នៅថ្ងៃស្អែក សម្ដេច ពិន សែម នឹងទូងស្គរ ដើម្បីអបអររមណីយដ្ឋានប្រាសាទកោះកេរ ចូលជាសម្បត្តិបេតិកភណ្ឌពិភពលោក

លោក វណ្ណ ប៊ុណ្ណា ប្រធានមន្ទីរធម្មការខេត្តសៀមរាបបានបញ្ជាក់ថា សម្ដេច ពិន​ សែម ចៅអធិការវត្តរាជបូណ៍ខេត្តសៀមរាប នឹងទូងស្គរ ដើម្បីអបអររមណីយដ្ឋានប្រាសាទកោះកេរ ដែលចូលជាសម្បត្តិបេតិកភណ្ឌពិភពលោក។

លោកវណ្ណ ប៊ុណ្ណា បានឱ្យដឹងនៅរសៀលថ្ងៃទី ១៩ខែកញ្ញាឆ្នាំ២០២៣នេះថា ដោយអនុវត្តតាមការណែនាំរបស់ប្រមុខនៃរាជរដ្ឋាភិបាលកម្ពុជា រៀបចំវាយគង ជួង រគាំង ទូងស្គរ និងគោះត្រដោក តាមវត្តអារាម មណ្ឌលវិបស្សនា អាស្រម សាលាបុណ្យ វិហារសាសនា ស្នាក់ការ ស៊ូរ៉ាវ សាលារៀនមានចរិតសាសនាផ្សេងៗ រួមទាំងមន្ទីរធម្មការ និងសាសនា ចូលរួមអបអរសាទរទិវាជាប្រវត្តិសាស្ត្រ ដែលគណៈកម្មាធិការបេតិកភណ្ឌពិភពលោក នៃអង្គការយូណេស្កូ បានសម្រេចជាឯកច្ឆ័ន្ទចុះ “រមណីយដ្ឋានប្រាសាទកោះកេរ” ទៅក្នុងបញ្ជីបេតិកភណ្ឌ ពិភពលោក។

ការអបអរសាទរទិវាជាប្រវត្តិសាស្ត្រ ដែលគណៈកម្មាធិការ របេតិកភណ្ឌពិភពលោកនៃអង្គការយូណេស្កូ បានសម្រេចជាឯកច្ឆ័ន្ទចុះ “រមណីយដ្ឋានប្រាសាទកោះកេរ” ទៅក្នុងបញ្ជី បេតិកភណ្ឌពិភពលោក នាថ្ងៃទី១៧ ខែកញ្ញា ឆ្នាំ២០២៣ ក្រសួងសូមឱ្យប្រធានមន្ទីរធម្មការ និងសាសនា រាជធានី ខេត្ត សហការឱ្យបានជិតស្និទ្ធបំផុតជាមួយ ព្រះមេគណ ព្រះអនុគណ ព្រះចៅអធិការ និងថ្នាក់ដឹកនាំសាសនាផ្សេងៗ ទូទាំងព្រះរាជាណាចក្រកម្ពុជា ត្រៀមរៀបចំវាយគង ជួង រគាំង ទូងស្គរ និងគោះត្រដោក តាមគ្រប់មធ្យោបាយ ដែលខ្លួនមាន នៅថ្ងៃពុធ ៦កើត ខែភទ្របទ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី២០ ខែកញ្ញា ឆ្នាំ២០២៣ វេលាម៉ោង ៧:០០នាទីព្រឹក ឱ្យបានព្រមៗគ្នា កុំបីអាក់ខានឡើយ៕

អត្ថបទដោយ៖ កុសល