយៈ​ការ​សម្រេចចិត្ត​លើ​ការចំណាយ រួមទាំង​សកម្មភាព​ផ្សេងៗ​របស់​ពួកគេ ចំណាប់អារម្មណ៍​លើ​ម៉ាក​ដែល​ផ្តោត​នឹង​យកចិត្តទុកដាក់​លើ​និរន្ត​ភាព នៃ​បញ្ហា​បរិស្ថាន សង្គម និង​អភិបាលកិច្ច (ESG) និង​សូម្បីតែ​ការ​ចំណាយ​ប្រាក់​លើ​ផលិតផល​របស់​ក្រុមហ៊ុន​ប្រភេទ​នោះ​ច្រើន​បែប​ណា​ជាដើម​។

ក្រុមហ៊ុន Visa សម្រេចបាន​នូវ​យុទ្ធសាស្ត្រ​អព្យាក្រឹតភាព​កាបូន​នៅ​គ្រប់​ប្រតិបត្តិការ​របស់ខ្លួន​លើ​ប្រសិទ្ធភាព​ថាមពល ហើយ​ប្តេជ្ញា​សម្រេច​ឲ្យ​បាន​នូវ​ការកាត់បន្ថយ​ការ​បំ​ភាយ​ឧស្ម័ន​ផ្ទះ​កញ្ចក់​ឲ្យ​ជិត​ដល់​សូន្យ ត្រឹម​ឆ្នាំ ២០៤០ ដែលជា​រយៈពេល​យ៉ាងហោចណាស់ ១០​ឆ្នាំ​ទៀត មុនពេល​ដល់​ថ្ងៃ​កិច្ចព្រមព្រៀង​ទីក្រុង​ប៉ារីស​ស្ដីពី​ការប្រែប្រួល​អាកាសធាតុ​។

អំពី​ក្រុមហ៊ុន Visa Inc.

Visa Inc. (NYSE: V) គឺជា​ក្រុមហ៊ុន​នាំមុខគេ​ក្នុង​បច្ចេកវិទ្យា​ទូទាត់​សាច់ប្រាក់​តាមរយៈ​ឌីជីថល ដែល​ជួយ​សម្រួល​ដល់​ប្រតិបត្តិការ​រវាង​អ្នកប្រើប្រាស់ ពាណិជ្ជករ ស្ថាប័នហិរញ្ញវត្ថុ និង​ស្ថាប័ន​រដ្ឋាភិបាល​ដែល​ពាក់ព័ន្ធ ច្រើនជាង ២០០ ប្រទេស និង តំបន់ ជា​រៀងរាល់ឆ្នាំ​។ បេសកកម្ម​របស់​យើង​គឺ​ផ្សារភ្ជាប់​ពិភពលោក​ទាំងមូល តាមរយៈ​ការតភ្ជាប់​បណ្តាញ​ទូទាត់​ប្រាក់​ប្រកបដោយ​ភាព​ច្នៃប្រឌិត​ថ្មី ងាយស្រួល អាច​ទុកចិត្តបាន និង​មាន​សុវត្ថិភាព​បំផុត ដែល​អនុញ្ញាត​ឲ្យ​អ្នកប្រើប្រាស់ អាជីវករ និង​សេដ្ឋកិច្ច​មានការ​រីកចម្រើន​។ យើង​ជឿជាក់ថា​សេដ្ឋកិច្ច​ដែល​រួមបញ្ចូល​មនុស្ស​គ្រប់រូប នៅ​គ្រប់​តំបន់ នឹង​ជួយ​ដល់​ការអភិវឌ្ឍ​នៅ​គ្រប់​ទីកន្លែង ហើយ​យើង​មើលឃើញថា នេះ​គឺជា​មូលដ្ឋានគ្រឹះ នៃ​ចរន្ត​សាច់ប្រាក់​។ ស្វែងយល់​បន្ថែម​តាមរយៈ Visa.com៕

សម្រាប់​ព័ត៌មាន​បន្ថែម សូម​ទំនាក់ទំនង ៖

​កញ្ញា ត្រាង ង្វៀន (Trang Nguyen)​ ​ ​ ​កញ្ញា គ្រី សុ​វណ្ណា​រី​

Head of Corporate Communications​ ​ក្រុមហ៊ុន Red Dot (Cambodia) Co., Ltd

Visa Vietnam, Cambodia and Laos ​ ​ ​តំណាង​ក្រុមហ៊ុន Visa Inc.

​ទូរស័ព្ទ ៖ +84 902 831 891​ ​ ​ ​ ​ទូរស័ព្ទ ៖ +855 11733368

​អ៊ីមែល​៖ [email protected] ​ ​ ​អ៊ីមែល​៖ [email protected]