ព័ត៌មានជាតិ

អង់គ្លេស កំពុងសម្លឹងមើលពីធនធានសក្តានុពលដែលខេត្តកោះកុងកំពុងមាន

បានផុស

១ year មុន

នៅ

ថ្ងៃពុធ ២០ កញ្ញា ២០២៣

ដោយ

កោះកុង ៖ ឯកអគ្គរាជទូតអង់គ្លេសប្រចាំនៅកម្ពុជា កំពុងសម្លឹងមើលឃើញពីធនធានសក្តានុពលសំខាន់ ដែលខេត្តកោះកុងមានអំណោយផល និងជំរុញដល់ការអភិវឌ្ឍន៍ទៅថ្ងៃមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ធនធានជីវៈចម្រុះបម្រើដល់វិស័យទេសចរណ៍ កសិកម្ម តំបន់សេដ្ឋកិច្ចឧស្សាហកម្ម កំពង់ផែសមុទ្រទឹកជ្រៅ និងព្រលានយន្តហោះនៅតំបន់តារាសាគរ ទាំងនេះដែលខេត្តកោះកុងមាន ត្រូវបានស្ថានទូតអង់គ្លេសប្រចាំនៅកម្ពុជាកំពុងមានការចាប់អារម្មណ៍ខ្លាំង។

ប្រាប់កម្ពុជាថ្មីនៅថ្ងៃទី២០ ខែកញ្ញា ឆ្នាំ២០២៣ លោកស្រី អ៊ី នារីនេត អភិបាលរងខេត្តកោះកុង លើកឡើងថា អង់គ្លេសមានបំណងចង់ជួយនាំចេញផលិតផលសម្រេចបានផ្នែកវិស័យកសិកម្មទៅប្រទេសអង់គ្លេសទៅថ្ងៃមុខ ព្រោះឃើញថា ខេត្តកោះកុង សំបូរទៅដោយដំណាំសក្តានុពលជាច្រើន រួមមាន៖ ផ្លែចេកអំបូងលឿន ទុរេ សាម៉ៅ មង្ឃុត និងគ្រាប់ស្វាយចន្ធី ជាដើម។

លោកស្រីអភិបាលរងខេត្តកោះកុង បន្ថែមថា ស្ថានទូតអង់គ្លេសប្រចាំនៅកម្ពុជា ក៏បានកោតសរសើរពីល្បឿននៃការអភិវឌ្ឍន៍វិនិយោគលើវិស័យទេសចរណ៍ ការដឹកជញ្ជូនទំនិញពាណិជ្ជកម្ម ព្រមទាំងក្រុមហ៊ុនឧស្សាហកម្មសំខាន់ៗ ខណៈមានកំពង់ផែសមុទ្រទឹកជ្រៅ ព្រលានយន្តហោះ និងរមណីយដ្ឋានតារាសាគរកែច្នៃផងដែរ។

ក្រៅពីនេះ អង់គ្លេស គ្រោងជួយគាំទ្រវិស័យអប់រំដែលផ្តោតទៅលើក្មេងស្រី និងស្ត្រី ដែលនៅឆ្ងាយដាច់ស្រយោលតាមទីជនបទក្នុងភូមិសាស្ត្រខេត្តកោះកុង។ ទន្ទឹមនោះ លោកស្រី អ៊ី នារីនេត អភិបាលរងខេត្តកោះកុង ក៏ថ្លែងអំណរអរគុណយ៉ាងជ្រោលជ្រៅជូនចំពោះការចាប់អារម្មណ៍អំពីធនធានសក្តានុពលរបស់ខេត្តកោះកុងដែលកំពុងមានស្រាប់ ដោយសំដៅធ្វើយ៉ាងណាបង្កើនទំនាក់ទំនងសាមគ្គីភាព និងលើកកម្ពស់អភិវឌ្ឍន៍សេដ្ឋកិច្ចជាចំណេះដឹង ក៏ដូចជាផ្តល់ប្រាក់ចំណូលជូនប្រជាពលរដ្ឋខេត្តភាគនិរតីមួយនេះ។

ចំណែកឯលោក ដូមីនីក វិលៀមស៍ ឯកអគ្គរាជទូតអង់គ្លេសប្រចាំនៅកម្ពុជា ក្នុងដំណើរទស្សនកិច្ចរបស់លោក លោកបានឃើញនូវវិស័យសក្តានុពលជាច្រើនដែលខេត្តកោះកុងពិតប្រាកដ។

លោកឯកអគ្គរាជទូតអង់គ្លេសរូបនេះ សង្កត់ធ្ងន់ដែរថា អង់គ្លេសធ្លាប់តែទិញគ្រាប់ស្វាយចន្ធីពីប្រទេសវៀតណាម ប៉ុន្តែឥឡូវចង់ជួយគាំទ្រផលិតផលអង្ករ និងគ្រាប់ស្វាយចន្ធីពីកម្ពុជា ក្នុងគោលដៅលើកកម្ពស់ជីវភាពប្រជាពលរដ្ឋតាមមូលដ្ឋានមានការងារ និងប្រាក់ចំណូលប្រចាំថ្ងៃ។

ទោះយ៉ាងណា លោក ដូមីនីក វិលៀមស៍ អះអាងថា ការងារទាំងនេះទាមទារឱ្យមានការសិកសិក្សាស្វែងយល់បន្ថែមសិនទៅលើលក្ខខណ្ឌ ឬបែបបទតម្រូវឱ្យធ្វើទៅតាមស្តង់ដារ មុននឹងមានការនាំចេញទៅអង់គ្លេស៕

អត្ថបទ ៖ សិរីវឌ្ឍនៈ