ខណ្ឌរដ្ឋបាលជលផលកំពង់ចាម បន្តចុះបង្ក្រាប បទល្មើសនេសាទ និងឃាត់ខ្លួនមនុស្ស៦នាក់ នៅស្រុកកងមាស

ខណ្ឌរដ្ឋបាលជលផលកំពង់ចាម សហការជាមួយកងកម្លាំងសមត្ថកិច្ច បន្តចុះបង្ក្រាប បទល្មើសនេសាទ បឹងបេ៦ ដែលស្ថិតនៅក្នុងភូមិសាស្ត្រ ស្រុកកងមាស និងស្រុកបាធាយ ខេត្តកំពង់ចាម នារដូវត្រីពងកូន នៅថ្ងៃទី ១៩ ខែកញ្ញា ឆ្នាំ២០២៣។

ការចុះបង្ក្រាបបទល្មើសនេសាទនេះ ដោយមានការចង្អុលបង្ហាញពីលោក អ៊ុន ចាន់ដា អភិបាលនៃគណៈអភិបាលខេត្តកំពង់ចាម ខណ្ឌរដ្ឋបាលជលផលកំពង់ចាម ដឹកនាំកម្លាំងដោយ លោក អ៊ុក ណារិន នាយខណ្ឌជលផលកំពង់ចាម បានសហការ ជាមួយអាជ្ញាធរស្រុកកងមាស កម្លាំងសមត្ថកិច្ច សហគមន៍នេសាទបឹងបេ៦ អង្គការអភិរក្សធនធានជលផល និងមានការអនុញ្ញាតពីលោក វង្ស ប៊ុនវិសុទ្ធ ព្រះរាជអាជ្ញាអយ្យការអមសាលាដំបូងខេត្តកំពង់ចាម បានបន្តចុះទប់ស្កាត់ និងបង្រ្កាបបទល្មើសជលផលបានចំនួន៨ករណី និងឃាត់ខ្លួនមនុស្សបាន៦នាក់។

លោក អ៊ុក ណារិន នាយខណ្ឌជលផលកំពង់ចាម បានបញ្ជាក់ឲ្យដឹងថា ជាលទ្ធផល ក្នុងប្រតិបត្តិការបង្ក្រាបនេះដែរ កម្លាំងសមត្ថកិច្ចបានធ្វើការរុះរើបំផ្លាញ់ចោលវត្ថុតាងនៃបទល្មើសជលផលនៅនឹងកន្លែង ក្នុងនោះមាន ឧបករណ៍រ៉ាវសរុប៣២មាត់, ឧបករណ៍លូស្បៃមុងចំនួន២១មាត់, របាំងរ៉ាវសុប១៣៣០ម៉ែត្រ, ស្បៃមុងសរុបប្រវែង៣០០ម៉ែត្រ, បង្គោលចម្រឹងចំនួន១២៧៥ដើម និងធ្វើការប្រលែងកូនត្រីចម្រុះ២២គីឡូក្រាម។

ទន្ទឹមនឹងនេះដែរ លោក អ៊ុក ណារិន នាយខណ្ឌជលផលកំពង់ចាម ក៍បានផ្សព្វផ្សាយអំពាវនាវបន្ថែមដល់ប្រជាពលរដ្ឋ ដែលរស់នៅតាមតំបន់ទន្លេ បឹង បួរ ព្រែក និងប្រភពត្រីពង សូមកុំប្រើប្រាស់ឧបករណ៍នេសាទខុសច្បាប់ ដោយធ្វើយ៉ាងណាថែរក្សាតំបន់ជំរកត្រីពងកូន និងរួមគ្នានេសាទឲ្យបានត្រឹមត្រូវទៅតាមច្បាប់ជលផលដែលបានកំណត់៕

អត្ថបទ និងរូបភាព៖ ឡេក ចាន់ពេជ្រ