ព័ត៌មានជាតិ

ឆ្នាំនេះ បេក្ខជនគថ្លង់ និងពិការភ្នែក ជិត ៥០ នាក់ ចូលរួមប្រឡងឌីប្លូម

បានផុស

២ years មុន

នៅ

ថ្ងៃព្រហស្បតិ៍ ២១ កញ្ញា ២០២៣

ដោយ

ក្រសួងអប់រំ យុវជន និងកីឡា នឹងរៀបចំប្រឡងមធ្យមសិក្សាបឋមភូមិ ឬ ឌីប្លូម នៅថ្ងៃទី ០២ ខែតុលា ខាងមុខនេះហើយ ដោយមានបេក្ខជនដាក់ពាក្យចូលរួមប្រឡងប្រមាណជិត ១៨ ម៉ឺននាក់ ក្នុងនោះមានបេក្ខជនគថ្លង់ និងពិការភ្នែកជិត ៥០ នាក់ ផងដែរ។

លោក កាន់ ពុទ្ធី អ្នកនាំពាក្យក្រសួងអប់រំ យុវជន និងកីឡា បានឲ្យដឹងនៅព្រឹកថ្ងៃទី ២១ កញ្ញានេះថា ក្នុងចំណោមបេក្ខជនចូលរួមប្រឡងឌីប្លូមសរុបចំនួន ១៧៨១៣៤ នាក់ ស្រី ៩៤៨០៥ នាក់ ក្នុងនោះមានបេក្ខជនស្វៃរិនមានចំនួន ១០ នាក់ ស្រី ៦ នាក់ បេក្ខជនបំពេញវិជ្ជាមានចំនួន ៧២៨ នាក់ ស្រី ១៧៥ នាក់ បេក្ខជនគថ្លង់ចំនួន ២៧ នាក់ ស្រី ៨ នាក់ និងបេក្ខជនពិការភ្នែកចំនួន ២២ នាក់ ស្រី ១០ នាក់ ដោយមានមណ្ឌលប្រឡងចំនួន ១៧៤៣ មណ្ឌល ចែកជា ៨០៩០ បន្ទប់។

ក្នុងចំណោមបេក្ខជនគថ្លង់ និងពិការភ្នែកជិត ៥០ នាក់ ក្នុងនោះមកពីខេត្តបាត់ដំបងមានបេក្ខជនគថ្លង់ចំនួន ៣ នាក់ ស្រី ១ នាក់ និងពិការភ្នែក ៣ នាក់ ស្រី ១ នាក់ ខេត្តកំពង់ចាមគថ្លង់ ៥ នាក់ ស្រី ១ នាក់ និងពិការភ្នែក ២ នាក់ ស្រី ១ នាក់ ភ្នំពេញគថ្លង់ ១៥ នាក់ ស្រី ៦ នាក់ និងពិការភ្នែក ១៥ នាក់ ស្រី ៦ នាក់ និងខេត្តសៀមរាបមានបេក្ខជនគថ្លង់ ៤ នាក់ និងបេក្ខនារីពិការភ្នែក ២ នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចំនួនបេក្ខជនគថ្លង់ និងពិការភ្នែកចូលរួមប្រឡងឌីប្លូមឆ្នាំនេះ បើធៀបទៅនឹងឆ្នាំមុនឃើញថា មានចំនួនប្រហាក់ប្រហែលគ្នា ដោយឆ្នាំមុនមានបេក្ខជនគថ្លង់ចំនួន ២៩ នាក់ ស្រី ០៩ នាក់ និងបេក្ខជនពិការភ្នែកចំនួន ១៩ នាក់ ស្រី ០៥ នាក់។

ចំណែកបេក្ខជនដាក់ពាក្យប្រឡងឆ្នាំនេះ បើធៀបទៅនឹងការប្រឡងឆ្នាំមុនឃើញថា មានការកើនឡើង ក្នុងនោះឆ្នាំ ២០២២ មានបេក្ខជនដាក់ពាក្យប្រឡងចំនួន ១៧៤ ៧២៦ នាក់ ស្រី ៩៥ ១២៧ នាក់ បេក្ខជនស្វៃរិន ១៣៦ នាក់ ស្រី ៤៥ នាក់ បេក្ខជនបំពេញវិជ្ជា ១ ០៧៦ នាក់ ស្រី ១៩២ នាក់ ដោយមានមណ្ឌលប្រឡងសរុប ១ ៧២៣ ចែកចេញជា ៧ ៨១៦ បន្ទប់។

លោកបានបន្តទៀតថា ក្នុងចំណោមបេក្ខជនចំនួន ១៧៤ ៧២៦ នាក់ បេក្ខជនមកប្រឡងមានចំនួន ១៦២១៦៦ នាក់ ក្នុងនោះបេក្ខជនប្រឡងជាប់មានចំនួន ១៥៣៦៤៩ នាក់ ស្មើនឹង ៩៤.៧៥៥។

លោក កាន់ ពុទ្ធី បានបន្ថែមថា សម្រាប់ការប្រឡងឌីប្លូមឆ្នាំនេះ ក៏មិនខុសពីការប្រឡងមុនៗដែរ ដោយក្រសួងអប់រំ នៅតែបន្តប្រគល់សិទ្ធិអំណាច និងការទទួលខុសត្រូវទាំងស្រុងជូនគ្រឹះស្ថានមធ្យមសិក្សាសាធារណៈ និងឯកជននីមួយៗ ដែលមានអនុវិទ្យាល័យ និងវិទ្យាល័យ ក្នុងការរៀបចំដំណើរការប្រឡងដោយខ្លួនឯង ពោលចាប់តាំងពីការរៀបចំប្រធានវិញ្ញាសា ដំណើរការសំណេរ កំណែ ស្រង់បូកពិន្ទុ និងការប្រកាសលទ្ធផលប្រឡងជាដើម។

គួរបញ្ជាក់ថា ការប្រឡងសញ្ញាបត្រមធ្យមសិក្សាបឋមភូមិនៅឆ្នាំនេះ នឹងប្រព្រឹត្តិទៅនៅថ្ងៃទី ០២ ខែតុលា និងប្រកាសលទ្ធផលប្រឡងនៅថ្ងៃទី ០៩ ខែតុលា ឆ្នាំ ២០២៣៕

អត្ថបទ ៖ សំអឿន