សម្តេច ហ៊ុន ម៉ាណែត ៖ វិស័យរោងចក្រសហគ្រាស​បង្កើតការងារដល់ពលរដ្ឋខ្មែរជាង ១លាន ៥សែននាក់ ក្នុងឆ្នាំ ​២០២៣

នៅក្នុងឆ្នាំ ២០២៣នេះ កម្ពុជា មានរោងចក្រសហគ្រាសប្រមាណ ១៧២៥១ ដោយបានបង្កើតការងារជូនពលរដ្ឋជាង ១លាន ៥សែននាក់។ ក្នុងនោះ វិស័យកាត់ដេរមានចំនួន ១៣៣២រោងចក្រ ផ្តល់ការងារដល់កម្មករកម្មការិនីជាង ៨៣ម៉ឺននាក់។ នេះជាការបញ្ជាក់របស់សម្តេច ហ៊ុន ម៉ាណែត នាយករដ្ឋមន្រ្តី នៅក្នុងពិធីជួបជាមួយប្រជាពលរដ្ឋខ្មែរ កំពុងរស់នៅសហរដ្ឋអាមេរិក និងប្រទេសកាណាដា កាលពីល្ងាចថ្ងៃទី ២៣ ខែកញ្ញា នៅអាមេរិក។

ជាមួយគោលនយោបាយនៃការបង្កើតការងារនេះ សម្តេច ហ៊ុន ម៉ាណែត បានលើកឡើងថា រដ្ឋាភិបាល មិនត្រឹម​តែបង្កើតឱ្យបានច្រើននោះទេ តែក៏ត្រូវគិតពីគុណភាពផងដែរ។ គុណភាពការងារគឺត្រូវមានបៀវត្សសមរម្យ។ រដ្ឋាភិបាល បានចរចាបង្កើនប្រាក់បៀវត្សជូនកម្មកររៀងរាល់ឆ្នាំ។ សម្តេច ហ៊ុន ម៉ាណែត បានបន្តថា បៀវត្សអប្បរមា​នៅក្នុងវិស័យ​កាត់ដេរមានចំនួន ២០០ដុល្លារ ដែលតួលេខនេះ ខ្ពស់ជាងប្រទេសវៀតណាម​ និងបង់ក្លាដែសជាដើម។

សម្តេចនាយករដ្ឋមន្រ្តី បានអះអាងថា ទាក់ទិនវិស័យរោងចក្រសហគ្រាសនេះ រាជរដ្ឋាភិបាល បាននិងកំពុងធ្វើការ​ពង្រីកបន្ថែមទៀត។ ជាក់ស្តែងសម្តេចធិបតី តែងតែផ្សព្វផ្សាយអំពីសក្តានុពលរបស់កម្ពុជា ទៅកាន់វិនិយោគិនបរទេស នៅក្នុងជំនួបទាំងផ្លូវការ និងក្រៅផ្លូវការ នៅពេលដែលសម្តេច ចេញទៅក្រៅប្រទេស។

សម្តេច បានគូសបញ្ជាក់ដូច្នេះថា«​ការបង្កើតការងារនេះ យើងបង្កើតគ្រប់កន្លែងទាំងអស់ យើងខិតខំបង្កើត​ការងារ​ឱ្យបានច្រើននៅក្នុងប្រទេស រុញការងារឱ្យដល់មូលដ្ឋាន យើងខំបង្កើនវិស័យកសិកម្ម ទៅជាកសិ-ឧស្សាហកម្ម បង្កើតសហគមន៍កសិករ ដើម្បីធ្វើយ៉ាងណាឱ្យមាការងារក្នុងស្រុកកាន់តែច្រើន តែយើងក៏មិនបិទ​សិទ្ធិប្រជាពលរដ្ឋ​ទៅក្រៅប្រទេសដែរ»៕

​