នាយកដ្ឋាននគរបាលព្រហ្មទណ្ឌ ណែនាំការងារ ៥ចំណុច ដើម្បីបង្ការ ទប់ស្កាត់បទល្មើស

លោកឧត្តមសេនីយ៍ទោ ស្រូយ អាប៊ូទី អនុប្រធាននាយកដ្ឋាននគរបាលព្រហ្មទណ្ឌ នៅព្រឹកថ្ងៃទី២៥ ខែកញ្ញា ឆ្នាំ២០២៣ បានណែនាំនូវការងារសំខាន់ៗចំនួន ៥ចំណុច ដើម្បីបង្ការ ទប់ស្កាត់បទល្មើសបច្ចុប្បន្ន និងឆ្នាំខាងមុខ ដល់មន្ដ្រីនៃនាយកដ្ឋាននគរបាលព្រហ្មទណ្ឌ។

ការណែនាំនេះ ធ្វើឡើងនៅក្នុងកិច្ចប្រជុំបូកសរុបវាយតម្លៃ កិច្ចប្រតិបត្តិការបង្ការ ទប់ស្កាត់ និងបង្ក្រាបបទល្មើសព្រហ្មទណ្ឌ រយៈពេល៩ខែ ឆ្នាំ២០២៣ និងផ្សព្វផ្សាយសេចក្ដីណែនាំ ស្ដីពីការបង្កើនប្រសិទ្ធភាពការងារលិខិតស្នាមរដ្ឋបាល របស់អគ្គស្នងការដ្ឋាននគរបាលជាតិ នៅសាលប្រជុំនាយកដ្ឋាននគរបាលព្រហ្មទណ្ឌ។ កិច្ចប្រជុំនេះ ធ្វើឡើងក្រោមអធិបតីភាព លោកឧត្តមសេនីយ៍ទោ ស្រូយ អាប៊ូទី អនុប្រធាននាយកដ្ឋាននគរបាលព្រហ្មទណ្ឌ តំណាងឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌ និងមានការចូលរួមពីនាយការិយាល័យជំនាញទាំង១០។

ដើម្បីឆ្លើយតបលទ្ធផលការងារឱ្យមានប្រសិទ្ធភាព តាមគោលការណ៍ណែនាំ ព្រមទាំងប្រសិទ្ធភាពក្នុងការអនុវត្តការងារជំនាញកិច្ចប្រតិបត្តិការបង្ការ ទប់ស្កាត់បទល្មើសនាពេលបច្ចុប្បន្ន និងឆ្នាំខាងមុខ លោកឧត្តមសេនីយ៍ទោ ស្រូយ អាប៊ូទី បានធ្វើការណែនាំការងារសំខាន់ៗ ដូចជា៖ ១) តស៊ូករណីសំខាន់ៗមួយចំនួន ដែលកើតឡើងមិនទាន់បង្ក្រាបបាន ២) ជំរុញក្រុមការងារបង្ការ និងបង្ក្រាបបទល្មើសលួច ឆក់ទាំង៤ក្រុម នៅរាជធានីភ្នំពេញ ៣) ជំរុញ និងតាមដានក្រុមការងារជំនាញទាំង៦ សម្រាប់ពង្រឹងការងារព្រហ្មទណ្ឌតាមបណ្ដាស្នងការដ្ឋាននគរបាលរាជធានី-ខេត្ត ៤) បង្កើនការងារគ្រប់គ្រងមុខសញ្ញាព្រហ្មទណ្ឌជាមូលដ្ឋាន រួមមាន៖ មុខសញ្ញាក្រុមក្មេងទំនើង, មុខសញ្ញាមានដីកាបង្គាប់ឲ្យចាប់ខ្លួន, មុខសញ្ញាពិរុទ្ធជន ទណ្ឌិតដោះលែងពីពន្ធនាការ និងមុខសញ្ញាសេសសល់ក្នុងករណីបង្ក្រាមមិនទាន់អស់ ៥) តាមដានចំណាត់ការលើសំណុំរឿងបានបញ្ជូនទៅស្ថាប័នតុលាការ ពិសេសបទល្មើសឧក្រិដ្ឋ។

ជាមួយគ្នានេះ លោកឧត្តមសេនីយ៍ទោ ស្រូយ អាប៊ូទី ក៏បានធ្វើការវាយតម្លៃខ្ពស់ និងនាំយកការកោតសរសើររបស់ ឧត្តមសេនីយ៍ឯក ង៉េង ជួ ជូនថ្នាក់ដឹកនាំ និងមន្ដ្រីទាំងអស់នៃនាយកដ្ឋាននគរបាលព្រហ្មទណ្ឌ ដែលបានខិតខំប្រឹងប្រែងបំពេញការងារប្រកបដោយការទទួលខុសត្រូវ និងទទួលបានលទ្ធផលល្អនៅពេលនេះ៕