ស្នងការរងរាជធានីភ្នំពេញ ២រូប ត្រូវបានតែង តាំងជាអគ្គស្នងការរងនគរបាលជាតិ

ប្រមុខរាជរដ្ឋាភិបាលកម្ពុជា សម្ដេចធិបតី ហ៊ុន ម៉ាណែត បានសម្រេចតែងតាំងនាយនគរបាលថ្នាក់ឧត្តមសេនីយ៍ទោចំនួន ២រូបថែមទៀត ឱ្យកាន់តំណែងជាអគ្គស្នងការរងនគរបាលជាតិ។ នេះបើតាមអនុក្រឹត្យរបស់សម្ដេចធិបតី ចុះថ្ងៃទី១៩ ខែកញ្ញា ឆ្នាំ២០២៣ ដែលទើបផ្សព្វផ្សាយនៅថ្ងៃនេះ។

មាត្រា១ នៃអនុក្រឹត្យនេះ បានសម្រចតែងតាំងមុខតំណែងលោកឧត្តមសេនីយ៍ទោ សុង លី អត្តលេខ ០២២៩៣ និងលោកឧត្តមសេនីយ៍ទោ ចេវ ហាក់ អត្តលេខ ០៩៧៣៤ ជាអគ្គស្នងការរងនៃអគ្គស្នងការដ្ឋាននគរបាលជាតិ។

មុនទទួលបានការតែងតាំងមុខតំណែងថ្មី នាពេលនេះ ឧត្តមសេនីយ៍ទោ សុង លី និងឧត្តមសេនីយ៍ទោ ចេវ ហាក់ មានតួនាទីជាស្នងការរងនគរបាលរាជធានីភ្នំពេញ។ ក្នុងតួនាទីជាស្នងការរងនគរបាលរាជធានីភ្នំពេញ ឧត្តមសេនីយ៍ទោ សុង លី ធ្លាប់ទទួលបន្ទុកលើផែនការងារព្រហ្មទណ្ឌ ខណៈឧត្តមសេនីយ៍ទោ ចេវ ហាក់ ទទួលបន្ទុកលើផែនការងារនគរបាលចរាចរណ៍ និងធ្លាប់ធ្វើជាប្រធានការិយាល័យនគរបាលចរាចរណ៍ជាច្រើនឆ្នាំ៕