អ្នកជំនាញ៖ សណ្ឋាគារខេត្តសៀមរាប បើកដំណើរការច្រើនលើសតម្រូវការ

អ្នកជំនាញវិស័យសណ្ឋាគារ បានលើកឡើងថា បច្ចុប្បន្ននេះ កំណើននៃភាពរីកចម្រើនវិស័យសណ្ឋាគារ​នៅ​ខេត្តសៀមរាប បានដំណើរការល្អប្រសើរ និងវិនិយោគលើសពីតម្រូវការ ខណៈចំនួនភ្ញៀវទេសចរនៅមានកម្រិត។

លោក នួន ច័ន្ទតារា នាយកគ្រប់គ្រងសណ្ឋាគារ ស្តារី អង្គរនៅខេត្តសៀមរាប បានកត់សម្គាល់ឃើញថា ចំនួនបន្ទប់​សណ្ឋាគារផ្គត់ផ្គង់នៅខេត្តសៀមរាបច្រើនលើសតម្រូវការ។ លោកបន្តដូច្នេះថា« បច្ចុប្បន្ននេះ Supply over demand ជាកត្តាធំ ដោយសារនាំគ្នាវិនិយោគបើកសណ្ឋាគារ ផ្ទះសំណាក់ ភោជនីយដ្ឋានច្រើន ប៉ុន្តែភ្ញៀវទេសចរជាតិ និងអន្តរជាតិមានតិច»។

បើតាមលោក នួន ច័ន្ទតារា ជារៀងរាល់ឆ្នាំ ចាប់ពីខែ មិថុនា ដល់ខែ កញ្ញា ខេត្តសៀមរាប មិនសូវទទួល​បានភ្ញៀវ​ទេសចរ​ច្រើននោះទេ។ ដោយឡែកភ្ញៀវអន្តរជាតិ ដែលមានកំណើនច្រើន គឺនៅខែ វិច្ឆិកា និងធ្នូ ជាខែ Hight Season ដែលជារដូវទេសចរអន្តរជាតិចេញដើរកម្សាន្ត ជាពិសេសភ្ញៀវពីប៉ែកអឺរ៉ុប ដោយសារជារដូវធ្លាក់ទឹកកក។

បើទោះជាវិស័យសណ្ឋាគារ ផ្ទះសំណាក់ ជួបការលំបាកបន្តិចក្តី តែតាមរបាយការណ៍ភ្ញៀវទេសចរចូលទៅកម្សាន្តលេង​ខេត្តសៀមរាប ហាក់មានកំណើនល្អប្រសើរ។ លោក ង៉ូវ សេងកាក់ ប្រធានមន្ទីរទេសចរណ៍ខេត្តសៀមរាប លើកឡើង​តាមរយៈរបាយការណ៍ថា រយៈពេល ៨ខែ ចាប់ពីខែ មករា ដល់ខែ សីហា ឆ្នាំ ២០២៣ ខេត្តសៀមរាប ទទួលបានភ្ញៀវ​ទេសចរអន្តរជាតិ​ចំនួន  ៤៩៨.៥១៣ នាក់ កើនឡើង ៣៥០.៨៥% បើប្រៀបធៀបនឹងរយៈពេលដូចគ្នា​កាលពីឆ្នាំ​២០២២។

បើតាមប្រធានមន្ទីរទេសចរណ៍ខេត្ត ក្រោយអាកាសយានដ្ឋានអន្តរជាតិសៀមរាបអង្គរ បើកឱ្យដំណើរការនៅថ្ងៃទី ១៦ ខែ តុលាខាងមុខនេះ នឹងអាចទាក់ទាញសក្តានុពលវិនិយោគ និងទេសចរណ៍មកកាន់ទឹកដីខេត្តសៀមរាប ក៏ដូចជាប្រទេស​កម្ពុជាទាំងមូល។ លើសពីនេះទៀតលោកថា នឹងធ្វើឱ្យខេត្តសៀមរាបក្លាយ​ជាប៉ូលសេដ្ឋកិច្ចពិសេស​ដ៏សំខាន់មួយ​សម្រាប់ប្រទេសកម្ពុជា និងជំរុញឱ្យខេត្តដែលជាប់នឹងសៀមរាបទទួលបានសក្តានុពលផងដែរ៕