ព័ត៌មានជាតិ

លោក នេត្រ ភក្ត្រា ៖ ព័ត៌មានក្លែងក្លាយ ធ្វើឲ្យប៉ះពាល់អវិជ្ជមានដល់ពលរដ្ឋ ក្នុងការទទួលបានព័ត៌មានពិត

បានផុស

១ year មុន

នៅ

ថ្ងៃសុក្រ ២២ កញ្ញា ២០២៣

ដោយ

លោក នេត្រ ភក្ត្រា រដ្ឋមន្ត្រីក្រសួងព័ត៌មាន គូសបញ្ជាក់ថា ព័ត៌មានក្លែងក្លាយ ធ្វើឲ្យប៉ះពាល់អវិជ្ជមានដល់ប្រជាពលរដ្ឋក្នុងការទទួលបានព័ត៌មានត្រឹមត្រូវ ជាពិសេសប៉ះពាល់សង្គម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក នេត្រ ភក្ត្រា រដ្ឋមន្ត្រីក្រសួងព័ត៌មាន គូសបញ្ជាក់បែបនេះ ខណៈជួបពិភាក្សាទ្វេភាគីជាមួយសមភាគីម៉ាឡេស៊ី លោក Ahmad Fahmi bin Mohamed Fadzil រដ្ឋមន្ត្រីក្រសួងគមនាគមន៍ និងឌីជីថល ក្នុងក្របខណ្ឌ នៃកិច្ចប្រជុំរដ្ឋមន្ត្រីទទួលបន្ទុកព័ត៌មានអាស៊ានលើកទី ១៦ និងកិច្ចប្រជុំពាក់ព័ន្ធនៅទីក្រុងដាណាង ប្រទេសវៀតណាម នារសៀលថ្ងៃទី ២២ ខែកញ្ញា ឆ្នាំ ២០២៣ នេះ។

លោក នេត្រ ភក្ត្រា បានគូសបញ្ជាក់ថា «ព័ត៌មានក្លែងក្លាយ បានធ្វើឲ្យប៉ះពាល់អវិជ្ជមានដល់ប្រជាពលរដ្ឋក្នុងការទទួលបានព័ត៌មានត្រឹមត្រូវ និងធ្វើឲ្យប៉ះពាល់ដល់សង្គម ហើយពេលខ្លះបង្កើតជាបញ្ហាចលាចល និងបំផ្លាញកិត្តិយសបុគ្គល ឬ ធ្វើឲ្យមានការយល់ច្រឡំ និងបាត់បង់ជំនឿទុកចិត្តផងដែរហើយ ដែលយើងទាំងអស់គ្នាចាំបាច់ត្រូវសហការគ្នាក្នុងការបង្ការ និងទប់ស្កាត់ឲ្យខាងតែបាន»។

លោក នេត្រ ភក្ត្រា លើកឡើងបន្ថែមថា ក្នុងបរិបទ នៃសង្គមឌីជីថល និន្នាការ នៃការទទួលព័ត៌មានរបស់ប្រជាពលរដ្ឋបច្ចុប្បន្ននេះ ពីតាមរយៈប្រព័ន្ធផ្សព្វផ្សាយទំនើប គឺ បណ្ដាញទំនាក់ទំនងសង្គម ជាពិសេសពីហ្វេសប៊ុក និងតិកតុក។

លោកបន្ថែមទៀតថា ទន្ទឹមនឹងការផ្ដល់នូវខ្លឹមសារសម្បូណ៌បែប និងមានល្បឿនលឿន បណ្ដាញសង្គម ក៏បានធ្វើឲ្យមានបញ្ហា នៃការបំពុលព័ត៌មានតាមរយៈការបង្កើតព័ត៌មានក្លែងក្លាយដែលមានចេតនាទុច្ចរិតផងដែរ។

គួរជម្រាបថា ភាគីទាំងពីរ បានគូសបញ្ជាក់ពីកិច្ចសហប្រតិបត្តិការរវាងក្រសួងព័ត៌មានកម្ពុជា និងក្រសួងគមនាគមន៍ និងឌីជីថល នៃប្រទេសម៉ាឡេស៊ី លើទិដ្ឋភាព នៃការប្រឆាំងនឹងព័ត៌មានក្លែងក្លាយ និងការផ្លាស់ប្ដូរបទពិសោធរវាងមន្ត្រី នៃក្រសួងទាំងពីរ លើកិច្ចការព័ត៌មាន និងការផ្សព្វផ្សាយ៕

អត្ថបទ ៖ ពិសី