មន្ត្រីជាន់ខ្ពស់ក្រសួងធនធានទឹក និងឧតុនិយមចុះពិនិត្យ និងដោះស្រាយបង្កាហានិភ័យគ្រោះ​ទឹកជំនន់​នៅខេត្តពីរជាប់ព្រំដែនកម្ពុជា-ថៃ

លោក ចាន់ ស៊ីណាត រដ្ឋលេខាធិការ​ក្រសួងធនធានទឹក និងឧតុនិយម​នៅថ្ងៃទី ២៤ ខែកញ្ញា ឆ្នាំ ២០២៣ បានដឹកនាំក្រុមការងាររបស់ក្រសួងចុះអនុវត្តវិធានការដោះ​ស្រាយត្រៀមបង្កាហានិភ័យ​ដែលកើតឡើងដោយសារគ្រោះទឹកជំនន់គ្រប់ប្រភេទ និងគ្រោះរាំងស្ងួតនៅខេត្តបន្ទាយ មានជ័យ និងខេត្តឧត្តរមានជ័យ។

តំបន់ដែលនឹងត្រូវដោះស្រាយគឺស្ថិតនៅស្រុកម៉ាឡៃ តំបន់អូរប្រវត្តិសាស្រ្ដ ដូចជា៖ អូរល្ហុង អូរបីជាន់ អូរជ្រៅ អូរសំព័រ អូរកំបុត ស្ទឹងស្វាយចេក អូរណាំតាវ អូរអន្សងនាវ តំបន់ស្ទឹងក្រសាំង តំបន់ស្ទឹងស្រែងចាប់ពីតំបន់សំរោងចុងកាល់ដល់ស្រុកស្រីស្នំពីតំបន់៥ជាប់នឹងព្រំដែននៃប្រទេសជិតខាងដល់តំបន់ស្រែង២ដោយកាត់តាមភូមិតាម៉ុក តំបន់បឹងត្រកួន តំបន់ស្រែល្អ តំបន់តាម៉េង តំបន់ពន្លៃ តំបន់អាងត្រពាំងថ្ម តំបន់ប្រព័ន្ធប្រឡាយកុមារ និងតំបន់ស្ទឹងសែសិន។

សូមជំរាបថា លោក ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានសម្រេចដាក់ការអភិវឌ្ឍដោយធ្វើទំនើបកម្មលើបណ្តាអនុគម្រោងខាងលើទាំងអស់ក្នុងផែនការការងារគ្រប់គ្រងទឹក បញ្ជាទឹក ប្រើប្រាស់ទឹក និងវិស័យឧតុនិយម ខណៈមានការឧបត្ថម្ភគាំទ្រជាប្រចាំក្រោមហិរញ្ញប្បទានពីធនាគារវិនិយោគហេដ្ឋារចនាសម្ព័ន្ធអាស៊ី (AIIB) ពីធនាគារវិនិយោគសហគមន៍អឺរ៉ុប (EIB) ពីហិរញ្ញប្បទានសម្បទានរហ័សងាយៗជាច្រើនប្រភព ធានាការឆ្លើយតបនឹងតម្រូវការចាំបាច់​របស់ប្រទេសបានរហ័សឈានទៅធ្វើការកាត់បន្ថយបានល្អប្រសើរលើហានិភ័យដែលកើតឡើងដោយសារគ្រោះទឹកជំនន់គ្រប់ប្រភេទ និងគ្រោះរាំងស្ងួត៕