ព័ត៌មានជាតិ

រោងចក្រកាត់ដេរខ្នាតយក្សមួយចាយទុនជាង ២៤០ លានដុល្លារ បង្កើតការងារជាង ១ ម៉ឺនកន្លែង នៅតំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ

បានផុស

២ years មុន

នៅ

ថ្ងៃព្រហស្បតិ៍ ២១ កញ្ញា ២០២៣

ដោយ

ក្រុមហ៊ុន Marvel Garment គឺជាក្រុមហ៊ុនវិនិយោគដ៏ធំមួយដែលមានទីតាំងនៅតំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ។

ដោយចាប់ផ្តើមដំណើរការរោងចក្រនៅឆ្នាំ ២០១៩ នៅលើផ្ទៃដីទំហំ ៤៥ ហិកតា ក្រុមហ៊ុន Marvel Garment ជាក្រុមហ៊ុនវិនិយោគដ៏ធំខ្នាតយក្សមួយដែលបោះទុនរាប់រយលានដុល្លារ បង្កើតរោងចក្រកាត់ដេរសម្លៀកកំពាក់ម៉ាកល្បីៗដើម្បីនាំចេញទៅក្រៅប្រទេស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅចំពោះប្រតិភូក្រុមប្រឹក្សាអភិវឌ្ឍកម្ពុជាក្នុងដំណើរការទស្សនកិច្ចនៅតំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ ក្រុមហ៊ុនបានឲ្យដឹងថា ក្រុមហ៊ុនបានបោះទុនវិនិយោគប្រមាណ ២៥០ លានដុល្លារអាមេរិកបង្កើតរោងចក្រ ដើម្បីផលិតសម្លៀកបំពាក់ម៉ាកល្បីៗដូចជាជាម៉ាក ណៃគី (Nike) ប៉ូឡូ (Polo) ពូម៉ា (Puma) និងលូលូឡេម៉ុន (Lululemon) ជាដើម ដើម្បីនាំចេញទៅលក់នៅក្រៅប្រទេស។

ជាមួយរោងចក្រកំពុងដំណើរការដែលបានបង្កើតការងារបានចំនួន ១៣.៣០០ កន្លែង ក្រុមហ៊ុនក៏កំពុងសាងសង់អាគាររោងចក្រថ្មីមួយទៀតនៅលើផ្ទៃដីជាង ៤០ ហិកតា ដែលគ្រោងជ្រើសរើសកម្មករនិយោជិតប្រមាណ ៨.០០០នាក់ ចូលមកបម្រើការងារ។

គួរបញ្ជាក់ថា កាលពីថ្ងៃព្រហស្បតិ៍ ទី២១ ខែកញ្ញា ឆ្នាំ២០២៣ លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានចុះបំពេញទស្សនកិច្ចបណ្តាក្រុមហ៊ុននៅក្នុងតំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ។

ក្នុងដំណើរទស្សនកិច្ច លោកឧបនាយករដ្ឋមន្រ្តីបានពិនិត្យមើលពីសកម្មភាពផលិតកម្មនៅរោងចក្រមួយចំនួននៅក្នុងតំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ ក្នុងនោះមានក្រុមហ៊ុន Marvel Garment Co., Ltd. ដែលវិនិយោគរោងចក្រកាត់ដេរសម្លៀកបំពាក់ដ៏ធំនៅតំបន់សេដ្ឋកិច្ចពិសេសរ៉ូយ៉ាល់ គ្រុប ភ្នំពេញ ទៅទស្សនាក្រុមហ៊ុន Minebea (Cambodia) Co., Ltd. ដែលជាក្រុមហ៊ុនរបស់ជប៉ុនវិនិយោគររោងចក្រផលិតគ្រឿងអេឡិចត្រូនិក ក៏ដូចជាបានទៅទស្សនាស្វែងយល់ពីក្រុមហ៊ុន Cambodia Beverage Company., Ltd. ដែលជាក្រុមហ៊ុនផលិតភេសជ្ជៈ Coca-Cola ដ៏ល្បីរបស់អាមេរិកផងដែរ។

ដំណើរទស្សនកិច្ចរបស់លោក ស៊ុន ចាន់ថុល និងប្រតិភូ ដើម្បីស្វែងយល់ពីវឌ្ឍនភាពនៃការអភិវឌ្ឍថ្មីៗរបស់ក្រុមហ៊ុនដែលកំពុងវិនិយោគក្នុងតំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ ក៏ដូចជាដើម្បីបង្កើនការយកចិត្តទុកដាក់ និងពង្រឹងការផ្សារភ្ជាប់ទំនាក់ទំនងល្អរវាងរាជរដ្ឋាភិបាលកម្ពុជាជាមួយវិនិយោគិន៕

Related Topics:លោក ស៊ុន ចាន់ថុល