សមត្ថកិច្ចថៃចាប់គ្រាប់រំសេវជាច្រើនដែលកំពុងដាក់ផ្ញើតាមក្រុមហ៊ុនឯកជនមួយ

គ្រាប់រំសេវជាច្រើនត្រូវបានគេវេចខ្ចប់យ៉ាងស្អាតយកទៅដាក់ផ្ញើនៅក្រុមហ៊ុនឯកជនមួយដើម្បីបញ្ជូនឲ្យដល់ដៃម្ចាស់ទំនិញដែលបានកាមង់ដោយមិននឹកស្មានថា នៅក្នុងកេសក្រដាសទាំងនោះសុទ្ធសឹងជាសំបកកាទុស្ស និងបង់កាំភ្លើងជាច្រើនដែលគេពុំដឹងថាតើអ្នកដែលបានកាមង់នោះយកទៅធ្វើអ្វីនោះទេ។

កាលពីល្ងាចថ្ងៃទី ២០ ខែកញ្ញា ឆ្នាំ ២០២៣ នេះសមត្ថកិច្ចបានរកឃើញមានការវេចខ្ចប់សំបកគ្រាប់កាទុស្ស រាប់រយគ្រាប់ និងបង់កាំភ្លើងជាច្រើនដែលគេបិទជិតហើយបានយកទៅផ្ញើនៅក្នុងក្រុមហ៊ុនឯកជនមួយក្នុងខេត្តកានចានៈបុរី ប្រទេសថៃដោយនៅលើកែសក្រដាសនោះមានការសរសេរបញ្ជាក់អាសយដ្ឋានរបស់អ្នកទទួលផងដែរដែលមានឈ្មោះអ្នកស្រី ផន ទិព្វ អាយុ ៣៥ ឆ្នាំ រស់នៅក្នុងឃុំណងបូ ស្រុកសាំងខ្លាក់បុរី ខេត្តកានចាន:បុរី។

ក្រោយពីបានត្រួតពិនិត្យរួចមកនៅវេលាម៉ោង ៧ យប់ សមត្ថកិច្ចថៃបានឲ្យភ្នាក់ងារដឹកជញ្ជូនទំនិញរបស់ក្រុមហ៊ុនឯកជននោះដឹកយកទៅប្រគល់ដល់ផ្ទះម្ចាស់ទំនិញដោយឡែកសមត្ថកិច្ចក៏បានធ្វើដំណើរតាមពីក្រោយភ្នាក់ងារនោះរហូតជិតដល់ផ្ទះដែលត្រូវប្រគល់ទំនិញ។

ក្រោយពីម្ចាស់ទំនិញចេញមកទទួលយកកែសក្រដាសចូលទៅក្នុងផ្ទះតម្រួតថៃក៏បានបង្ហាញខ្លួនហើយក៏បានឃាត់ស្ត្រីរូបនោះតែម្ដងដើម្បីនាំមកកាន់អធិការដ្ឋានស្រុក។

នៅពេលបើកកែសត្រួតពិនិត្យសមត្ថកិច្ចរកឃើញសំបកកាទុស្សគ្រាប់កាំភ្លើងខ្នាត 5.56 មីលី្លម៉ែត្រ ដែលគេបាញ់រួចហើយ ចំនួន ៩២០ គ្រាប់ បង់កាំភ្លើង M.16 ប្រភេទ ២០ គ្រាប់ ចំនួន ២០ បង់ និងបង់កាំភ្លើង M 16 ប្រភេទ ៣០ គ្រាប់ចំនួន ៤ បង់ ដោយសមត្ថកិច្ចបានចោទប្រកាន់ចំនួនពីរបទល្មើស ទី ១ រក្សាទុកគ្រាប់រំសេវក្នុងផ្ទះដោយគ្មានការអនុញ្ញាត និងទី ២ ស្ត្រីរូបនេះជាជនជាតិម៉នដែលរស់នៅលើទឹកដីនៃប្រទេសភូមា ហើយបានលួចឆ្លងដែនចូលមកក្នុងទឹកដីថៃ ដោយខុសច្បាប់ និងលាក់ខ្លួនអស់រយៈពេលជាង ១៣ ឆ្នាំហើយ។

បើតាមការស្រាវជ្រាវសំបកកាទុស្សទាំងនេះអាចគេយកមកកែច្នៃដើម្បីផលិតជាគ្រាប់កាំភ្លើងឡើងវិញហើយលក់បន្ត នេះគឺជាករណីជួញដូរអាវុធខុសច្បាប់។

បច្ចុប្បន្ននេះសមត្ថកិច្ចបានកសាងសំណុំរឿងដើម្បីបញ្ជូនស្ត្រីដែលជាជនសង្ស័យ និងវត្ថុតាងទៅកាន់តុលាការហើយ៕

អត្ថបទ: សោ និយមរ័ត្ន