កសិករនៅបន្ទាយមានជ័យថា តម្លៃស្រូវជាង ១ ១០០ រៀល/គីឡូ ជាតម្លៃល្អ

ប្រជាកសិករនៅស្រុកមង្គលបូរី ខេត្តបន្ទាយមានជ័យបានបង្ហាញពីក្តីរីករាយចំពោះតម្លៃស្រូវឆ្នាំនេះ ទទួលបានតម្លៃល្អប្រសេីរជាបណ្តាឆ្នាំមុនៗ បេីទោះបីជាឆ្នាំនេះទទួលបានទិន្នផល មិនដូចឆ្នាំកន្លងទៅក៏ដោយ តែចំពោះតម្លៃទទួលយកបាន ថ្លៃលេីសការរំពឹងទុក។

កសិករម្នាក់ដែលរស់នៅក្នុងឃុំចំណោមបានឱ្យដឹងថា ឆ្នាំនេះគាត់ធ្វេីស្រែចំនួន ៧ ហិកតា ប្រភេទស្រូវសែនក្រអូប ដោយទទួលបានទិន្នផលក្នុងមួយហិកតា ប្រហែល ៣,៥ តោនប៉ុណ្ណោះ ដោយសារការពីដេីមដៃខ្វះខាតទឹក។

ការប្រមូលផលនេះគឺជាលេីកទី៣ហេីយ កាលពីលេីកទី១ លក់ក្នុងមួយតោនបានប្រមាណជាង ១ លាន ១ សែន (១ ម៉ឺន ៦០ បាត) ខណៈលើកទី ២ និងទី៣ ប្រហាក់ប្រហែលគ្នាដែរ។

កសិករមួយរូបទៀត ឈ្មោះ ចាន់ គឿន ក៏បានប្រាប់ស្រដៀងគ្នាដែរថា ប្អូនស្រីសប្បាយរីករាយ ដោយសារតម្លៃស្រូវឆ្នាំនេះមានតម្លៃខ្ពស់ជាងឆ្នាំមុន បេីទោះទិន្នផលស្រូវទាបជាងឆ្នាំមុនក៏ដោយ។

ដោយឡែកលោក លី វណ្ណា ដែលជាឈ្មួញទិញស្រូវនៅក្នុងឃុំចំណោមបានប្រាប់ឱ្យដឹងដែលថា ការប្រមូលទិញស្រូវប្រភេទសែនក្រអូបចាប់ពីតម្លៃ១០បាតទៅ ១០,២បាត (ក្នុងមួយគីឡូក្រាម) ក្រៅពីនេះលោកក៏បានប្រមូលទិញប្រភេទស្រូវស្រងែ តម្លៃចន្លោះពី ៩៧បាត/មួយគីឡូក្រាម (ស្មេីនឹង៩៧០០បាត/មួយតោន) ទៅ៩៨បាត/មួយគីឡូក្រាម (ស្មេីរនឹង៩៨០០បាត/មួយតោន) និងប្រភេទ៥១-៥៤ ទិញក្នុងតម្លៃ៩៧បាត (ស្មេីរនឹង៩៧០០បាត/មួយតោន)។

បេីតាមការបញ្ជាក់ពីលោក ឃុន ឃួន អាជ្ញាធរភូមិ បានប្រាប់ឱ្យដឹងថា កសិករដែលបានធ្វេីស្រែប្រាំងនៅភូមិចំណោមខាងកេីត ឃុំចំណោម មានចំនួន៩៧៥ហិកតា ដោយឡែកទូទាំងឃុំចំណោមការងារប្រមូលផលស្រូវរបស់បងប្អូនកសិករប្រមាណជាង៦០ទៅ៦៥%ហេីយ។

ភាគច្រេីនកសិករនៅក្នុងឃុំនិយមប្រេីប្រាស់ពូជ៥៤ និងសែនក្រអូប ហេីយទិន្នផលឆ្នាំនេះចន្លោះពី៣,៥ ទៅ៤តោនក្នុងមួយហិកតា។

លោក ឃ្លោក នួយ អភិបាលរងខេត្តបន្ទាយមានជ័យបានប្រាប់ឱ្យដឹងថា សម្រាប់ឆ្នាំនេះសង្កេតឃេីញថា តម្លៃស្រូវមានភាពល្អប្រេីល្អ មានតម្លៃខ្ពស់ជាងឆ្នាំមុន។

ជាមួយគ្មានោះក៏មានបងប្អូនមួយចំនួនដែលលក់មិនបានតម្លៃខ្ពស់ ដោយ​សារ​តែស្រូវរបស់ពួកគាត់មិនសូវល្អ ពោលគឺពួកគាត់ប្រមូលផលស្រូវ ទាំងដែលស្រូវមិនសូវទុំល្អ ដែលជាហេតុធ្វេីឱ្យឈ្មួញទិញក្នុងតម្លៃទាប។ តែចំពោះបងប្អូនចំពោះប្រភេទស្រូវល្អគឺទទួលបានតម្លៃខ្ពស់៕

អត្ថបទ៖ អពៅ