សម្ដេច ហ៊ុន ម៉ាណែត ចាត់ទុកការជួបជុំជាមួយពលរដ្ឋខ្មែរនៅលើទឹកដីអាមេរិក ជាមហាគ្រួសារខ្មែរតែមួយ

សម្ដេចធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានចាត់ទុកការជួបជុំជាមួយពលរដ្ឋខ្មែរប្រមាណ ២ ៥០០នាក់ នៅលើទឹកដីអាមេរិក ជាមហាគ្រួសារខ្មែរតែមួយ។  នេះបើតាមសំណេររបស់ សម្ដេចធិបតី ហ៊ុន ម៉ាណែត នៅគេហទំព័រហ្វេសប៊ុកផ្លូវការ នាថ្ងៃទី២៥ ខែកញ្ញា ឆ្នាំ២០២៣ បន្ទាប់ពីសម្ដេចធ្វើមាតុភូមិនិវត្តន៍មកដល់កម្ពុជាដោយសុវត្ថិភាព។

សម្ដេចធិបតី បានសរសេរនៅលើគេហទំព័រហ្វេសប៊ុកផ្លូវការថា ​ “ខ្ញុំព្រះករុណាខ្ញុំ សូមថ្វាយការអរព្រះគុណប្រគេនព្រះសង្ឃគ្រប់ព្រះអង្គ និងអរគុណចំពោះ អ៊ុំពូមីង បងប្អូនប្រជាពលរដ្ឋខ្មែរចំនួនប្រមាណជាង ២ ៥០០នាក់ ដែលបានអញ្ជើញមកពីតាមបណ្តារដ្ឋ និងខេត្តនានា ក្នុងសហរដ្ឋអាមេរិក និងប្រទេសកាណាដា  ដើម្បីជួបជុំគ្នានៅទីក្រុងញូវយ៉ក។ ការណ៍នេះគឺជាការបង្ហាញនូវភាពកក់ក្តៅ ប្រកបដោយស្មារតីរួបរួម គាំទ្រជាមហាគ្រួសារតែមួយ ជូនចំពោះប្រជាជន និងរាជរដ្ឋាភិបាលកម្ពុជា ក៏ដូចជារូបខ្ញុំព្រះករុណាខ្ញុំផ្ទាល់”។

ជាមួយគ្នានេះ​ សម្ដេចធិបតី បានអរគុណដល់ក្រុមការងារយុវជន និងគ្រប់ភាគីពាក់ព័ន្ធទាំងអស់ ដែលបានជួយរៀបចំកម្មវិធីជួបជុំដ៏មានអត្ថន័យក្នុងធ្លុងសាមគ្គីភាពនៃមហាគ្រួសារខ្មែរ ប្រកបដោយភាពសប្បាយរីករាយ និងស្និទ្ធស្នាលបំផុត។

ទិដ្ឋភាព នៃការជួបជុំពលរដ្ឋខ្មែរនៅលើទឹកដីអាមេរិកលើកនេះ គឺជាលើកទីមួយហើយក្នុងនាម សម្ដេចធិបតី ហ៊ុន ម៉ាណែត ជានាយករដ្ឋមន្ត្រីកម្ពុជា ដែលចូលកាន់តំណែងផ្លូវការ កាលពីថ្ងៃទី២២​ ខែសីហា ឆ្នាំ២០២៣ ។ ដោយឡែក​ បើនិយាយពីជំនួបជាមួយពលរដ្ឋខ្មែរ កម្មករ កម្មការនី រោងចក្រ នៅក្នុងប្រទេសកម្ពុជាវិញ សូមរំលឹកឡើងវិញថា សម្ដេចធិបតី ហ៊ុន​ ម៉ាណែត​ នាយករដ្ឋមន្ត្រីកម្ពុជា បានជួបជាមួយពលរដ្ឋខ្មែរចំនួន៤លើកហើយ។

លើកទី១ គឺធ្វើឡើងនៅថ្ងៃទី២៩ ខែសីហា នៅតំបន់ព្រៃស្ពឺ រាជធានីភ្នំពេញ មានកម្មករ និយោជិត ចូលរួមចំនួន ១៨,០១៣នាក់។ លើកទី២ ធ្វើឡើងនៅថ្ងៃទី១ ខែកញ្ញា ឆ្នាំ២០២៣ នៅក្រុងតាខ្មៅ ខេត្តកណ្តាល មានកម្មករ និយោជិតចូលរួម ១៨,២៨៩នាក់។ លើកទី៣ កាលពីថ្ងៃ​ទី៩ ខែកញ្ញា ឆ្នាំ២០២៣ នៅក្នុងខេត្តកំពង់ស្ពឺ ដែលមានកម្មករ និយោជិតចូលរួម ១៨,២៦៥នាក់ និងលើកទី៤ កាលពីថ្ងៃទី​១៩ ខែកញ្ញា ឆ្នាំ២០២៣ នៅស្រុកបាទី ខេត្តតាកែវកាលពីថ្ងៃទី១៩ ខែកញ្ញា ដែលមានកម្មករ និយោជិតចូលរួម ១៨,១០៤នាក់។

ក្រៅតែពីជួបជាមួយកម្មករ កម្មការនីរោងចក្រ សម្ដេចធិបតី ហ៊ុន ម៉ាណែត ធ្លាប់បានប្រកាស កាលពីថ្ងៃទី០៩ ខែកញ្ញាថា សម្ដេច នឹងចុះជួបជាមួយអាជីវករលក់ដូរតាមផ្សារនាពេលខាងមុខ ដើម្បីដឹងពីតម្រូវការអ្វីដែលអាជីវករចង់បាន៕

ដោយ៖ ង៉ិល ណារ៉ាត់