ពលរដ្ឋរស់នៅក្នុងស្រុកឯកភ្នំ ស្នើអាជ្ញាធរជួយស្ថាបនាផ្លូវមួយខ្សែដែលកំពុងខូចខាតខ្លាំង

ផ្លូវដីមួយខ្សែកំពុងរងការខូចខាតខ្លាំងនៅរដូវភ្លៀងធ្លាក់នេះ ដោយសារគ្មានការកែលម្អ ឬជួសជុលឡើងវិញពីសំណាក់អាជ្ញាធរ និងអង្គភាពជំនាញ ដែលទុកអោយសភាពផ្លូវកាន់តែធ្ងន់ធ្ងរឡើង។

នៅក្នុងរដូវភ្លៀងនេះប្រជាពលរដ្ឋជាច្រើនដែលរស់នៅក្នុងស្រុកឯកភ្នំ ខេត្តបាត់ដំបង បានសំណូមពរយ៉ាងទទូចដល់ដ្នាក់ដឹកនាំ និងអាជ្ញាធរខេត្ត ដើម្បីឲ្យជួយសម្រួលទៅលើការជួសជុល និងស្ថាបនាផ្លូវមួយខ្សែដែលមានប្រវែងប្រមាណ៥ គីឡូម៉ែត្រ ដោយបច្ចុប្បន្ននេះកំពុងរងការខូចខាតយ៉ាងខ្លាំងធ្វើឲ្យមានការលំបាកក្នុងការធ្វើដំណើររបស់ប្រជាពលរដ្ឋក៏ដូចជាសិស្សានុសិស្សនៅពេលចេញទៅសាលារៀន។

ប្រជាពលរដ្ឋមួយចំនួនបានលើកឡើងថា ផ្លូវដែលមានការខូចខាតនេះ គឺចាប់ពីចំណុចសាលាបឋមសិក្សា រហាលសួង ឆ្លងកាត់ភូមិដួងមា ភូមិអន្សងសក និងភូមិព្រែកត្រប់ នៅក្នុងឃុំព្រែកនរិន្ទ ស្រុកឯកភ្នំ ដែលមានចម្ងាយប្រមាណពី ៤ ទៅ ៥ គីឡូម៉ែត្រ។

ពួកគាត់បានបន្តទៀតថា ក្រោយភ្លៀងម្ដងៗគឺមានការពិបាកខ្លាំងក្នុងការធ្វើដំណើរដោយសារតែផ្លូវមានសភាពបែកភក់ និងជង្ហុកទឹក ពេលខ្លះគឺបង្កឲ្យមានការដួលម៉ូតូជាញឹកញាប់ផងដែរដោយម៉ូតូខ្លះដឹកបន្លែបង្ការយកទៅលក់ ឯកង់ ម៉ូតូខ្លះទៀត គឺជារបស់លោកគ្រូអ្នកគ្រូ និងសិក្សានុសិស្ស ដែលធ្វើឲ្យពួកគាត់ប្រឡាក់ពេញខ្លួន។

ប្រជាពលរដ្ឋទាំងអស់បានសំណូមពរយ៉ាងទទូចដល់អង្គភាពពាក់ព័ន្ធថ្នាក់ដឹកនាំ ពិសេសអាជ្ញាធរខេត្ត មេត្តាជួយពិនិត្យមើលឡើងវិញទៅលើផ្លូវមួយខ្សែនេះដើម្បីជួយស្ថាបនាឲ្យមានភាពល្អប្រសើរសម្រាប់ពួកគាត់បានធ្វើដំណើរដោយសុវត្ថិភាព ពិសេសទៅទៀត ផ្លូវនេះគឺសម្រាប់ប្រជាកសិករដឹកភោគផលដំណាំចេញពីចម្ការទៅកាន់ទីផ្សារផងដែរ៕

អត្ថបទ៖ សោ និយមរ័ត្ន