​ពលរដ្ឋអះអាងថាតម្លៃគោរស់ធ្លាក់ចុះខុសគ្នាឆ្ងាយពីសាច់គោនៅលើទីផ្សារ​

​អ្នកស្រី គួន ថាន មានអាយុ ៦៥ ឆ្នាំរស់នៅឃុំក្រាំងអំពិល​ ស្រុកសំរោងទង​ ខេត្តកំពង់ស្ពឺ​ បានកត់​សម្គាល់ថា តម្លៃសត្វគោបានធ្លាក់ចុះយ៉ាងគំហុក ខណៈឈ្មួញ​ចុះរកទិញ​ឱ្យតម្លៃទាបខុសប្លែក​ពីពេល​កន្លងទៅ។

អ្នកស្រីប្រាប់ថា គោវ័យជំទង់របស់អ្នកស្រីឈ្មួញឱ្យតម្លៃត្រឹមតែ ៦០ ម៉ឺន ទៅ ១ លានរៀល គ្រាដែល​អ្នកស្រីដាក់តម្លៃរហូតដល់ ២ លានរៀល។

​លោក ងុន ហាន់ រស់នៅក្នុងឃុំក្រាំងអំពិលដែរបាននិយាយថា ក្រុមឈ្មួញចុះមកទិញគោ​តាមផ្ទះ​ហើយឲ្យតម្លៃថោកបែបនេះគឺបងប្អូនប្រជាពលរដ្ឋមិនព្រមលក់ឡើយដោយសុខចិត្តចិញ្ចឹមទុកតពូជព្រោះទោះជាយ៉ាងណាក៏មិនឲ្យក្រុមឈ្មួញចុះមកទំលាក់ថ្លៃប៉ុន្តែសាច់គោក្នុងផ្សារឡើងថ្លៃកក់ពពក។

ដោយឡែកក្រុមឈ្មួញដែលចុះទៅទិញគោយកមកកាប់សាច់លក់(សុំមិនបញ្ចេញឈ្មោះ)បាននិយាយថា មូលហេតុដែលពួកគាត់មិនហ៊ាន​ឲ្យតម្លៃខ្ពស់ព្រោះសត្វគោ​នៅខេត្តកំពង់ស្ពឺ​មិនសូវធំដូច​សត្វគោអ្នករស់នៅតាមដងទន្លេដែលភាគច្រើនជាគោពូជ។ ប៉ុន្តែក្នុងនោះសាច់គោកំពង់ស្ពឺ​មានរស​ជាតិជាងសត្វគោនាំចូលពីប្រទេសជិតខាង។

ម្ចាស់កសិដ្ឋានចិញ្ចឹមគោ លោក ហួត លាង បានឱ្យដឹងកាលពីពេលថ្មីៗនេះថា បច្ចុប្បន្ននេះអ្នក​ចិញ្ចឹម​គោខ្នាតតូច ឬលក្ខណៈគ្រួសារ បានកាត់បន្ថយការចិញ្ចឹមជាបន្តបន្ទាប់ ដោយនៅឈរជើង​បានតែអ្នកចិញ្ចឹមលក្ខណៈ​កសិដ្ឋាន​ធំៗប៉ុណ្ណោះ។ លោកបានបន្តថា តម្លៃគោរស់នៅលើ​ទីផ្សារ​បានធ្លាក់ចុះពី ​១,៥០០០ រៀល​ ​​មកត្រឹម​ត្រឹម​ ១០,០០០ រៀល ​ ក្នុងមួយគីឡូក្រាម។

លោក ស្រ៊ុន ពៅ ប្រធានសមាគមចិញ្ចឹមសត្វនៅកម្ពជាបានប្រាប់កម្ពុជាថ្មីថា វិស័យចិញ្ចឹមសត្វនៅកម្ពុជា នាពេលបច្ចុប្បន្នជួបប្រទះបញ្ហាប្រឈមទីផ្សារស្ទើរទាំងអស់មិនថាតែទីផ្សារគោនោះទេ។

លោកបានបន្តថា ការផ្គត់ផ្គង់សាច់គោមិនមានបញ្ហានោះឡើយ ប៉ុន្តែអ្វីដែលជាបញ្ហានោះ គឺពុំសូវមានតម្រូវការ។ ពុំសូវមានតម្រូវការ ដោយសារពលរដ្ឋមិនសូវចាយលុយ។ ម្យ៉ាងទៀតការនាំចូលសាច់បង្កកពីបរទេសច្រើនលើសលុប ក៏ធ្វើឱ្យតម្លៃសាច់ក្នុងស្រុកធ្លាក់ចុះដែរ៕

អត្ថបទ៖ នរា