ព័ត៌មានជាតិ

សិស្សានុសិស្សអនុវិទ្យាល័យព្រៃព្រាល ចុះទស្សនកិច្ចសិក្សាទៅកាន់ប្រាសាទសំបូរព្រៃគុក

បានផុស

២ years មុន

នៅ

ថ្ងៃអង្គារ ២៦ កញ្ញា ២០២៣

ដោយ

កាលពីថ្ងៃទី ២៥ ខែកញ្ញា ឆ្នាំ ២០២៣ អនុវិទ្យាល័យព្រៃព្រាល បានរៀបចំដំណើរទស្សនកិច្ចសិក្សា របស់សិស្សទៅកាន់តំបន់ប្រាសាទបេតិកភណ្ឌពិភពលោក ប្រាសាទសំបូរព្រៃគុក ដើម្បីសិក្សាលក្ខណៈសំខាន់ៗ របស់ប្រាសាទ។

លោក ម៉ាក់ សាន់នី នាយកសាលាអនុវិទ្យាល័យព្រៃព្រាល លើកឡើងថា គោលបំណង នៃទស្សនកិច្ចសិក្សា នៅថ្ងៃនេះ ដើម្បីពង្រឹងការសិក្សាបន្ថែមរបស់សិស្ស ដោយផ្សារភ្ជាប់ការសិក្សាទ្រឹស្ដីទៅនឹងការអនុវត្តជាក់ស្ដែង ស្វែងយល់ពីប្រវត្តិ ប្រព័ន្ធសិក្សាជំនាញ និងផលិតផល សេវាកម្មរបស់វិទ្យាស្ថានបច្ចេកវិទ្យាកំពង់ឈើទាល។ ហើយសិក្សាស្វែងយល់ពីតំបន់ប្រវត្តិសាស្ត្រប្រាសាទសំបូរព្រៃគុក លើកទឹកចិត្តសិស្សខិតខំសិក្សាពេញមួយឆ្នាំសិក្សា និងលើកទឹកចិត្តលោកគ្រូអ្នកគ្រូ ដែលបានបង្ហាត់បង្រៀនដល់សិស្សានុសិស្ស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី ជា សោភារី ប្រធាននាយកដ្ឋានអភិវឌ្ឍទេសចរណ៍ នៃអាជ្ញាធរជាតិសំបូរព្រៃគុក ថ្លែងថា សិស្សានុសិស្សយល់ដឹងពីការបញ្ចូលប្រាសាទសំបូរព្រៃគុកជាបេតិកភណ្ឌពិភពលោក នៅថ្ងៃទី ០៨ ខែកក្កដា ឆ្នាំ ២០១៧ ដោយមានលក្ខខណ្ឌយ៉ាងតិចចំនួន ៦ ចំណុច ទើបទទួលបានជាបេតិកភណ្ឌពិភពលោក ដើម្បីប្រជាជនកម្ពុជាទទួលស្គាល់ជាសម្បត្តិវប្បធម៌យ៉ាងពិតប្រាកដ។

លោកស្រីបានបន្តទៀតថា សម្រាប់ទស្សនកិច្ចសិក្សាថ្ងៃនេះ គឺចង់បង្ហាញពីប្រវត្តិ នៃប្រាសាទសំបូរព្រៃគុក ជាតំបន់ឥសានបុរៈ ដើម្បីទាក់ទាញភ្ញៀវជាតិ អន្តរជាតិ មកទស្សនាជារៀងរាល់ថ្ងៃ ព្រមទាំងចូលរួមថែរក្សាប្រវត្តិសាស្ត្រឲ្យបានគង់វង្សយូរអង្វែង។

លោក ឃីម សុខឃាង អភិបាលស្រុកប្រាសាទសំបូរ បញ្ជាក់ដោយលើកឡើងថា សម្រាប់ទស្សនកិច្ចរបស់សិស្សានុសិស្សនៅអនុវិទ្យាល័យព្រៃព្រាល ថ្ងៃនេះ បានបណ្ដុះនូវធនធានមនុស្សឲ្យបានទូលំទូលាយពីការសិក្សារៀនសូត្រភ្ជាប់នឹងការអនុវត្តជាក់ស្ដែងនៅតាមសាលា ឬ រមណីយដ្ឋាន ដើម្បីដកស្រង់បទពិសោធន៍ល្អៗ យកទៅអនុវត្តនៅមូលដ្ឋាន និងបង្រៀនដល់សិស្សជំនាន់ក្រោយ។

លោក ឃីម សុខឃាង ក៏បានថ្លែងអំណរគុណដល់លោកគ្រូអ្នកគ្រូ និងលោកនាយកសាលា ដែលបានលះបង់ពេលវេលាដ៏មានតម្លៃមកទស្សនកិច្ចផ្ទាល់នៅស្រុកប្រាសាទសំបូរនេះ និងសូមឲ្យសិស្សានុសិស្សទាំងអស់ ខិតខំរៀនសូត្រ និងរក្សានូវវប្បធម៌ប្រពៃណីខ្មែរឲ្យបានល្អ ពិសេសជៀសឆ្ងាយពីគ្រឿងញៀនឲ្យបានគ្រប់ៗ គ្នា៕

អត្ថបទ ៖ ឈាង មករា