មន្ត្រីជាន់ខ្ពស់ក្រសួងធនធានទឹកចុះដាក់វិធានការបង្វែរទឹកចេញពីរាជធានីភ្នំពេញ

លោក ចាន់ ស៊ីណាត រដ្ឋលេខាធិការក្រសួងធនធានទឹក និងឧតុនិយមនៅថ្ងៃទី ២២ ខែកញ្ញា ឆ្នាំ ២០២៣ បានចុះពិនិត្យ និងដាក់វិធានការដោះស្រាយជាក់ស្តែងចំពោះមុខជាមួយនឹងមន្ទីរធនធានទឹក និងឧតុនិយម រាជធានីភ្នំពេញ ខេត្តកណ្តាល និងអាជ្ញាធរពាក់ព័ន្ធគ្រប់លំដាប់ថ្នាក់។

សូមជម្រាបថា ការចុះពិនិត្យ និងដោះស្រាយនេះ ដើម្បីបញ្ជូន និងពង្វាងទឹក ដែលមានបរិមាណច្រើន មានកម្លាំងខ្លាំងដែលតែងគំរាមកំហែងមកលើរាជធានីភ្នំពេញ និងបណ្តាតំបន់រណបឱ្យហូរចូលក្នុងតំបន់បឹងទន្លេសាបឱ្យបានឆាប់។

ការពង្វាងទឹកទាំងនេះគឺចាប់ពីតំបន់រលាំងជ្រៃត្បូង ក្នុងខេត្តកំពង់ស្ពឺ តាមព្រែកខ្សាច់ ព្រែកដូនស្ទឹង ព្រែកពាមសត្ថា តាមអូរទាំងអស់ និងប្រឡាយនាំដីល្បប់នានាក្នុងខណ្ឌព្រែកព្នៅ រាជធានីភ្នំពេញ និងស្រុកពញាឮខេត្តកណ្តាល៕