តើការយកព័ត៌មានបែបកំប្លុកកំប្លែង ខុសក្រមសីលធម៌ វិជ្ជាជីវ:សារព័ត៌មានដែរ ឬទេ??

សារព័ត៌មាន មានតួនាទីយ៉ាងសំខាន់ក្នុងការផ្សព្វផ្សាយរឿងរ៉ាវជាច្រើនដែលបានកើតឡើងនៅក្នុងសង្គម តែក៏ត្រូវគោរពទៅតាមគោលការណ៍ក្រមសីលធម៌ វិជ្ជាជីវ:របស់អ្នកសារព័ត៌មាន។ បច្ចុប្បន្ន គេសង្គេតឃើញមានអ្នកសារព័ត៌មានមួយចំនួន ហាក់បីដូចជាមានភាពរញ៉េរញ៉ៃនៅក្នុងការចុះយកព័ត៌មាន ហើយបែរជាធ្វើបែបកំប្លុកកំប្លែងទៅវិញ។ តើការយកព័ត៌មានបែបនេះ ខុសក្រមសីលធ៌ វិជ្ជាជីវ: របស់អ្នកសារព័ត៌មានដែរ ឬទេ?

លោក ហ៊ុយ វណ្ណ: ប្រធានសហព័ន្ធអ្នកសារព័ត៌មានកម្ពុជា បានឲ្យដឹងនៅក្នុងកិច្ចសម្ភាសជាមួយសារព័ត៌មាន កម្ពុជាថ្មី ថា ការយកយកព័ត៌មាន គឺមានរបៀបនៅក្នុងការធ្វើ ហើយការយកព័ត៌មានបែបកំប្លុកកំប្លែងនេះ ជាការយកព័ត៌មានបែបកម្សាន្ត ប៉ុន្តែ ការធ្វើបែបនេះច្រើន ធ្វើឱ្យអាប់អោនដល់តម្លៃរបស់អ្នកសារព័ត៌មាន និងធ្វើឱ្យប៉ះពាល់ទៅដល់តម្លៃរបស់សារព័ត៌មានដ៏ទៃទៀត។ លោកបានសង្កត់ធ្ងន់ថា «ប្រសិនបើយកព័ត៌មានបែបកំប្លែង ទៅធ្វើជាអ្នកកំប្លែង បើធ្វើជាអ្នកសារព័ត៌មាន ធ្វើឲ្យគ្រប់អ្នកសារព័ត៌មាន»។ លោកថា វាជាកាតព្វកិច្ចរបស់ក្រសួងស្ថាប័ន ដែលត្រូវទទួលបន្ទុកមើលទៅលើរឿងនេះ ជៀសវាងការបាត់បង់នូវតម្លៃ និងកិត្យានុភាពរបស់អ្នកសារព័ត៌មាន។

ប្រធានសហព័ន្ធអ្នកសារព័ត៌មានកម្ពុជារូបនេះ បានបញ្ជាក់ថា​ លោកមានការបារម្ភជាខ្លាំង នៅពេលតួអង្គអ្នកសារព័ត៌មាន ដែលជាសិទ្ធអំណាចទី៤ ទៅជាធ្វើរឿងលេងសើច ដែលធ្វើឲ្យបាត់បង់គុណភាណរបស់សារព័ត៌មាន និងធ្វើឲ្យសង្គមមិនមានភាពរីកចម្រើនទៅមុខ។​ លោកថា ភាគីដែលពាក់ព័ន្ធ ទាំងអ្នកសារព័ត៌មាន ទាំងអ្នកផលិតមាតិកា គឺទាមទាឲ្យមានការឆ្លងកាត់វគ្គបណ្តុះបណ្តាល ព្រោះបើសង្គមទទួលបាននូវព័ត៌មានដែលវង្វេងវង្វាន់ គ្មានវិជ្ជាជីវ:ត្រឹមត្រូវ នោះប្រទេសមិនអាចរីកចម្រើនទៅមុខបានលឿនដូចគេបាននោះទេ៕