សមត្ថកិច្ចស្រុកគិរីវង់ ឃាត់ឈ្មូញដឹកសត្វទាគ្មានច្បាប់​មកពីវៀតណាម

កម្លាំងចម្រុះក្រសួងកសិកម្ម សហការណ៍ជាមួយកម្លាំងជំនាញមន្ទីរកសិកម្មខេត្តតាកែវ បានចុះចាប់រថយន្តមួយគ្រឿង របស់ឈ្មោះ យ៉ង់ ធឿន ដែលលួចដឹកសត្វទា គ្មានច្បាប់ មកពីវៀតណាម តាមច្រកព្រត ឃុំសោម ស្រុកគីរីវង់។

លោក ញ៉ិប ស្រ៊ន ប្រធានមន្ទីរកសិកម្ម រុក្ខា ប្រមាញ់ និងនេសាទខេត្តតាកែវ បានឱ្យដឹងថា នៅថ្ងៃទី២០ ខែកញ្ញា ឆ្នាំ២០២៣ កន្លងទៅ ដោយមានការសម្របសម្រួលនីតិវិធីផ្ទាល់ដោយលោក ញ៉ាន បូរី ព្រះរាជអាជ្ញារងអម​សាលាដំបូងខេត្តតាកែវ វេលាម៉ោងប្រមាណ ១៨និង១៦នាទីល្ងាច លោក ហ៊ុន សារ៉ាត់ អនុប្រធាន​នាយកដ្ឋាន​សុខភាពសត្វ និងសុខភាពសាធារណៈ បសុព្យាបាល នៃក្រសួងកសិកម្ម សហការជាមួយ ការិយាល័យ​បុសព្យាបាលសត្វខេត្ត ស្រុក និងកម្លាំងកងរាជអាវុធហត្ថស្រុកគីរីវង់ បានចុះធ្វើការត្រួតពិនិត្យរថយន្ត​មួយគ្រឿងម៉ាក ហ៊ីយ៉ុនដាយ ពណ៌ស ពាក់ស្លាកលេខ ភ្នំពេញ 3F-6769 ដែលមានម្ចាស់ឈ្មោះ យ៉ង់ ធឿន បានដឹកសត្វទារស់ ចំនួន២៥០០ក្បាល គ្មានលិខិតអនុញ្ញាត និងមិនមានវិញ្ញាបនបត្រអនាម័យសត្វពីប្រទេសវៀតណាម ត្រឹមត្រូវ ដែលលួចដឹកចូលមកតាមច្រកព្រត នៅភូមិទន្លាប់ ឃុំសោម ស្រុកគិរីវង់ ខេត្តតាកែវ។

លោក ញ៉ឹប ស៊្រន បានបញ្ជាក់ទៀតថា អំឡុងពេលសមត្ថកិច្ចចម្រុះកំពុងសាកសួរ ម្ចាស់រថយន្ត បានបើករត់គេច ចូលទៅផ្ទះឈ្មោះ យ៉ង់ ធឿន ស្ថិតនៅភូមិឈើទាលភ្លោះ ឃុំព្រៃអំពក ស្រុកគីរីវង់ ភ្លាមៗនោះដែរ សមត្ថកិច្ចបន្តដេញ​តាមរហូតដល់ផ្ទះ យ៉ង់ ធឿន ដើម្បីសួរនាំបន្ថែម ប៉ុន្តែមិនបានប៉ុន្មាននាទីផង ក៏ត្រូវបានបក្ខពួករបស់គេ ចេញមកស្រែក​ឡូឡា ជេរប្រមាថ ចង់បង្កហឹង្សា ពិសេសស្រែកថា ចោរដល់ក្រុមការងារចម្រុះកំពុងអនុវត្តច្បាប់ ។

បច្ចុប្បន្ននេះ ទាំងរថយន្ត និងសត្វទាត្រូវបានយកទៅរក្សាទុកនៅនាយកដ្ឋានក្រសួងក្រសួង  និងរៀបចំពាក្យបណ្ដឹង​បន្តចាត់ការបន្តតាមនីតិវិធីច្បាប់៕

អត្ថបទ ៖ វីរៈ